دەنساۋلىق پويىزدارى جىل سوڭىنا دەيىن شالعاي اۋىلداردىڭ تۇرعىندارىنا 230 ملن تەڭگەنىڭ كومەگىن كورسەتەدى

«دەنساۋلىق» جانە «سالاماتتى قازاقستان» مەديتسينالىق پويىزدارى بيىلعى قىركۇيەك پەن جەلتوقسان ارالىعىندا ەلىمىزدەگى شالعاي جاتقان تەمىر جول ستانتسيالارىن ارالايدى. شويىن جول بويىنداعى ەلدى مەكەندەردىڭ تۇۇرعىندارى جالپى قۇنى 229,5 ملن تەڭگەدەن اساتىن مەديتسينالىق كومەككە قول جەتكىزە الادى. بۇل تۋرالى fms.kz سايتى حابارلادى.

حابارلاماعا سۇيەنسەك، بيىل دەنساۋلىق پويىزدارى نەگىزىندە كورسەتىلەتىن مەديتسينالىق كومەكت3 «الەۋمەتتىك مەديتسينالىق ساقتاندىرۋ قورى» كەاق قارجىلاندىرادى. ءداستۇرلى جوبانى «قازاقستان تەمىر جولى» ۇك» اق مەن «Samruk-KazynaTrust» الەۋمەتتىك جوبالاردى دامىتۋ قورى جۇزەگە اسىرىپ كەلەدى.

اتىراۋ، ماڭعىستاۋ، قىزىلوردا، تۇركىستان جانە الماتى وبلىستارى اۋماعىنداعى 71 ستانتسيانى ارالايتىن «دەنساۋلىق» پويىزى حالىققا مەديتسينالىق قىزمەتتىڭ 360 مىڭنان استام ءتۇرىن كورسەتپەك. بۇعان جۇمسالاتىن قاراجاتتىڭ جالپى كولەمى 150,9 ملن تەڭگە. «سالاماتتى قازاقستان» پويىزى بولسا شىعىس قازاقستان، پاۆلودار، قاراعاندى جانە قوستاناي وبلىستارى اۋماعىنداعى 57 ستانتسياعا ايالداپ، جالپى قۇنى 78,6 ملن تەڭگەلىك 55 مىڭعا جۋىق قىزمەت ءتۇرىن كورسەتەدى. كورسەتىلەتىن قىزمەت سانى ناقتى ايماقتاعى سۇرانىس نەگىزىندە ەسەپتەلگەن.

مەديتسينالىق كومەك تىزىمىندە: سالالىق مامانداردىڭ كەڭەسى (تەراپەۆت، پەدياتر، نەۆروپاتولوگ، وكۋليست، لور، گينەكولوگ، حيرۋرگ، ۋرولوگ، ماممولوگ، ونكولوگ ت.ب.), ءتۇرلى زەرتتەۋلەر مەن دياگنوستيكا (ۋزي، قان تالداۋلارى، فليۋوروگرافيا ت.ب.), ستوماتولوگيالىق قىزمەتتەر ت.ب. بار.

پويىزدار كومپيۋتەرلىك سپيرومەتريالىق جۇيە، ەحوەنتسەفالوگراف، تەست جۇرگىزۋگە ارنالعان كارديولوگيالىق مونيتورينگ جۇيەسى، رەنتگەن سىندى زاماناۋي دياگنوستيكا قوندىرعىلارىمەن جابدىقتالعان. سونىمەن قاتار، ەڭ سوڭعى ۇلگىدەگى ستوماتولوگيالىق قۇرىلعىلار، لور جانە وفتالمولوگيا قوندىرعىلارى دا بار.

ەستەرىڭىزگە سالا كەتسەك، «مەديتسينالىق پويىزدار» جوباسى العاش رەت 2010 جىلى قولعا الىنعان بولاتىن. ۇيىمداستىرۋشىلاردىڭ ايتۋىنشا، وسى ۋاقىت ىشىندە كونسۋلتاتيۆتىك-دياگنوستيكالىق پويىزداردىڭ قىزمەتىن ەلىمىزدىڭ تۇپكىر-تۇپكىرىندەگى 1326 ستانتسيا تۇرعىندارى پايدالانعان. ماماندار 379 مىڭنان استام ادامدى قاراعان، ونىڭ 83 806-سى بالالار.

پويىزداردىڭ ءجۇرۋ كەستەسى fms.kz سايتىندا جاريالانعان.

Abai.kz