پرەزيدەنت ENRC كومپانياسى باسشىلارىنىڭ ءبىرى، ميللياردەر پاتوح شوديەۆكە تۇركىستاندا تۇركى حالىقتارىنىڭ مۇراجايىن سالۋدى، "بازيس-ا" قۇرىلىس كومپانياسىنىڭ باسشىسى الەكساندر بەلوۆيچكە قالادا تەاتر سالۋدى، "قازمۇنايگاز" باسشىسى ساۋات مىڭباەۆقا حالىقارالىق تالاپتارعا ساي ستاديون سالۋدى تاپسىردى.

سونىمەن قاتار "BI Group" حولدينگىنىڭ باسشىسى ايدىن راقىمباەۆ "قازاق حاندارى، بيلەرى مەن باتىرلارىنىڭ ورتالىعىن" سالۋعا، ال Highvill Kazakhstan قۇرىلىس فيرماسى تۇرعىن ءۇي كەشەنىن سالۋعا، "قازاقستان تەمىرجولى" ۇلتتىق كومپانياسى جاستار سارايىن سالۋعا مىندەتتەلدى.

ال KEGOK كومپانياسى قوجا احمەت ءياساۋيدىڭ شاعىن مۇراجايىن، كاسىپكەرلەر دانيار ابىلعازين سۋ سپورتى كەشەنىن، نۇرلان سماعۇلوۆ اۆتوسالون سالاتىن بولدى.

بۇدان وزگە، "قازپوشتا" تۇركىستاندا زاماناۋي پوشتا ءبولىمىن اشاتىن بولدى.

"قازاتوموندىرىس" ۇلتتىق كومپانياسى مەن تۇركيالىق كومپانيالار تۇركىستانعا قارجىلاي قولداۋ كورسەتەدى.

جيىن بارىسىندا نازارباەۆ قالا اۋماعىنىڭ ۇلعايۋى جانە حالىق سانىنىڭ كوبەيۋىنە بايلانىستى اكىمدىككە "سامۇرىق-قازىنا" قورى، ينۆەستيتسيا جانە دامۋ مينيسترلىگىمەن بىرلەسىپ تۇركىستان ۆوكزالىن قايتا سالۋ، اۋەجاي سالۋ جانە اۋە تاسىمالىمەن قامتاماسىز ەتۋ ماسەلەلەرىن قاراستىرۋدى تاپسىردى.

20 ماۋسىمدا پرەزيدەنت نۇرسۇلتان نازارباەۆتىڭ جارلىعىمەن وڭتۇستىك قازاقستان وبلىسى تۇركىستان وبلىسى بولىپ وزگەرتىلگەن. جارلىققا ساي، تۇركىستان وبلىسىنىڭ ورتالىعى تۇركىستان قالاسى، ال حالقىنىڭ سانى ميلليونعا جەتكەن شىمكەنت رەسپۋبليكالىق ماڭىزى بار قالا مارتەبەسىنە يە بولعان.

بىرنەشە كۇن بۇرىن نازارباەۆ ەل ۇكىمەتىنە ءبىر اي كولەمىندە Turkistan ەكونوميكالىق ايماعىن قۇرۋدى تاپسىرعان.

Abai.kz