ازاتتىق ءتىلشىسىنىڭ سوتتان حابارلاۋىنشا، ورتەنگەن اۆتوبۋس سوتىنا وزبەكستاننان 11 ادام كەلگەن. سولاردىڭ ءبىرى – يۋلدۋزحان گانيەۆا رەسەيدى بەتكە العان اۆتوبۋستا ۇلى ادحام ماگرۋفجونوۆ پەن نەمەرەسى اۆازبەك ماگرۋفجونوۆتىڭ بولعانىن ايتادى. ەكەۋى دە قازا تاپقان.
سەرىك ماحامبەتوۆ سوتالدى تەرگەۋى مەملەكەتتىك تىلدە وتكەندىكتەن سوت پروتسەسىنىڭ دە قازاق تىلىندە جۇرگىزىلەتىنىن حابارلاعان. جابىرلەنۋشى تاراپ وزدەرىنىڭ قازاق جانە ورىس تىلدەرىن تۇسىنبەيتىندەرىن ايتىپ، وزبەك ءتىلىن بىلەتىن اۋدارماشى تالاپ ەتتى. وسىعان وراي سوتتا تۇسكە دەيىن ءۇزىلىس جاريالاندى.
اقتوبەدەگى سوتقا قازاقستاننىڭ وڭتۇستىگىنەن ايىپتالۋشىلاردىڭ تۋىستارى دا كەلگەن.
بۇل قىلمىستىق ءىس بويىنشا سوت الدىندا بەس ادام جاۋاپ بەرەدى. ونىڭ ۇشەۋى – اۆتوبۋس جۇرگىزۋشىسى، ەكەۋى – "ازيا ترانزيت سەرۆيس" فيرماسىنىڭ قۇرىلتايشىسى مەن مەحانيگى. اۆتوبۋس جۇرگىزۋشىلەرى – نۇرجان قىرعىزباەۆ، ماقسات پەرنەبەكوۆ پەن بارات تاڭاتوۆ 2018 جىلدىڭ 26 قاڭتارىنان بەرى اقتوبەدەگى تەرگەۋ يزولياتورىندا وتىر. ال "ازيا ترانزيت سەرۆيس" كومپانياسىنىڭ جەتەكشىسى مەن مەحانيگى كەپىل تولەپ، ەشقايدا شىقپاۋ تۋرالى قولحاتپەن بوساتىلعان.
تەرگەۋ دەرەگىنشە، فيرما قۇرىلتايشىسى "زاڭدى تۇلعا رەتىندە ءوز مىندەتتەرىن ءتيىستى تۇردە اتقارمادى، جارامسىز كولىك قۇرالىن پايدالانۋعا بەردى جانە قۇجاتتى قولدان جاسادى" دەپ ايىپتالعان. ال مەحانيككە "اقاۋى بار اۆتوبۋستى جولعا شىعاردى" دەگەن ايىپ تاعىلعان.
بيىل قاڭتاردىڭ 18-ءى كۇنى تاڭەرتەڭ اقتوبە وبلىسىنىڭ ىرعىز اۋدانى قالىباي اۋىلىنان 10 كيلومەتر قاشىقتا شىمكەنت - سامارا جولىندا جولاۋشىلار اۆتوبۋسى ورتەنگەن. بيلىك ورىندارىنىڭ حابارلاۋىنشا، اۆتوبۋستا بارلىعى 57 ادام بولعان، ولاردىڭ 52-ءسى قازاعا ۇشىراعان. قۇربان بولعانداردىڭ بارلىعى – وزبەكستان ازاماتتارى. ەكى جولاۋشى مەن ءۇش جۇرگىزۋشى امان قالعان.
Abai.kz
