وسكەمەن. 19 قاڭتار. قازتاگ – شىعىس قازاقستان وبلىسىنداعى (شقو) كۇرشىم اۋدانى جاڭا اۋىل سەلوسىن سۋ باسۋىنىڭ ءبىر سەبەبىن دەپارتامەنت ماماندارى قالجىر وزەنىندەگى گيدروقۇرىلىستاردى قىسقا لايىقتى دايىنداماۋدا دەپ اتاپ وتىرعانىن وبلىس اكىمىنىڭ ءباسپاسوز قىزمەتى حابارلادى.

«تەكسەرىس ناتيجەسى 18-ءشى قاڭتاردا وبلىس اكىمى بەردىبەك ساپارباەۆتىڭ باسشىلىعىمەن وتكەن سەلەكتورلىق كەڭەستە ايتىلدى. تج سەبەپتەرى سۋ ايىراتىن قۇبىردىڭ قىسقا قاراي جابىلماۋىندا جانە بوگەتتەگى جىرىقتار بولىپ تۇر»، - دەدى اكىمدىكتەگىلەر.

مامانداردىڭ ايتۋىنشا، قالجىر وزەنىندەگى گيدروقۇرىلىستار جەرگىلىكتى ەگىستىكتى جازعى ماۋسىمدا سۋمەن قامتاماسىز ەتۋ ءۇشىن سالىنعان. ال 2-ءشى قاڭتاردان بەرى مۇندا ورناعان 40 گرادۋستىق قاتتى ايازدان وزەن اڭعارى مۇز بولىپ قاتىپ قالعان. سوندىقتان سۋ قۇبىر ارقىلى جانە بوگەتتەگى جىرالار ارقىلى اۋىلعا قاراي جايىلعان.

«اتالعان جاعداي جەرگىلىكتى باسقارۋ ورگاندارىنىڭ باقىلاۋى جەتكىلىكسىزدىگىنەن ورىن الىپ وتىر. وسى سەبەپتى وبلىستىق باسقارما وكىلدەرىنىڭ قاتىسۋىمەن جۇمىس كوميسسياسىن قۇرىپ، قالالار مەن وبلىس اۋداندارىن ارالاپ تەكسەرىس جۇرگىزۋ تۋرالى شەشىم قابىلداندى»، - دەپ حابارلادى اكىمدىكتەگىلەر.

بۇرىن حابارلانعانداي، 4-ءشى قاڭتاردا شقو كۇرشىم اۋدانىندا قالجىر وزەنىنىڭ ارناسىنىڭ قاتىپ قالۋىنان جاڭا اۋىل سەلوسىنداعى ەگىستىكتەر مەن اۋىلداعى شامامەن 10 اۋلانىڭ قورا-قوپسىسىن سۋ باسىپ، تۇرعىن ۇيلەردى سۋ شايۋ قاۋپى تونگەن بولاتىن.