قازاقستان مۇسىلماندارى ءدىني باسقارماسى 2018 جىلى قۇربان ايت مەرەكەسى تامىز ايىنىڭ 21-ءى كۇنى باستالاتىنىن حابارلايدى.

بيىل مۇسىلمان كۇنتىزبەسى بويىنشا ءزۇل-حيدجا ايىنىڭ ءبىرىنشى كۇنى تامىزدىڭ 12-نە، ال، اراپا كۇنى 20 تامىزعا سايكەس كەلەدى.

اراپا – قاجىلار ارافا جوتاسىندا قۇلشىلىق ەتەتىن كۇن. قاجىلىققا بارماعان مۇسىلماندار ءۇشىن اراپا كۇنى اۋىز بەكىتۋ – مۇستاحاب (جاعىمدى) امال.

ءابۋ قاتادان جەتكەن حاديستە: «اراپا كۇنىنىڭ ورازاسى وتكەن جانە كەلەر جىلداردىڭ كۇنالارىنا كافارات (كەشىرىم) بولادى...» دەلىنگەن.

جاعدايى بار، ءəرى جولاۋشى ەمەس مۇسىلمانعا قۇرباندىق شالۋ – ءۋəجىپ، مۇسىلماندىق مىندەت.

قۇرباندىققا تۇيە، سيىر جəنە قوي (ەشكى دە) شالىنادى. ءبىر قوشقار نەمەسە قوي ءبىر كىسى اتىنان شالىنادى. ال قارا مال نەمەسە تۇيەنى جەتى كىسى بىرىگىپ، قۇرباندىققا شالۋعا بولادى. قۇرباندىق مالىن ايت نامازىنان كەيىن ايتتىڭ ءۇشىنشى كۇنى كۇن باتقانعا دەيىن شالۋعا بولادى.

قۇرباندىق ەتىن ۇشكە ءبولىپ تاراتۋعا بولادى. ءبىر بولىگى وزىنە قالادى، ەكىنشى بولىگى اعايىن-تۋىس، كورشىلەرگە بەرىلەدى، ءۇشىنشى بولىگى كومەككە مۇقتاج كىسىلەرگە تاراتىلادى.

Abai.kz