بۇل ماقالا - گازەتكە شىعاتىن دۇنيە ەمەس ەدى. بىراق، اينالامنان، اسىرەسە، ءوز اعامنان جۇيەلى ماركەتنيگپەن اينالىسۋعا قايتا-قايتا ۇسىنىس تۇسكەن سوڭ جاۋاپ بەرۋگە تۋرا كەلدى. بۇل تەكتەس ۇسىنىس ءالى تالاي كەزدەسەرىن سەزگەندىكتەن، جاۋابىمدى جۇيەلەپ قاعازعا ءتۇسىرىپ كوردىم. سوسىن "نەگە وسى تاقىرىپتى باق بەتىنە بەرىپ، كوپشىلىك تالقىسىنا سالماسقا؟"- دەگەن وي كەلدى.

بۇل ماقالا - گازەتكە شىعاتىن دۇنيە ەمەس ەدى. بىراق، اينالامنان، اسىرەسە، ءوز اعامنان جۇيەلى ماركەتنيگپەن اينالىسۋعا قايتا-قايتا ۇسىنىس تۇسكەن سوڭ جاۋاپ بەرۋگە تۋرا كەلدى. بۇل تەكتەس ۇسىنىس ءالى تالاي كەزدەسەرىن سەزگەندىكتەن، جاۋابىمدى جۇيەلەپ قاعازعا ءتۇسىرىپ كوردىم. سوسىن "نەگە وسى تاقىرىپتى باق بەتىنە بەرىپ، كوپشىلىك تالقىسىنا سالماسقا؟"- دەگەن وي كەلدى.

جۇيەلى (سەتەۆوي) ماركەتينگ - قالاي دەسەڭ دە كۇش الىپ كەلە جاتقان، ەرتە مە، كەش پە، كوبىمىزگە ءبىر سوقپاي وتپەيتىن قۇبىلىس. سوندىقتان ول تۋرالى ارقايسىمىزدا ءبىر پوزيتسيا بولۋى قاجەت دەپ سانايمىن. بىردەن ايتايىن: جوعارىداعى ۇسىنىستارعا مەنىڭ جاۋابىم - «جوق» دەگەن جالعىز ءسوز. بىراق، بوتەن كىسى ەمەس، ءوز باۋىرىڭ ء(تىپتى بوتەن بولسا دا ايىرماسى قانشا؟! ولار ماعان بۇل ۇسىنىستى جاقسى نيەتپەن ايتتى دەپ ويلايمىن) بولعاسىن، بالتامەن كەسكەندەي دۇڭك ەتكىزبەي، بايىپپەن تۇسىندىرگەنگە نە جەتسىن؟! اتام قازاق «ايتىپ ءولتىر!» دەمەي مە؟ ودان بەرى سوڭعى كەزدەگى كۇرت قىمباتتاۋ ءبىراز جۇرتقا كادىمگىدەي ۇرەي الىپ كەلدى. "شايتان ادامدى كەدەيلىكپەن، كارىلىكپەن قورقىتادى", - دەيدى، وسى قورقىنىش حالىقتى جۇيەلى ماركەتينگپەن اينالىسۋعا ماجبۇرلەپ، ىقىلاستىڭ جاڭا ءبىر تولقىنىن اكەلمەي مە؟ سوندىقتان وسى تۋرالى وي بولىسكەندى ءجون كوردىم.
سونىمەن، مەن نەگە «جوق» دەدىم؟! ءتۇپتىڭ تۇبىندە بۇل جۇيە بايلىق اكەلەتىنىنە سەنبەگەندىكتەن بە؟ جوق، ولاي ەمەس. جۇيەلى ماركەتينگ وزىنە شىن بەرىلگەن كىسىنى كولدەنەڭنەن امان بولسا، باي قىلۋى ابدەن مۇمكىن. الايدا ءوزىم باسىن شالىپ كورگەن بىرنەشە جۇيەلى ماركەتينگ باستاپقى ساتىسىنان-اق مەنىڭ جان-دۇنيەمە جاقپادى. جۇرەگىم بۇل جۇيەنى قابىلداي المادى. كەيىنىرەك مەن جۇيەلى ماركەتينگتىڭ باستاپقى، بىراق ەڭ باستى «ارمانداۋ» دەگەن ساتىسىنان سۇرىنگەنىمدى ءتۇسىندىم.
«ارمانداۋ» ساتىسىندا بولاشاق تاۋەلسىز كاسىپكەر (جۇيەلى ماركەتينگپەن اينالىساتىندار وزدەرىن وسىلاي اتايدى) بۇكىل ارمانىن قاعاز بەتىنە ءتۇسىرۋى ءتيىس. بۇل ونشالىق قيىن شارۋا ەمەس سەكىلدى. بىراق قاعاز بەتىنە ء"ۇي", "ماشينا", "ساۋلىق" سىندى ستاندارت سوزدەردى تىزە بەرە، ماڭدايعا ۇرعانداي كىلت توقتادىم! بۇلار شىنىمەن «ارمان» با؟ ەگەر «ارمان» بولسا، قولىما قونعاندا مەنى باقىتتى قىلۋى شارت ەمەس پە؟ كەلەشەكتە مەن كوك تىرەگەن كوتتەدجى، كەرىم كولىگى بار، قول-اياعى بالعاداي، بەتى نارتتاي، جاراۋ اتتاي جىگىت بولسام - بۇل كۇي ماعان باقىت سەزىمىن سىيلاي ما؟ باسقاشا ايتقاندا، جانىم تىنىش بولا ما؟ ءاي، قايدام! بۇدان جان تىنىشتالاتىن بولسا، كوتتەدجدەرىنەن كوشە، كولىكتەرىنەن تىعىن تۇرعىزۋعا بولاتىندار باقىتتى بولار ەدى. بىراق جانى جاي تاپقان باي كورگەنىم جوق.
باسقاسى باسقا، وسى جاسىما دەيىن ءوز باسىمدا - "جىلدان-جىلدان كەمىپ بارا جاتقان كوزىمدى ەمدەتسەم، قالادا جەكە ءۇيىم جانە سۋ جاعاسىندا ساياجايىم بولسا" دەگەن "ارماندارىم" بولدى. قازىر، قۇدايعا شۇكىر، وپەراتسيادان كەيىن كوزىم قالپىنا كەلىپ، كوشەدە كوزىلدىرىكسىز كوسىلتىپ كولىك ايداپ ءجۇرمىن. قاسىم جىرعا قوسقان شاعاننىڭ جاعاسىندا اناۋ-مىناۋ ەمەس، 12 سوتىق جەكەمەنشىك ساياجايىم، قالادا سايالايتىن ءۇيىم بار. شىنىمدى ايتسام، وسى ايتقاندارىما قول جەتكىزگەن ساتتە قۋانىش سەزىمىن باستان كەشىرگەنىممەن، ول شىركىندەر "مەن باقىتتىمىن" دەپ ايتقىزارلىقتاي جۇرەك جارارلىق بولا العان جوق.
ال جۇيەلى ماركەتينگتىڭ سوڭىنا تۇسكەن "تاۋەلسىز كاسىپكەر" ماتەريالدىق نارسەنى ارمان قىلا الماسا، "جۇيەلى ماركەتينگتىڭ ۇمبەتى" سانالمايدى. ويتكەنى جۇرەگىنە مىقتاپ ورنىققان سول ارمان عانا ونى قۋ دۇنيەنىڭ سوڭىنان تىنىمسىز سۇيرەمەك. باسقاشا ايتقاندا، ماتەري "ارمان" - ەش كەدەرگىگە قاراماستان تىنىمسىز العا تارتاتىن پاروۆوز-لوكوموتيۆ. بۇكىل كۇشىمدى جۇيەلى ماركەتينگكە ارناماي، وسى ماقالانى جازىپ وتىرۋىما سەبەپ - مەندە اۋەل باستان الگى "پاروۆوز" بولماعان ەكەن...
جۇيەلى ماركەتينگ - وتباسىلىق بيزنەس. بۇل ىستە تابىسقا تولىق جەتۋ ءۇشىن جۇبايىڭ دا بەلسەنە اتسالىسۋى شارت. ياعني، وتباسىنىڭ ءار مۇشەسى - بەلسەندى "بىرلىك". سول سەبەپتى، ول "بىرلىكتەردىڭ" سالعىرت بولۋى قۇپتالىنبايدى. مىسالى، "تاۋەلسىز كاسىپكەر" ايەل ادام اياعى اۋىرلاپ، بالا تاپسا - بۇل ونىڭ "كاسىبى" - جۇيەلى ماركەتينگ ءۇشىن كادىمگىدەي قاۋىپ! ءيا، ول ەندى بالاعا الاڭداپ، بۇرىنعىداي ىسكەر بولا المايدى. سوندىقتان ءارتۇرلى قۇيتۇرقى ءادىس-ءتاسىلدىڭ كومەگىمەن بالا تابۋدى كەيىنگە قالدىرۋ، سانىن شەكتەۋ - "تاۋەلسىز كاسىپكەرلەر" اراسىندا ءجيى كەزدەسەتىن قۇبىلىس. جۇيەلى ماركەتينگ ءبىزدىڭ قوعامدا كەڭ جايىلىپ كەلە جاتقاندىقتان، بۇل فاكتور - مەملەكەتتىڭ دەموگرافيا ساياساتىنا، تۇپتەپ كەلگەندە ۇلتتىق قاۋىپسىزدىگىمىزگە قاۋىپ توندىرەدى دەسەم، اسىرا سىلتەي قويماسپىن.
جۇيەلى ماركەتينگ ءبىزدىڭ قوعامعا قادام باسقالى ون شاقتى جىل بولىپ قالدى. ۋاقىت وتكەن سايىن ولاردىڭ تابيعاتى تۇرلەنىپ، زامانىنا قاراي يكەمدەلىپ وتىرعانىن بايقايمىز. العاشقىدا بۇل "جولعا" نەگىزىنەن جاستار تارتىلسا، قازىر ەگدە ادامدارمەن دە بەلسەندى جۇمىس ىستەلە باستادى. ەگدە ادامدار جۇيەلى ماركەتينگتىڭ ارنايى تۇرلەرىنە، اسىرەسە "زەينەتاقى جيناقتاۋ" دەگەنىنە جيىرەك تارتىلۋدا. بۇل جۇيە بويىنشا ادام كەمىندە 10-15 جىل ارنايى ەسەپشوتقا بەلگىلى ءبىر سوما سالىپ وتىرۋى ءتيىس. ول قارجى جىلدار وتكەسىن ەسەلەپ كوبەيىپ، يەسىنە زەينەتاقى تۇرىندە قايتىپ كەلەدى-ءمىس.
جاقىندا بۇرىن مەكتەپ ديرەكتورى بولعان، ورتاسىنا قۇرمەتى بار زەينەتكەر جەڭگەم كەزدەسۋگە شاقىردى. ول الگى "بيزنەسپەن" اينالىسىپ ءجۇر ەكەن. سويلەسە كەلە ۇققانىم، بالا-شاعاسى بار، باي بولماعانىمەن باقۋاتتى، ءالى دە تىڭ، قۋاتتى ء(تىفا-ءتىفا، ءتىل-كوزدەن ساقتاسىن) جەڭگەمىز ماعان جۇيەلى ماركەتينگپەن اينالىسۋعا ۇسىنىس جاساپ وتىر. ءبىر قاراعاندا ءبارى جاقسى سەكىلدى. ۇلكەن كىسى جاسى ۇلعايعانىنا قاراماستان ەشكىمنەن قايىر-ساداقا، قارىز-كومەك سۇراماي قوسىمشا تابىس تابۋدا. بىراق وسىنداي جاندار ۇلگى تۇتىلىپ، قۇبىلىسقا اينالسا، قوعامنىڭ تابيعي دامۋىنا كەرى اسەر تيگىزبەي مە؟ ايتايىن دەگەنىم - قاي زاماندا دا جاسى ۇلعايعان جان بويىنا تاجىريبە، ءبىلىم، دانالىق جيناقتاپ، سول بايلىعىن كەلەسى بۋىنعا بەرەتىن، ءبىر سوزبەن ايتقاندا تاربيەمەن اينالىساتىن ەدى. مىسالى، اجە مەن ەنە جاس كەلىندى باۋليدى، نەمەرەسىن باعادى، ەرتەگى ايتادى، دومبىرا ۇيرەتەدى دەگەندەي. ەگەر قوعامنىڭ قازىناسى بولۋى ءتيىس قارتتار ءوزىنىڭ نەگىزگى ميسسياسىن، پارىزىن وتەمەي، تانىس-تامىرىن ارالاپ، "بيزنەس-پلان" وقىپ جۇرسە، ءبىر-ەكى ۇرپاقتان كەيىن ماڭگۇرتكە اينالىپ شىعا كەلمەيمىز بە؟
مەن "بالەن جىلدان كەيىن تۇگەن پەنسيا الىپ وتىراسىڭ" دەگەن جەڭگەمىزدى توقتاتىپ، قارسى سۇراق قويدىم. "ەگەر 5-10 بالا ءوسىرىپ، دۇرىس تاربيە بەرسەم، ولار مەنى اسىراماي ما؟ وسىدان ارتىق ماعان قانداي زەينەتاقى كەرەك؟" - دەگەنىمدە، ول كىسى قارسى ءۋاج ايتا الماي قالدى.
ەگەر مەن وزىمە زەينەتاقى تابام دەپ كۇنى بويى الاشاپقىن جۇرەتىن بولسام، بالا تاربيەسىنە ۋاقىتىم قالمايدى، نەمەسە كەم بولىنەدى. سول كەمدىك كەيىن الدىمنان شىقسا (قۇداي ساقتاسىن), بۇل زەينەتاقىدان نە نە قايىر؟! قاي قازاق باياعىدا "مىنە، مال جىيىپ جاتىرمىن، قارتايعاندا مەنىڭ مەدەت، ءۇمىت، كەپىلىم - وسى" دەپتى؟! الدە "ويباي، ون بالا تاپساق وتارعا ۋاقىت از قالادى، - دەپ زارلاعان با ەكەن؟! كوپ بالاسىنا كەزەك قوناق بولىپ، ولاردى وڭدى-سولدى جۇمساپ، قۇرمەت-سىيعا بولەنىپ جۇرگەن بي كەمپىر-شالدى ءالى دە بولسا كورىپ ءجۇرمىز. ماركەتينگپەن اينالىسىپ تاپقان زەينەتاقىڭدى قارتتارعا ارنالعان پانسيوناتقا (شەتەلدە بۇل پالە كوپ), نە اۋىزىڭا ەشقانداي مەيىرىمسىز، اقشاڭ ءۇشىن عانا سۋ تامىزاتىن جالدامالىعا بەرگەنشە، كەزىندە بالا-شاعا مەن قوناعىڭنىڭ اۋىزىنان جىرماي جۇمساپ، ۋاقىت جەتىپ، ءدام-تۇز بىتكەندە اعايىن ىشىندە، ارۋلانىپ جان بەرگەن الدەقايدا ارتىق ەمەس پە؟!
جۇيەلى ماركەتينگتە اينالىپ جۇرگەن دۇنيەنىڭ بارلىعى - شەت ەلدىكى. وسى "بيزنەسپەن" اينالىساتىن "تاۋەلسىز كاسىپكەرگە" قويىلاتىن تالاپتىڭ ءبىرى - تەك ءوزى ناسيحاتتايتىن كومپانيانىڭ تاۋارىن پايدالانۋى مىندەتتى. سونىمەن بىرگە ول ءوزى ساتىپ جۇرگەن دۇنيەنى، مىسالى، ءتىس سىقپاسىن جاقىن-جۋىق، تۋما-تۋىسقان، كورشى-كولەم، تامىر-تانىس، جۇمىستاس-جولداستارىنا تاراتۋعا جانىن سالادى. شىنىن ايتۋ كەرەك، بۇل تاۋارلار ساپالى. بىراق، باعاسى ون ەسە قىمبات! ەسەپتەسەك، ون ەسە ساپالى دەپ ايتا المايسىڭ.
ءبىر بايقاعانىم - جۇيەلى ماركەتينگ ارقىلى تارالاتىن تاۋار ساۋداسىنان وتاندىق قازىناعا ەشتەڭە تۇسپەيدى. بۇل تاۋاردىڭ بارلىعى باسقا ەلدەردە وندىرىلگەن. جۇمىس كۇشى شەت ەلدەن تارتىلادى، سالىق تا سوندا قالادى. ەندەشە "تاۋەلسىز كاسىپكەردىڭ" قاجىر-قايراتى، ءادىس-ءتاسىلى (مىسالى دەمپينگ) ناتيجەسىندە وتاندىق تاۋار ىعىستىرىلىپ جاتسا، بۇل ەكونوميكالىق قاۋىپسىزدىگىمىزگە نۇقسان كەلتىرمەي مە؟
مەنى قاتتى الاڭداتاتىن ءبىر نارسە، وسى "بيزنەستىڭ" سوڭىنا ءبىرجولا ءتۇسىپ، العاشقى ناتيجەگە قول جەتكىزە باستاعان جاندار - قاتارداعى قاراپايىم، تەگىن ادامدار ەمەس! ولار - وتە ىسكەر، العىر، ويى ۇشقىر، كوپشىلىكپەن ءتىل تابىسقىش، اقىلدى جاندار ەكەنىندە ءسوز جوق! بۇلاردىڭ جۇرت قىزىعار ماماندىعى، قالتاسىندا بىرنەشە ديپلومى بولۋى دا مۇمكىن. مىسالى، ءوزىم بىلەتىن ءبىر ادام جالاقىسى وتە جوعارى مۇناي سالاسىندا لاۋازىمدى قىزمەتتە جۇمىس ىستەيتىن. ماركەتينگتىڭ ءدامىن العان سوڭ مەملەكەت قىزمەتىنىڭ ءبارىن جىلى جاۋىپ قويدى. ەندى ونىڭ بۇكىل قابىلەت-قارىمى جەكە باسىنا، سوسىن ءتۇپ-تامىرى شەتەلدە جاتقان ماركەتينگتىك جۇيەگە قىزمەت ەتۋدە!
مەن بىلەتىن جۇيەلى ماركەتينگتىڭ بارلىعى دا قازاقستان رەسپۋبليكاسىندا زاڭسىز قىزمەت جاسايدى. ولار ءبىزدىڭ ەلدە تىركەلمەگەن. جۇيەلى ماركەتينگپەن اينالىساتىنداردىڭ رەسەيدە نەمەسە باسقا شەت ەلدەردە تىركەلەتىن سەبەبى سوندىقتان.
جۇيەلى ماركەتينگكە جاڭا ادام تارتقان كەزدە بۇل كومپانيانىڭ ۇزاق، الدەنەشە ونداعان جىل بويى جۇمىس ىستەپ كەلە جاتقانى، سەنىمدىلىگى، سونداي-اق بەرىلە اينالىسقان جاعدايدا كوپ تابىس، مول جەمىس بولاتىنى باسا ايتىلادى. دەگەنمەن، قانشالىق سەنىمدى كومپانيا بولسا دا، بارلىق قاۋىپتەن ساقتاندىرىلسا دا، ەشكىم ونىڭ كۇنى ەرتەڭ بانكروت بولىپ كەتپەيتىنىنە كەپىلدىك بەرە المايدى. تارىيح ساحناسىنان كومپانيا تۇرماق، تۇتاس ەل، يمپەريالار جوق بولعانى ءمالىم. وسىدان جيىرما جىل بۇرىن كىم كەڭەس ەلى تاراپ كەتەدى دەپ ويلادى؟! نەمەسە جۇيەلى ماركەتينگپەن اينالىسۋعا تىيىم سالىنبايتىنىنا كىم كەپىل؟ سوندىقتان بۇكىل ءۇمىتىن، بولاشاعىن ءبىر كومپانياعا بايلاۋ قاجەت پە؟
ادەتتە جۇيەلى ماركەتينگپەن اينالىسقان ادام ەرىكسىز وسى كومپانيا ورنالاسقان شەتەلدىڭ تىلەۋلەسىنە اينالادى. ەگەر الدا-جالدا سول ەلمەن ءبىر جانجال، سوعىس (ونىڭ بەتىن اۋلاق قىلسىن دەگەنمەن دە) بولا قالسا، "تاۋەلسىز كاسىپكەردىڭ" بۇيرەگى كىمگە بۇراتىنى بەلگىسىز. ماتەري قۇندىلىق قاعبا بولعان زامانىندا قۋ دۇنيە وزىنە تارتىپ كەتپەي مە؟ بۇل دا ءبىر ويلاناتىن نارسە.
كادىمگى قىزمەتكەر، كاسىپكەر ءوز ىسىمەن نەگىزىنەن جۇمىس ۋاقىتىندا اينالىسسا، "تاۋەلسىز كاسىپكەر" ءۇشىن مۇنداي ۇعىم جوق. ونىڭ جۇمىس ۋاقىتى - تاۋلىك بويى. اسىرەسە، بيزنەسىنىڭ ءدامىن الا باستاعان سوڭ ول وزىنە دە، وزگەگە دە تىنىم بەرۋدى قويادى. كەز-كەلگەن كىسىدەن پوتەنتسيالدى پايدا كوزىن كورەدى. تانىسقان ءاربىر ادامىمەن سۇحباتتى جۇيەلى ماركەتينگ تاقىرىبىنا بۇرادى. وتىرسا-تۇرسا جۇرەگىندە ءبىر ماقسات - "بيزنەسىن" ورىستەتۋ تۇرادى.
جۇيەلى ماركەتينگتىڭ ەكىنشى ساتىسى - "تاۋەلسىز كاسىپكەر" بۇكىل تانىسىنىڭ ءتىزىمىن قاعازعا ءتىزىپ شىعادى. بۇل تىزىمدە ەشقانداي شەك بولماۋى ءتيىس. ياعني "تاۋەلسىز كاسىپكەر" ءۇشىن اعايىن-تۋما، ناعاشى-جيەن، قۇدا-جەكجات، بالدىز-جەزدە، دوس-جۇمىستاس دەگەن جوق، ولاردىڭ ءبارى - نىسانا، ىقتيمال تۇتىنۋشى، بيزنەس سۋبەكتىسى. "تاۋەلسىز كاسىپكەر" ءاربىر ءساتتى (كەزدەسۋ، قوناقتىق، ساپار، ت.س.س) ءوز بيزنەسىنە تارتۋعا، نە تاۋارىن وتكىزۋگە پايدالانىپ قالۋعا تىرىسادى. سوندىقتان شەتەلدە قاقپاعا "ساقتاندىرۋ اگەنتتەرىنە، ساداقا سۇراۋشىلارعا، جۇيەلى ماركەتينگ وكىلدەرىنە كىرۋگە بولمايدى، " - دەپ جازىلىپ قويىلاتىن كورىنەدى. "تاۋەلسىز كاسىپكەردەن" سوعىس كەزىندە پوشتاشىنى كورگەندەي قاشقاقتاپ تۇراتىندار قازىر بىزدە دە كوبەيدى.
جۇيەلى ماركەتينگ الەمىندە وتە ۇلكەن قارجى اينالىپ ءجۇر. بۇل جەردە اقشا عانا ەمەس، ۇلكەن ساياسات تا بار. جۇيەلى ماركەتينگ ومىرىنە بويلاپ كىرگەن ادام ادەتتە كوسموپوليت، توعىشار، رۋحاني دۇنيەسى شەكتەۋلى، ۇلتتىق كەلبەتى جوق، وتانشىلدىعى كەم، باتىسشىل بولىپ، جامان ماعىناسىنداعى "عالام ازاماتىنا" ("گراجدانين ميرا") اينالادى. ازاماتتارى جارتىلاي زومبي، روبوت، ماڭگۇرتكە اينالعان ەلدى جاۋلاۋ دا، جاۋلاماي-اق باعىندىرىپ، دەگەنىن ىستەپ وتىرۋ دا قيىن ەمەس.
جۇيەلى ماركەتينگپەن اينالىساتىنداردىڭ جان-دۇنيەسى، ءجۇرىس-تۇرىسى، مىنەز-قۇلقى، تالعامى بىرتە-بىرتە ءبىر-بىرىنە قاتتى ۇقساي باستايدى. ارينە، بۇل زاڭدى پروتسەسس. ويتكەنى جوعارىدا ايتىلعان "ارمان" جانە تانىستار ءتىزىمىن تولتىرۋ ساتىسىنان وتكەندەرگە مىندەتتى تۇردە وقۋ، تىڭداۋ، كورۋ ءۇشىن كىتاپ-كاسسەتالار ۇسىنىلىپ، ونىڭ ورىندالۋى تەكسەرىلەدى. بۇل ماتەريالدار - تەگىن دۇنيە ەمەس، سايىپ كەلگەندە بايلىققا قۇشتارلىقتى ارتتىراتىن، وسى جولعا تاباندىلىققا ۇيرەتەتىن، قاجەت بولعان جاعدايدا ءتۇرلى قۇرباندىقتارعا باۋلىيتىن ءبىرتۇتاس جۇيە. بۇل جۇيەنىڭ ىشىندە ۇلتتىق ادەبيەتكە ورىن جوقتىڭ قاسى. جۇيەلى ماركەتينگ ساربازدارى وزدەرىن "تاۋەلسىز كاسىپكەر" اتاعانىمەن، شىندىعىندا ولار - تاۋەلدى، جاي عانا تاۋەلدى ەمەس، قۋ دۇنيەنىڭ قۇلى!
جۇيەلى ماركەتينگتە بەلگىلى ءبىر تابىسقا، دارەجەگە جەتۋ ءۇشىن 7 جىلداي ۋاقىت كەرەك كورىنەدى. ياعني جەتى جىل بويى جانۇياعا كوڭىل بولمەۋ، بۇكىل اڭگىمە، سۇحبات، تىرلىكتىڭ ءبىر باعىتتا بولۋى، ترەنينگ (ارنايى ادەبيەت، كىتاپ، كاسسەت، سەمينار، ۇستاز...) ءىز-ءتۇزسىز كەتپەيدى. ءسىز مۇلدەم باسقا ادامعا اينالاسىز، ءسىز - بايسىز، بىراق باسقا ادامسىز. مەنىڭشە، بۇل - تىم ۇلكەن قۇرباندىق.

ولجا ارىس،
ورال قالاسى

«ءۇش قيان» گازەتى