بۇدان ءسال ەرتەرەكتە «شىركىن، كۇيەۋ بىتكەن قازاققا جەنيا جەزدەمىزدەي ەڭبەك سىڭىرسە… نەمەسە گۇلفايرۋس يسمايلوۆا مەن ەۆگەني سيدوركين تۋرالى سىر» دەپ اتالاتىن ماقالا جاريالاعانىم بار. («قازاق ءۇنى» گازەتى. 19.04.2016).

سول ماقالا تۋرالى پىكىر بىلدىرگەن ءبىر قۇربىمىز الدە قارىنداسىمىز گۇلفايرۋس يسمايلوۆانى ءوز-وزىنە سەنىمدى تۇردە «تاتار قىزى» دەپتى. سوندىقتان ول دۇنيەگە قىسقاشا تۇسىنىكتەمە بەرە كەتۋگە تۋرا كەلەدى.

قازىر كەيبىر ءىنى-قارىنداستارىمىزدىڭ كوپ نارسەنى اسا بىلە قويماسا دا بىردەڭەنى جوبالاپ سوعىپ، جۇرتتى اداستىراتىنى ادەتكە اينالعانداي. قىنجىلاسىڭ. باسقا قايران جوق.

گۇلفايرۋس اپاي، ءوز ايتۋىنشا، ەجەلگى الماتىلىقتار. تۋعان اكەسى تاڭسىقباي قونارباەۆ (سۋرەتتە قىزى گۋلفايرۋسپەن وتىر) رەۆوليۋتسياعا دەيىن سانكت-پەتەربۋرگ ۋنيۆەرسيتەتىن ءبىتىرىپتى. كەيىن ساكەن سەيفۋللين توبىندا بولدى دەگەن ايىپپەن سوتتالعان. ءتورت جىلدان كەيىن «اقتالىپ»، ەكىنشىدۇنيەجۇزىلىك سوعىسقا جونەلتىلەدى. پانفيلوۆشى. مايداندى باستان-اياق وتكەرگەن. كەيىن الەۋمەتتىك-جابدىقتاۋ مينيسترلىگىندە قىزمەت اتقارىپتى. ۇزىناعاشتا جەرلەنگەن.

گۇلەكەڭنىڭ اناسىنىڭ ەسىمى – قايىرنيسا. ال ءوزىنىڭ ازان شاقىرىپ قويعان اتى – كۇلپاش. وسى ەسىمدى اپايىمىز اۋەل باستان ۇناتپاعانداي. ونىڭ ۇستىنە، ورىسناماي قۇربىلارى ءبارى دەرلىك كۇلپاشقا سايكەس «كۋلتيا» دەپ اتايدى. بۇل اپايعا تىپتەن ۇناماعان. سول سەبەپتى، پاسپورت العان كەزدە اتىن گۇلفايرۋس دەپ وزگەرتىپ الادى. («فايرۋس» ارابشا جۇلدىز دەگەن ماعىنا بەرەتىن كورىنەدى). كۇلپاش قونارباەۆانى تاتار دەپ وتىرعان قارىنداسىمىز گۇلفايرۋس يسمايلوۆا دەگەندى وزىنشە دولبارلاپ، تاتار اعايىندارعا ءتان فاميليا دەپ شەشسە كەرەك. گۇلەكەڭ:

– مەن ناعىز قازاقپىن، – دەۋشى ەدى. (سوزبە-ءسوز – «چيستوكروۆنايا كازاشكا»). – ال تاربيەلەگەن – وگەي اكەم مانسۇر يسمايلوۆ. دۇنگەن ۇلتىنىڭ وكىلى. ودان انام بەس بالا تاپتى. ءبارى دە اققۇبا ءوڭدى، بوزكوز بالالار. نەگە دەسەڭىز، مامام قازاقتىڭ بوزكوز قىزى ەدى. (ورىسشا ايتقاندا، «سەروگلازايا كازاشكا» ق.م.). – باۋىرلارىم تۇگەلدەي دۇنگەن بولىپ جازىلدى...

اپاي ءتىرى بولسا ءوزىن تاتار دەگەن سوزگە قاتتى رەنجىر ەدى. نەگىزسىز ايتىلعان ءۋاج جالعىز و كىسىنى عانا ەمەس، گۇلەكەڭدى جاقىن تانىعان تالاي ادامدى وپىندىراتىنى داۋسىز. جانە بەتالدى ءسوز نەبىر داقپىرتقا جول اشادى...
ودان سوڭ: ماقالانىڭ گازەتتىك تۇرىندە گۇلفايرۋس مانسۇرقىزىنىڭ كينو، تەاتر سالاسىنداعى ەڭبەكتەرى، كەرەمەت قولتۋمالارى جونىندە، كوپتەگەن حالىقارالىق دەڭگەيدەگى ماراپاتتارى تۋرالى قىسقاشا انىقتاما بار-تىن. ينتەرنەتتىك نۇسقاعا ىلىكپەپتى. ونى قايتالاپ سالۋدى قاجەتسىز دەپ تاپتىم. ويتكەنى، كوزىقاراقتى قاۋىم گۇلەكەڭ عۇمىربايانىن جاقسى بىلەدى دەپ ويلايمىن.

قۇلتىلەۋ مۇقاشتىڭ Facebook-تەگى پاراقشاسىنان

Abai.kz