شىۇ-عا مۇشە مەملەكەتتەرىنىڭ «بەيبىت ميسسيا» بىرلەسكەن لاڭكەستىككە قارسى كوماندالىق-شتابتىق وقۋ-جاتتىعۋىنا دايىندالۋ شەڭبەرىندە قىتاي ۇلت ازاتتىق اسكەرىنىڭ بولىمشەلەرى قر اۋماعى ارقىلى تەمىرجول ەشەلونىمەن رەسەي فەدەراتسياسى، چەليابى وبلىسىنىڭ شۇباركول پوليگونىنا قوزعالۋدى جۇزەگە اسىرۋدا.

ءجۇرۋ باعىتى دوستىق-اقتوعاي-اياگوز-اۋىل-لوكوت مارشرۋتى، ءارى قاراي رەسەي فەدەراتسياسىنىڭ اۋماعى ارقىلى وتەدى. قحر-دىڭ ەشەلوندارىنا قازاقستان رەسپۋبليكاسىنىڭ بۇكىل اۋماعىندا «شىعىس» وڭىرلىك قولباسشىلىعىنىڭ قاراۋىلى ەرىپ جۇرەدى.

بۇدان بۇرىن حابارلانعانداي، «بەيبىت ميسسيا» وقۋ-جاتتىعۋىنا شىۇ ءۇندىستان، قازاقستان، قىرعىزستان، قىتاي، پاكىستان، رەسەي، تاجىكستان جانە وزبەكستان مەملەكەتتەرى قارۋلى كۇشتەرىنىڭ 3 مىڭنان اسا اسكەري قىزمەتشىسى جانە 500-دەن اسا بىرلىك قارۋ-جاراق پەن اسكەري تەحنيكا تارتىلدى. وقۋ-جاتتىعۋدىڭ نيەتىنە سايكەس لاڭكەستەردىڭ بيلىكتى نەمەسە مەملەكەتتەردىڭ ءبىرىنىڭ اۋماق بولىگىن باسىپ الۋى جاعدايىندا قاتىسۋشى ەلدەر قارۋلى كۇشتەرىنىڭ بىرلەسكەن ءىس-قيمىلدارىن پىسىقتاۋ قاراستىرىلعان.

قر قارۋلى كۇشتەرىنىڭ ەشەلوندارىن ا.ج. 18 تامىزدا وقۋ-جاتتىعۋدىڭ وتكىزىلۋ ورنىنا جىبەرۋ جوسپارلانۋدا.

Abai.kz