قر ىشكى ىستەر ءمينيسترىنىڭ ورىنباسارى يۋري يلين قىرعىزستاندا تاۋدان قۇلاعان تاس كوشكىنىنەن زارداپ شەككەندەر قازاقستاننىڭ قاي وڭىرلەرىنەن ەكەنىن ايتىپ بەردى، دەپ حابارلايدى قازاقپارات.

«قازا بولعان ازامات الماتى تۇرعىنى»، - دەپ ناقتىلادى ءمينيستردىڭ ورىنباسارى.

ونىڭ سوزىنە قاراعاندا، زارداپ شەككەن تاعى ەكى ادام دا الماتىدان بولسا، ءۇشىنشىسى وسكەمەن قالاسىنىڭ تۇرعىنى.

«ولاردىڭ بارلىعى ەر ازاماتتار. زارداپ شەككەندەردىڭ دەنساۋلىقتارى كەلگەن بويدا الماتى اۋەجايىندا تەكسەرىلدى. سودان كەيىن ولار الماتىنىڭ مەديتسينالىق بولىمشەلەرىنە تاپسىرىلدى. دارىگەرلەردىڭ حابارلاۋىنشا، بۇل ادامداردى اۋرۋحاناعا جاتقىزۋ قاجەتتىگى بولماعان»، - دەدى قر ىشكى ىستەر ءمينيسترىنىڭ ورىنباسارى يۋري يلين.

«ول (قازا بولعان ازامات) 1976 جىلى تۋعان. الماتىداعى عىلىمي-زەرتتەۋ ينستيتۋتتارىنىڭ بىرىندە جۇمىس ىستەگەن. قازىر ونىڭ دەنەسى الماتىعا جەتكىزىلدى»، - دەدى يۋ. يلين.

ەسكە سالايىق، 30 شىلدەدە قىرعىزستان اۋماعىندا بىشكەك قالاسىنان 40 شاقىرىم قاشىقتىقتا سكريابين مۇزدىعى اۋدانىندا ءبىر توپ تۋريستەر تاس كوشكىنىنە تاپ بولعان ەدى. زارداپ شەگۋشىلەردىڭ اراسىندا ءتورت قازاقستان ازاماتى بار. قر سىرتقى ىستەر مينيسترلىگى ءبىر قازاقستاندىقتىڭ مەرت بولعانىن راستادى.

Abai.kz