ب. ساعىنتاەۆ «رويال داتچ شەلل» كونتسەرنى بولىمشەسىنىڭ ديرەكتورىمەن كەزدەستى
بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆ بارلاۋ جانە ءوندىرۋ بولىمشەسىنىڭ ديرەكتورى ەندي براۋن باستاعان «رويال داتچ شەلل» كونتسەرنى وكىلدەرىمەن كەزدەسۋ وتكىزدى، - دەپ حابارلايدى اباي-اقپارات قر پرەمەر-ءمينيسترىنىڭ رەسمي سايتىنا سىلتەمە جاساپ.
كەزدەسۋ بارىسىندا قازاقستانداعى «شەلل» كومپانياسى قىزمەتىنىڭ كەيبىر ماسەلەلەرى، سونىڭ ىشىندە قاراشىعاناق جانە سولتۇستىك كاسپي كەن ورىندارىن يگەرۋ جونىندەگى جوبالاردى ىسكە اسىرۋ اياسىنداعى ماسەلەلەرى تالقىلاندى.
قازاقستاندا «شەلل» اعىلشىن-گوللاندتىق ەنەرگەتيكا كونتسەرنى ءتورت جوباعا قاتىسادى: سولتۇستىك كاسپي بويىنشا ونىمدەردى ءبولۋ تۋرالى كەلىسىم، قاراشىعاناق كەن ورنىنىڭ ونىمدەرىن ءبولۋ تۋرالى تۇپكىلىكتى كەلىسىم، «جەمچۋجينا» ليتسەنزيالىق ۋچاسكەسىن دامىتۋ بويىنشا ونىمدەردى ءبولۋ تۋرالى كەلىسىم جانە كاسپي قۇبىر كونسورتسيۋمى.
كومپانيا ءتۇرلى بيزنەس-سەگمەنتتەردە، سونىڭ ىشىندە گەولوگيالىق بارلاۋ، مۇناي مەن گاز ءوندىرۋ، كومىرسۋتەكتەردى تاسىمالداۋ مەن مۇناي ونىمدەرىن وتكىزۋ سالاسىندا قىزمەت اتقارادى.
Abai.kz
