اقوردانىڭ رەسمي سايتىندا جازىلۋىنشا، ەلباسى نۇرسۇلتان نازارباەۆ قىرعىز رەسپۋبليكاسىنا ساپارى بارىسىندا اتالعان ەلدىڭ پرەزيدەنتى سوورونباي جەەنبەكوۆپەن كەزدەستى.

مەملەكەت باسشىسى نۇرسۇلتان نازارباەۆ سوورونباي جەەنبەكوۆتى قىرعىز رەسپۋبليكاسىنىڭ تاۋەلسىزدىگى كۇنىمەن قۇتتىقتاپ، باۋىرلاس حالىققا تىنىشتىق پەن تۇراقتىلىق جانە باق-بەرەكە تىلەدى.

– قازاق پەن قىرعىزدان جاقىن حالىق جوق. تاۋەلسىزدىكتىڭ العاشقى كۇندەرىنەن باستاپ مەن ءاردايىم قىرعىزستاندى قولداپ كەلەمىن، – دەدى قازاقستان پرەزيدەنتى.

مەملەكەت باسشىسى ەكى ەل اراسىندا جول كارتاسى قابىلدانىپ، ۇكىمەتارالىق كوميسسيا ءتيىمدى جۇمىس ىستەپ جاتقانىن ايتتى.

– ءسىز پرەزيدەنت بولىپ سايلانعاننان بەرى ءبىز ءجيى كەزدەسىپ، كوپتەگەن ماسەلەلەردى تالقىلادىق. ەكى جاقتى قارىم-قاتىناستار جاڭا دەڭگەيگە كوتەرىلۋدە. ساۋدا-ساتتىق كولەمى ارتىپ كەلەدى. بۇگىندە ەلدەرىمىز اراسىنداعى بارلىق پروبلەمالار، سونىڭ ىشىندە شەكارالىق ماسەلەلەر تولىق شەشىمىن تاپتى، – دەدى قازاقستان پرەزيدەنتى.

سوورونباي جەەنبەكوۆ شاقىرۋىن قابىل الىپ، شولپان-اتاعا كەلگەنى ءۇشىن نۇرسۇلتان نازارباەۆقا ريزاشىلىق ءبىلدىرىپ، ەكى ەل اراسىنداعى قاتىناستاردىڭ دوستىق سيپاتىن اتاپ ءوتتى.

مەملەكەتتەر باسشىلارى كەزدەسۋ سوڭىندا ەكى جاقتى ىنتىماقتاستىقتى ودان ءارى دامىتۋدىڭ پەرسپەكتيۆالارىن تالقىلاپ، وڭىرلىك جانە حالىقارالىق كۇن تارتىبىندەگى ماسەلەلەر جونىندە پىكىر الماستى.

Abai.kz