مەملەكەت باسشىسى «قازترانسويل» كومپانياسى «بەس الەۋمەتتىك باستامانى» جۇزەگە اسىرۋ بارىسىندا اتىراۋ مەملەكەتتىك ۋنيۆەرسيتەتىنە سىيعا تارتقان جاڭا ستۋدەنتتەر ءۇيىنىڭ عيماراتىمەن تانىستى، - دەپ حابارلايدى اباي-اقپارات اقوردانىڭ رەسمي سايتىنا سىلتەمە جاساپ.

جاتاقحانادا تۇراتىن ستۋدەنتتەرمەن اڭگىمەلەسۋ كەزىندە ەلباسى قازاق حالقىنىڭ ۇلكەندى قۇرمەتتەۋگە، كىشىگە قامقور بولۋعا، سونداي-اق وتانىڭدى سۇيۋگە نەگىزدەلگەن سالت-ءداستۇرىن ۇستانۋدىڭ ماڭىزدىلىعىن ايتتى.

ۋنيۆەرسيتەت ستۋدەنتتەرى «بەس الەۋمەتتىك باستاما» اياسىنداعى جوبالاردىڭ جۇزەگە اسىرىلعانى جانە ستۋدەنت جاستارعا ءاردايىم قولداۋ كورسەتىلىپ كەلە جاتقانى ءۇشىن نۇرسۇلتان نازارباەۆقا العىس ايتتى.

سونىمەن قاتار، قازاقستان پرەزيدەنتىنە «رۋحاني جاڭعىرۋ» باعدارلاماسى مەن «بەس الەۋمەتتىك باستامانىڭ» وبلىستاعى ىسكە اسىرىلۋ بارىسى جونىندە مالىمدەلدى.

– «قازاق تىلىندەگى 100 جاڭا وقۋلىق» جوباسىن ىسكە اسىرۋ بارىسىندا وبلىستىڭ 18 وقۋ ورنى 6 مىڭنان استام وقۋلىقپەن قامتاماسىز ەتىلدى. «تۋعان جەر» ارنايى جوباسى اياسىندا جەرگىلىكتى مەتسەناتتاردىڭ قولداۋىمەن جالپى قۇنى 9 ميلليارد تەڭگە بولاتىن 46 جوبا جۇزەگە اسىرىلدى. سونىمەن قاتار، ءوڭىردىڭ شىعارماشىلىق ۇجىمدارى قازاقتىڭ مادەنيەتى مەن ونەرىن تانىتۋ ماقساتىمەن الەمنىڭ 12 ەلىنىڭ ساحناسىندا ونەر كورسەتتى. ايماق كاسىپكەرلەرىنىڭ قارجىسىنا تۇركيا استاناسى – انكارانىڭ ورتالىعىنداعى دينا نۇرپەيىسوۆا اتىنداعى الاڭدا ايگىلى كۇيشىنىڭ ءبيۋستى ورناتىلاتىن بولادى، – دەدى اتىراۋ وبلىسىنىڭ اكىمى ن.نوعاەۆ.

Abai.kz