تالدىقورعاندا II رەسپۋبليكالىق «ASAR» ۇەۇ-بيزنەس پەن مەملەكەتتىڭ ءوزارا əرەكەتىنە باعىتتالعان ۇشجاقتى ىنتىماقتاستىق فورۋمى ءوتتى، - دەپ حابارلايدى وڭىردەگى مەنشىكتى ءتىلشىمىز.

قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى، الماتى وبلىسىنىڭ اكىمدىگى، «اتامەكەن» ۇكپ جانە «ازاماتتىق باستامالاردى قولداۋ ورتالىعى» ۇاق ۇيىمداستىرۋىمەن «وڭىرلەردىڭ تۇراقتى دامۋىنا جەرگىلىكتى قوعامداستىقتاردىڭ قوسقان ۇلەسى» تاقىرىبىندا وتكەن فورۋم ەكى كۇنگە جالعاستى.

فورۋم جەرگىلىكتى قوعامداستىقتىڭ الەۋمەتتىك ماسەلەلەردى شەشۋدە بيزنەس، ۇكىمەتتىك ەمەس سەكتور جانە مەملەكەتتىك ورگانداردىڭ كۇش-جىگەرىن بەلسەندى ەتۋگە باعىتتالعان.

فورۋم جۇمىسىنا 300-گە جۋىق وتاندىق، حالىقارالىق ۇەۇ مۇشەلەرى، قوعام قايراتكەرلەرى،  قر پارلامەنتى ءماجىلىسىنىڭ دەپۋتاتتارى، بيزنەس قۇرىلىمنىڭ، وتاندىق جانە حالىقارالىق ۇكىمەتتىك ەمەس ۇيىمداردىڭ، ساراپشىلار قاۋىمداستىعىنىڭ، ورتالىق جانە جەرگىلىكتى مەملەكەتتىك ورگانداردىڭ وكىلدەرى قاتىستى.

ەكى كۇندىك فورۋم شەڭبەرىندە پانەلدىك سەسسيالار، ماستەر-كلاسستار، case-stady سەمينارلارى، پراكتيكۋمدار جانە دەباتتار وتكىزىلدى. ءىس-شارالاردى وتكىزۋ ءۇشىن 13 الاڭ ۇيىمداستىرىلدى جانە ساراپشىلار، ونىڭ ىشىندە 3 شەتەلدىك ساراپشى شاقىرىلدى.

«ءومىر ءار ۋاقىتتا ءار سەكتوردىڭ بەلسەندىلىگىنە مۇقتاج. ويتكەنى ءار سەكتور ءوزى ءۇشىن جۇمىس ىستەيدى. بىراق ءبارى بىرىكپەگەن سوڭ كوڭىل كونشىتەرلىك ناتيجە بولمايدى.  سوندىقتان مەن ەكى كۇن بويى مۇندا كەلگەندەر وزدەرىنە سەرىكتەس تاۋىپ، تىڭ جوبانىڭ مەحانيزمى مەن مودەلىن دايىندايدى دەپ ويلايمىن. مەن مىسالى ارىپتەستەرىمە ينكليۋزيۆتى جوسپارلاۋدىڭ جۇيەسى اتتى بولگارلىق ۇلگىنى ۇسىنامىن. ونىم وسىنداعىلار ءۇشىن ءتيىمدى بولۋى مۇمكىن. مەن دە ءوز كەزەگىندە قازاقستاندىقتاردىڭ وزىق تاجىريبەلەرىن ەلىمە الىپ قايتامىن»، - دەيدى بولگاريا مەملەكەتىنىڭ «جەرگىلىكتى ءوزىن-ءوزى باسقارۋدى رەفورمالاۋ» قورىنىڭ ساراپشىسى الەكساندر ميحايلوۆ.

فورۋمعا 216 ءوتىنىم كەلىپ تۇسكەن، ونىڭ ىشىنەن 141 جوبا ىرىكتەلىپ الىندى. 8 جوبا، ياعني ۇيىمداردىڭ قۇنى 4,6 ملرد. تەڭگە بولاتىن 4 جوبا  كاسىپكەرلەر تاراپىنان قولداۋعا يە بولادى. اتاپ ايتقاندا، تالدىقورعان قالالىق «قامقور» مۇگەدەكتەر قوعامدىق بىرلەستىگى ۇسىنعان «شەكسىز بي»، «قاراساي اۋدانىنان «بالاتاي» قب-نىڭ «مۇرانى دامىتامىز – ءتۋريزمدى جانە ءوزىمىزدى دامىتامىز» جوباسى، كەربۇلاق اۋداندىق «قامقور» مۇگەدەكتەر قوعامى» قب-نىڭ «مۇمكىندىگى شەكتەۋلى جانە دتسپ-مەن اۋىراتىن بالالارعا ارنالعان وڭالتۋ ورتالىعى» جوباسى جانە كوكسۋ اۋداندىق «ءۇش ۇرپاق» قب-نىڭ «ءۇش ۇرپاق» جوباسى.

فورۋمنىڭ ەكىنشى كۇنىندەگى پلەنارلىق سەسسيا جۇمىسىن ءدىن ىستەرى جانە ازاماتتىق قوعام ءمينيسترى دارحان كالەتاەۆ اشتى.

«الماتى وبلىسى ۇكىمەتتىك ەمەس ۇيىمدار جەرگىلىكتى قوعامداستىق قورىن قۇرۋ بويىنشا ارنايى جوبا ازىرلەگەن جانە ونى تاجىريبە جۇزىندە ىسكە اسىرعان ەلىمىزدەگى العاشقى ءوڭىر»،- دەپ اتاپ ءوتتى. سونىمەن قاتار «الەۋمەتتىك يدەيالار پلاتفورماسىنىڭ» شەڭبەرىندە كاسىپكەرلەردەن قولداۋ تاپقان جوبالارمەن تانىستى.

سونىمەن قاتار، فورۋم شەڭبەرىندە ۇەۇ، بيزنەس جانە مەملەكەتتىك ورگاندار اراسىندا 8 قۇجاتقا، ونىڭ ىشىندە ۇەۇ مەن بيزنەس اراسىنداعى سەرىكتەستىك تۋرالى 7 مەموراندۋمعا جانە ءدىن ىستەرى جانە ازاماتتىق قوعام مينيسترلىگى مەن «اتامەكەن» ۇكپ اراسىندا سەرىكتەستىك كەلىسىمىنە قول قويىلدى.

ايتا كەتەيىك، جالپى الماتى وبلىسىندا قازىرگى كەزدە 415 ۇكىمەتتىك ەمەس ۇيىم بار. وتكەن جىلى الەۋمەتتىك مەملەكەتتىك تاپسىرىستاردى ورىنداۋعا وبلىستا 414,5 ملن. تەڭگە ءبولىندى، ونىڭ 100,0 ملن. تەڭگەسى ۇەۇ-لاردى قولداۋعا باعىتتالعان. سونىمەن قاتار وتكەن جىلى ۇكىمەتتىك ەمەس ۇيىمدارعا ارنالعان كونسالتينگ ورتالىعى اشىلدى. ورتالىق جۇمىسىن جۇيەلەندىرۋ ماقساتىندا 2018-2020 جىلدارعا 60 ملن. تەڭگە قاراستىرىلعان.

Abai.kz