21-22 ماۋسىم ارالىعىندا قازاقستاندىق دەلەگاتسيانىڭ بىشكەك قالاسىندا جۇمىس ساپارى ءوتتى. كەزدەسۋدە «تسيفرلىق قازاقستان» مەملەكەتتىك باعدارلاماسى جانە قىرعىز رەسپۋبليكاسىنىڭ «تازاكووم» ۇلتتىق تسيفرلىق ترانسفورماتسيالاۋ باعدارلاماسى اياسىندا ىنتىماقتاستىق ماسەلەلەرى تالقىلاندى.

قازاقستاننىڭ 29 كومپانياسى قىرعىز وكىلدەرىنە 80-نەن استام اقپاراتتىق-تەحنولوگيالىق شەشىمدەرى مەن ونىمدەرىن ۇسىندى. قازاقستاندىق كومپانيالاردىڭ دەنساۋلىق ساقتاۋ، ءبىلىم بەرۋ، اقپاراتتىق تەحنولوگيالار، تەلەكوممۋنيكاتسيالار، Smart City, كولىك، قاۋىپسىزدىك، ەكونوميكا جانە قارجى سالاسىنداعى مۇمكىندىكتەرى قىرعىزستانداعى مەملەكەتتىك ورگاندار مەن ءىرى كومپانيالاردىڭ قىزىعۋشىلىعىن تۋدىردى.

قازاقستاندىق IT-كومپانيالار مەن «قىرعىزتەلەكوم» ااق، «قىرعىز پوچتا» مك ارالارىندا ەكى مەموراندۋمعا قول قويىلدى.

سونداي-اق كەزدەسۋ بارىسىندا قر اقپارات جانە كوممۋنيكاتسيالار ۆيتسە-ءمينيسترى دينارا شەگلوۆا Astana Hub حالىقارالىق تەحنوپاركىنىڭ تانىستىرىلىمىن وتكىزدى.

قورىتىندى كەڭەسكە قازاقستان رەسپۋبليكاسى پرەمەر-ءمينيسترىنىڭ ورىنباسارى اسقار جۇماعاليەۆ جانە قىرعىز رەسپۋبليكاسىنىڭ پرەمەر-ءمينيسترىنىڭ ورىنباسارى زاميربەك اسقاروۆ قاتىستى.

اسقار جۇماعاليەۆ «تسيفرلىق قازاقستان» مەملەكەتتىك باعدارلاماسى جايلى قىرعىز تاراپتارىنا ايتىپ بەردى جانە 2018 جىلدىڭ 3 شىلدەسىنە جوسپارلانعان استانا Hub پاۆيلونىنىڭ تەحنيكالىق اشىلۋىنا شاقىردى.

ءوز كەزەگىندە، زاميربەك اسكاروۆ قازاقستانمەن ىنتىماقتاستىقتىڭ ستراتەگيالىق ماڭىزدىلىعىن جانە اقپاراتتىق تەحنولوگيالار سالاسىنداعى ۇلكەن الەۋەتتى اتاپ ءوتتى. اقپاراتتىق تەحنولوگيالار جانە بايلانىس جونىندەگى قىرعىزستان رەسپۋبليكاسى مەملەكەتتىك كوميتەتىنىڭ توراعاسى باقىت شارشىمبيەۆ قازاقستاندىق دەلەگاتسيانىڭ جاساعان ساپارىنا العىسىن ءبىلدىردى جانە قازاقستاندىق كومپانيالاردىڭ ۇسىنعان شەشىمدەرى قىرعىز ەلىندە سۇرانىسقا يە ەكەنىن اتاپ ءوتتى.

ساپار بارىسىندا قازاقستان رەسپۋبليكاسى اقپارات جانە بايلانىس مينيسترلىگى مەن قىرعىز رەسپۋبليكاسى اقپاراتتىق تەحنولوگيالارىنىڭ مەملەكەتتىك كوميتەتى اراسىندا تاجىريبە الماسۋ ماقساتىندا ءىس-شارالار وتكىزىلدى. تاراپتار ەكى ەلدىڭ ۇلكەن دەرەكتەر، بۇلتتىق تەحنولوگيالار، ەلەكتروندىق قۇجات اينالىمى سالاسىنداعى تاجىريبەسىن تالقىلادى جانە مەموراندۋمدار مەن كەلىسىمدەردى ازىرلەۋ تۋرالى ۋاعدالاستى.

ساپار سوڭىندا اسقار جۇماعاليەۆ IT-كومپانيالاردىڭ وكىلدەرىمەن بىرگە كەزدەسۋلەردىڭ قورىتىندىسىن تالقىلادى. كومپانيا وكىلدەرى ءىس-شارانىڭ تيىمدىلىگىن اتاپ ءوتتى جانە وسىنداي ساپارمەن باسقا ەلدەرگە بارىپ، ءوز مۇمكىندىكتەرىن ۇسىنۋعا دايىن ەكەندىگىن ايتتى.

Abai.kz