قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ» اتتى وڭىرلىك كونفەرەنتسياعا قاتىستى، - دەپ حابارلايدى اباي-اقپارات اقوردانىڭ سايتىنا سىلتەمە جاساپ.

ءىس-شارا اۋعانستاندى الەۋمەتتىك-ەكونوميكالىق تۇرعىدان قالپىنا كەلتىرۋ، وڭىرلىك بەيبىتشىلىكتى، تۇراقتىلىق پەن قاۋىپسىزدىكتى نىعايتۋ ءۇشىن قازاقستاننىڭ ۇزاق مەرزىمگە ارنالعان جاردەمى اياسىندا ۇيىمداستىرىلدى.

اشىلۋ راسىمىندە ءسوز سويلەگەن گ.ابدىقالىقوۆا كونفەرەنتسياعا قاتىسۋشىلارعا ەلباسى ن.نازارباەۆتىڭ قۇتتىقتاۋىن وقىپ بەردى. وندا قازاقستاننىڭ اۋعانستاندا بەيبىتشىلىكتى تەزىرەك ورناتۋعا كومەكتەسۋدى جاقتايتىنى ايتىلعان، سونداي-اق ايەلدەردىڭ جاعدايىن جاقسارتۋ، گەندەرلىك تەڭدىكتى قامتاماسىز ەتۋ جانە بەيبىت ومىرگە قول جەتكىزۋ جولىنداعى اۋعان ۇكىمەتىنىڭ قادامدارى جوعارى باعالانعان.

گ.ابدىقالىقوۆا اۋعانستاندى ورتالىق ازيا ەلدەرىمەن ەكونوميكالىق بايلانىسقا تارتۋدىڭ ماڭىزدىلىعىن اتاپ ءوتتى. وسى ورايدا مەملەكەتتىك حاتشى اۋعانستانداعى جانە تۇتاس وڭىردەگى ناقتى ەكونوميكالىق جوبالاردى جۇزەگە اسىرۋ ماقساتىمەن حالىقارالىق بيزنەس وكىلدەرىنىڭ كەڭىنەن اتسالىسۋى ارقىلى ايەلدەر كاسىپكەرلىگىن دامىتۋدىڭ كەشەندى باعدارلاماسىن ازىرلەۋدى ۇسىندى. بۇل اۋعانستان ايەلدەرىنىڭ الەۋمەتتىك-ەكونوميكالىق مۇمكىندىكتەرىن كەڭەيتە تۇسەدى.

كونفەرەنتسيا قورىتىندىسى بويىنشا استانا دەكلاراتسياسى قابىلداندى. قۇجاتتا اۋعانستانداعى ايەلدەردىڭ قۇقىقتارى مەن مۇمكىندىكتەرىن كەڭەيتۋ جانە جالپى ورتالىق ازيا ەلدەرىندە نەگىزگى گەندەرلىك ءۇردىستى ىلگەرىلەتۋ ىسىندەگى وڭىرلىك ءوزارا ءىس-ارەكەتتىڭ باعىتتارى ايقىندالعان.

مەملەكەتتىك حاتشى كونفەرەنتسيا اياسىندا وزبەكستان رەسپۋبليكاسى پرەمەر-ءمينيسترىنىڭ ورىنباسارى – ايەلدەر كوميتەتىنىڭ ءتورايىمى ت.نارباەۆامەن، سونداي-اق اۋعانستان دەلەگاتسياسىنىڭ باسشىسى – اۋعانستان يسلام رەسپۋبليكاسىنىڭ ايەلدەر ىستەرى جونىندەگى ءمينيسترى د.نازاريمەن ەكى جاقتى كەزدەسۋلەر وتكىزدى. كەزدەسۋلەر بارىسىندا قازاقستاننىڭ وزبەكستانمەن، اۋعانستانمەن ىنتىماقتاستىعىنىڭ قازىرگى احۋالى جانە پەرسپەكتيۆالارى تالقىلاندى.

Abai.kz