"يران پرەزيدەنتتى روۋحانيعا: بۇدان بىلاي قۇراما شتاتتارعا دوق كورسەتۋشى بولما، ايپەسە وپىق جەيسىز. ءبىز ەندى سەندەردىڭ زورلىق پەن ءولىم تۋرالى قورقىتۋ-ۇركىتۋلەرىڭە ءتوزىپ وتىرا بەرەتىن ەل ەمەسپىز. اباي بول!" – دەپ جازدى امەريكالىق پرەزيدەنت.

ءبىر كۇن بۇرىن يران جەتەكشىسى حاسان روۋحاني يرانمەن جانجالدىڭ ارتى جاقسىلىققا اپارمايتىنىن اقش-قا ەسكەرتكەن. "يرانمەن دوس بولۋ - بەيبىتشىلىكتى ساقتاۋ، يرانمەن سوعىسۋ - سوعىستىڭ سازايىن تارتۋ ەكەنىن امەريكا ءتۇسىنۋى كەرەك. ترامپ مىرزا، ارىستاننىڭ قۇيرىعىن باسپاڭىز. وكىنىپ قالاسىز" - دەپ مالىمدەدى روۋحاني. پرەزيدەنتتىڭ يراندىق ديپلوماتتارمەن كەزدەسۋدە ايتقان بۇل سوزدەرىن مەملەكەتتىك IRNA جاڭالىقتار اگەنتتىگى تاراتتى.

ترامپ مالىمدەمەسىنەن بىرنەشە ساعات بۇرىن مەملەكەتتىك حاتشى مايك پومپەو يراننىڭ رۋحاني كوسەمى اياتوللا ءالي حامەنە مەن باسقا دا ءدىن قىزمەتكەرلەرىن "ەكىجۇزدى" دەپ اتاپ، يراننىڭ بيلىك قۇرىلىمدارىن "مافياعا" بالاعان.

تەگەران مەن ۆاشينگتون اراسى 2017 جىلى اقش پرەزيدەنتى قىزمەتىنە دونالد ترامپ كەلگەن سوڭ ۋشىعىپ كەتتى. سول جىلى كوكتەمدە اقش يراننىڭ يادرولىق باعدارلاماسى جونىندەگى بىرلەسكەن جوسپاردان شىعىپ، وعان قاتىستى سانكتسيالارىن كەڭەيتتى.

2015 جىلى ۇلىبريتانيا، گەرمانيا، قىتاي، رەسەي، فرانتسيا جانە اقش باسشىلارىنىڭ يرانمەن جاساسقان كەلىسىمىندە تەگەراننىڭ يادرولىق باعدارلاماسىنان باس تارتۋى، اقش پەن ەۋرووداقتىڭ يرانعا سالعان سانكتسيالارىن الىپ تاستاۋى قاراستىرىلعان.

Abai.kz