نۇرسۇلتان نازارباەۆ قىرعىز رەسپۋبليكاسىنىڭ پرەزيدەنتى سوورونباي جەەنبەكوۆتىڭ شاقىرۋىمەن شولپان-اتا قالاسىندا وتكەن ءىىى دۇنيەجۇزىلىك كوشپەندىلەر ويىندارىنىڭ اشىلۋ راسىمىنە قاتىستى، - دەپ حابارلايدى اباي-اقپارات اقوردانىڭ سايتىنا سىلتەمە جاساپ.

سالتاناتتى ءىس-شاراعا تۇركيا رەسپۋبليكاسىنىڭ پرەزيدەنتى رەجەپ تايپ ەردوعان، تاتارستان رەسپۋبليكاسىنىڭ پرەزيدەنتى رۋستام ميننيحانوۆ جانە ۆەنگريانىڭ پرەمەر-ءمينيسترى ۆيكتور وربان قاتىستى.

3D-گرافيكاسىن قولدانا وتىرىپ ۇسىنىلعان تەاترلاندىرىلعان قويىلىمعا مىڭنان استام اكتەر، مۋزىكانت، ءانشى، شاباندوز جانە سپورتشىلار قاتىستى. ولار تسيرك ونەرىن، شاباندوزدىق تاسىلدەرىن، وتتى شوۋ كورسەتىپ، اكروباتتىق جاتتىعۋلار ورىندادى.

بۇل ويىندار سپورتتىڭ 37 ءتۇرىن، سونىڭ ىشىندە قىرعىزدىڭ 16 ۇلتتىق جانە باسقا دا كوشپەندى حالىقتار سپورتىنىڭ 21 ءتۇرىن قامتيدى. اتاپ ايتقاندا، ءتۇرلى قاشىقتىقتاعى ات بايگەسىنىڭ 8, كۇرەستىڭ 13, ءداستۇرلى ساداق اتۋدىڭ 5 جانە زياتكەرلىك ويىننىڭ 3 تۇرىنەن سايىستار وتەدى. سونداي-اق، يت جۇگىرتىپ، قۇس سالاتىن ۇلتتىق اڭشىلىق ويىنداردان جارىس بولادى. ويىندارعا الەمنىڭ 60-تان استام ەلىنەن 2 مىڭعا جۋىق سپورتشى قاتىسادى.

Abai.kz