الماتىدا قالا كۇنىن مەرەكەلەۋ اياسىندا 12-13 قىركۇيەكتە قالا ومىرىندەگى ماڭىزدى وقيعا -  اشىق اسپان استىندا جىل سايىنعى IX وركەسترلەر فەستيۆالى وتۋدە، دەپ حابارلايدى قالا اكىمدىگىنىڭ ءباسپاسوز قىزمەتى.

وڭتۇستىك استانادا تانىمال شىعارماشىلىق ۇجىمداردىڭ ورىنداۋىندا ءارى مۋزىكا اسپاپتارىندا وينايتىن سوليستەر مەن ۆوكال  ونەرى شەبەرلەرىنىڭ قاتىسۋىمەن ەكى كۇن بويىنا وركەسترلىك مۋزىكا اۋەگە قالىقتايدى.

ساحنا تورىندە قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى، نۇرعيسا تىلەنديەۆ اتىنداعى "وتىرار سازى" اكادەميالىق فولكلورلىق - ەتنوگرافيالىق وركەسترى، الماتى قالاسى اكىمىنىڭ ەسترادالىق – سيمفونيالىق وركەسترى جانە قازاقستان رەسپۋبليكاسىنىڭ مەملەكەتتىك ۇرلەمەلى وركەسترى ونەر كورسەتەدى.

مەرەكەنىڭ العاشقى كۇنى  كلاسسيكالىق مۋزىكا اۋەسقويلارىنا "كۇيدەن كلاسسيكاعا دەيىن" اتتى مۋزىكالىق باعدارلاما ۇسىنىلدى، وعان قازاقتىڭ اسپاپتىق جانە اندىك كلاسسيكاسىنىڭ جاۋھارلارى، حالىق شىعارماشىلىعىنىڭ ۇزدىكتەرى، ورىس جانە ەۆروپالىق اۆتورلاردىڭ كلاسسيكالىق اۋەندەرى، زاماناۋي  سازگەرلەردىڭ شىعارمالارى، كينوفيلمدەردىڭ ساۋندترەكتەرى ەنگەن. وركەسترمەن بىرگە ساحنادا قازاق فولكلورىنىڭ جۇلدىزدارى، ەسترادالىق ورىنداۋشىلار، ۆوكال  ونەرىنىڭ شەبەرلەرى كونتسەرت قويادى، ولاردىڭ اراسىندا زارينا التىنباەۆا، ءجاميلا سەركەباەۆا، ۇلتۋ قاباەۆا، باحىت تۇرمانوۆا، فارحات كۋبيەۆ، دانيار بايجۇمانوۆ، نۇرسۇلتان شاتىرحانۇلى،  "satzhan project", "ifly" توپتارى جانە باسقالارى بار.

مەملەكەت باسشىسى نۇرسۇلتان نازارباەۆ قازاقستان حالقىنا وسى جىلعى ء"تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى" دەپ اتالاتىن جولداۋىنىڭ "ادامي كاپيتال – جاڭعىرۋ نەگىزى" اتتى بولىگىندە "رۋحاني جاڭعىرۋدىڭ" ءمان-ماڭىزى ۇلتتىڭ الەۋەتىن ارتتىرۋ ءۇشىن مادەنيەتىمىز بەن يدەولوگيامىزدى ودان ءارى دامىتۋىمىز كەرەكتىگىندە ەكەنىن اتاپ وتكەن بولاتىن.

فەستيۆالدىڭ ەكىنشى كۇنى مەگاپوليسكە ارنالعان "مەنىڭ قالام" باعدارلاماسى ۇسىنىلدى. ونىڭ رەپەرتۋارىنا وتكەن جىلدار مەن قازىرگى كەزەڭنىڭ الماتى تۋرالى اندەرى ەنگەن. مۇندا ەسترادا  جانە كلاسسيكالىق اندەردى  ورىنداۋشى  تانىمال انشىلەر ونەر كورسەتەدى.

Abai.kz