ورال. 1 ءساۋىر. قازاقپارات /ەلجان ەرالى/ - ورال قالاسىندا مارەگە جەتكەن ەركىن كۇرەستەن قازاقستاننىڭ ءىىى جازعى سپارتاكياداسىندا جاستار دا جاقسى كورىندى.

ورال. 1 ءساۋىر. قازاقپارات /ەلجان ەرالى/ - ورال قالاسىندا مارەگە جەتكەن ەركىن كۇرەستەن قازاقستاننىڭ ءىىى جازعى سپارتاكياداسىندا جاستار دا جاقسى كورىندى.

ماماندار، اسىرەسە، كەشە 60 كەلى سالماقتا كۇرەسكەن استانالىق، جيىرما جاسقا جاڭا ىلىككەن ساياتبەك وقاسوۆقا ەرەكشە ريزا بولدى. جاستار اراسىندا ازيا چەمپيونى بولىپ ۇلگەرگەن ول ەرەسەكتەر اراسىندا قيىنداۋ توپقا تۇسسە دە، قارسىلاستارىنان ەش قايمىققان جوق. ساياتبەك وسى جولى بەلگىلى بالۋان جاسۇلان مۇحتاربەكۇلىن دا ۇتتى. ال فينالدا وزىنەن ءۇش جاس قانا ۇلكەن وڭتۇستىكقازاقستاندىق باتىرحان شارداربەكوۆتى جەڭىپ، چەمپيون اتاندى. 74 كەلى سالماقتا شەشۋشى باسەكەدە قاراعاندىلىق كانىگى شەبەر، ازيا بىرىنشىلىگىنىڭ قولا جۇلدەگەرى سايفەددين وسمانوۆقا الماتى قالاسىنىڭ 1990 جىلعى وكىلى جىگەر زاكيروۆ قارسى كەلدى. جىگەر بۇل جولى تاجىريبەلى بالۋاننان ايلاسىن اسىرا الماسا دا، بولاشاعىنان ءۇمىت كۇتۋگە بولاتىنىن تانىتتى. بۇل سالماقتا كۇرەسەتىن الەم بىرىنشىلىگىنىڭ قولا جۇلدەگەرى، باتىسقازاقستاندىق ابدۋلحاكيم شاپيەۆ بىرىنشىلىككە قاتىسقان جوق. 96 كەلىدە بقو اتىنان سىنعا ءتۇسىپ جۇرگەن بەيجىڭ وليمپياداسىنىڭ كۇمىس جۇلدەگەرى تايمۇراز تيگيەۆ جاراقاتىنا بايلانىستى كىلەمگە شىقپادى. وسى تايمۇرازدى بۇدان بۇرىن ەكى رەت جەڭگەن پاۆلودارلىق داۋلەت شابانباي وسى جولى دا بابىندا ەكەندىگىن كورسەتتى. جيىرما سەگىز جاستاعى داۋلەت فينالدا الماتى وبلىسىنان كەلگەن 1987 جىلعى ءاليحان جۇماەۆتى تىزە بۇكتىردى. بۇل سالماقتا دا باسەكەلەستىك كۇشتى. بەيجىڭ وليمپياداسىنا بەرىلەر جولدامانى كەزىندە وسى داۋلەت جەڭىپ العان بولاتىن. بىراق باپكەرلەر بەيجىڭدە ت.تيگيەۆتى جارىسقا قوسقان بولاتىن. ەندى لوندون وليمپياداسى دا قىر استىندا. سوندىقتان باستى ماقسات  الەم بىرىنشىلىگى مەن وليمپياداعا ناعىز مىقتىلاردى دايىنداپ اپارۋ بولسا كەرەك. بيىلعى سپارتاكيادادا ەڭ اۋىر 120 كەلى سالماقتا استانالىق جاس بالۋان اسحات قۇسەپوۆتىڭ وليمپيادا ويىندارىنىڭ قولا جۇلدەگەرى ماريد مۋتاليموۆتى ۇتۋى باپكەرلەر ءۇشىن تاڭداۋدىڭ بار ەكەنىن تانىتتى.