پارلامەنت سەناتى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى اتىراۋدا ەلىمىزدەگى مەدياتسيا سالاسىن دامىتۋ ماسەلەلەرى بويىنشا كوشپەلى وتىرىس وتكىزدى.

كوميتەت ايماققا ساپاردىڭ العاشقى كۇنى «داۋلاسۋشىلىلىقتى تومەندەتۋدەگى مەدياتسيا ءراسىمىنىڭ ءرولى» تاقىرىبى بويىنشا سەناتتا 2017 جىلعى 25 قازاندا وتكەن دوڭگەلەك ۇستەلدىڭ ۇسىنىمدارىن ىسكە اسىرۋ ناتيجەلەرى تۋرالى كوشپەلى وتىرىس ءوتتى. سونداي-اق قازاقستان حالقى اسسامبلەياسىنىڭ، قازاقستان جوعارعى سوتىنىڭ، مەملەكەتتىك ورگاندار مەن قوعامدىق بىرلەستىكتەر وكىلدەرىنىڭ قاتىسۋىمەن جۇمىس بابىنداعى كەزدەسۋ بولدى.

كوميتەت توراعاسى گ.كيم كەزدەسۋدى اشا كەلىپ، قازاقستاننىڭ سوت تورەلىگى جۇيەسىندە مەدياتسيا ينستيتۋتىنىڭ ءرولىن اتاپ ءوتتى. نەگىزگى بايانداما جاساعان سەناتور ۆ.ۆولكوۆ ۇكىمەتتىڭ وسى سالاداعى جۇمىسى مەن مەدياتسيا راسiمدەرىن جۇزەگە اسىرۋ بارىسىن سىنعا الدى جانە ۋاكىلەتتى مەملەكەتتىك ورگانداردىڭ اراسىنداعى كۇش-جىگەردى ۇيلەستىرۋدىڭ جەتىمسىزدىگى تۋرالى ماسەلەلەر ايتىلدى.

قازاقستان حالقى اسسامبلەياسى توراعاسىنىڭ ورىنباسارى - قحا حاتشىلىعىنىڭ مەڭگەرۋشىسى ل. پروكوپەنكو، ەلىمىزدىڭ جوعارعى سوتىنىڭ سۋدياسى ۇ. سۇلەيمەنوۆا، ادىلەت ءمينيسترىنىڭ ورىنباسارى ە. ءازىموۆانىڭ جانە تاجىريبەلى مەدياتورلاردىڭ باياندامالارى تىڭدالدى.

كوميتەتتىڭ كوشپەلى وتىرىسىنىڭ بارىسىندا مەملەكەت باسشىسى ن.نازارباەۆتىڭ داۋلاردى سوتقا دەيىنگى رەتتەۋ ادىستەرىن دامىتۋ قاجەتتىگى تۋرالى ايتقان تاپسىرمالارىن جۇزەگە اسىرۋ ماسەلەلەرىن سەناتورلار جان-جاقتى تالقىلادى. ايتىلعان ۇسىنىستار مەدياتسيانى ودان ءارى دامىتۋ بويىنشا زاڭ شىعارۋ جۇمىستارى بارىسىندا ەسكەرىلەتىن بولادى.
كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كوشپەلى وتىرىسىنىڭ قورىتىندىسى بويىنشا ۇكىمەتتىڭ مەدياتسيا سالاسىنداعى بۇدان بىلايعى جۇمىستارىنا قورىتىندى بەرىلدى.

جۇمىس بابىنداعى كەزدەسۋدە مەدياتسيا تۋرالى قولدانىستاعى زاڭناماعا قاجەتتى وزگەرىستەر تالقىلاندى. سالالىق مەكەمەلەردە جاڭا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە داۋلاردى سوتتان تىس جانە سوتقا دەيىنگى رەتتەۋ ينستيتۋتتارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەۋ جونىندەگى جۇمىستار قولعا الىندى. ونداعى تۇزەتۋلەر نەكە جانە وتباسى، مۇراگەرلىك، جۇمىسپەن قامتۋ، الەۋمەتتىك، كورشىلەر مەن جەر داۋلارىنا قاتىستى ازاماتتىق جانە قىلمىستىق ىستەردىڭ جەكەلەگەن ساناتتارىنا مەدياتسيانى مىندەتتى تۇردە پايدالانۋدى ۇلعايتۋعا باعىتتالعان بولادى.

پىكىرسايىستى سەناتور گ.كيم قورىتىندىلادى. ونىڭ ايتۋىنشا، ايتىلعان ۇسىنىمدار مەدياتسيا سالاسىن رەتتەيتىن زاڭ جوبالارىن قاراستىرۋ بارىسىندا پايدالانىلاتىن بولادى.

سول كۇنى دەپۋتاتتار اتىراۋ قالاسىنداعى قۇقىق قورعاۋ قىزمەتىن كورسەتۋ ورتالىعىنا بارىپ، ونىڭ تەحنيكالىق جابدىقتالۋىمەن تانىستى. پروكۋرورلار، ادۆوكاتتار جانە مەدياتورلارمەن اڭگىمەلەسۋ بارىسىندا سەناتورلار قىلمىستىق زاڭناماداعى وزگەرىستەر مەن جاڭالىقتار جانە داۋلاردى شەشۋدىڭ بالاما ادىستەرىن كەڭەيتۋدىڭ كەلەشەگى تۋرالى ايتىپ بەردى. ورتالىق مەدياتورلارىن وسى سالا قىزمەتتەرىن ۇسىنۋ ستاندارتتارى قىزىقتىردى.

اتىراۋ وبلىسىنا ساپار اياسىندا دەپۋتاتتار «جىگەرمۇنايسەرۆيس» سەرىكتەستىگى مەن اتىراۋ مۇناي وڭدەۋ زاۋىتىندا بولىپ، ەڭبەك ۇجىمدارىمەن كەزدەستى. سەناتورلار جۇمىسشىلاردىڭ ەڭبەك جاعدايىمەن تانىسىپ، ەڭبەك داۋلارىن شەشۋدەگى مەدياتسيا مۇمكىندىكتەرى تۋرالى حاباردار ەتتى.

ادىلبەك قابا

Abai.kz