ءانشى روزا رىمباەۆا ورىندايتىن «زامان-اي» ءانى شىققاننان كەيىن كوپ ۇزاماي جاپونيانىڭ قازاقستانداعى ەلشىلىگى ءاننىڭ اۆتورى ۇلىقبەك ەسداۋلەتكە حابارلاسقان. «قازاق پەن جاپوننىڭ قاسىرەتى ءبىر. ەكى ۇلت تا يادرولىق سىناقتان قاسىرەت كوردى. رۇقسات ەتسەڭىز، ءسىزدىڭ جانە كومپوزيتور تولەگەن مۇحامەدجانوۆتىڭ اۆتورلىق قۇقىن ساقتاي وتىرىپ، جاپون تىلىنە اۋدارىپ، ءاندى ورىنداعىمىز كەلەدى»، - دەپ كەلىسىم بەرۋىن سۇراعان.

اقىن مەن سازگەردەن رۇقسات الىنعاننان كەيىن ءان جاپون تىلىنە اۋدارىلىپ، توموكو ەسىمدى تانىمال ءانشىسى ساحنا تورىنە الىپ شىققاندا، جاپوندار ءاننىڭ اسەرىنەن سەلتيىپ تۇرىپ قالعان. قوس قولىن قاپسىرىپ، وتكەندى ەسكە العان وكىنىش، قايعىلارى كوزدەرىنەن كورىنىپ تۇردى. ولار ودان كەيىن ءاندى اعىلشىن تىلىنە اۋدارىپ، جازىقسىز ەلگە يادرولىق قارۋ تاستاعان اقش ەستىسىن دەپ امەريكاعا دا جەتكىزدى.

ال ءبىز دە شە؟ بۇل قاسىرەتتى ءان جارىققا شىعىپ، جورگەگىنە وراپ العاندا كۇشى تايسا دا، ءامىرى قالعان كەڭەستىك بيلىك ءاندى شىرقاتپاۋعا كۇش سالدى. شەكتەۋ قويدى. دەسەدە، سەمەي يادرولىق پوليگونىنىڭ زاردابىن كوز الدىڭىزعا اكەلەتىن ءاندى ەل ءوزى جالعاپ اكەتىپ ورىنداپ ءجۇردى.

ۇلدارىڭنىڭ قايدا كەتكەن قۇرىعى،

قىزدارىڭنىڭ قايدا كەتكەن بۇرىمى؟

مەيiرiمگە زارىقتىرعان زامان-اي،

زامان-اي، زامان-اي،

تۋعان جەردiڭ لايلاندى-اۋ تۇنىعى.

قايران ەلiم، قايران جەرiم قور بولعان،

جومارتتىعى سور بولعان-اي،

جارىلىستان كوز اشپاعان دالام-اي.

مىڭداعان ۇرپاق جاتىردا جاتىپ-اق جارىمجان بولدى. قىلقالامدى تىستەلەپ تۇرىپ سۋرەت سالاتىن ءبىر عانا كارىپبەك كۇيىكوۆتىڭ ءومىرى - ءسوزىمىزدىڭ ايعاعى. ايتپاقشى، جاپونياعا جولىڭىز تۇسەتىن بولسا، حيروسيما مۇراجايىنىڭ كىرەبەرىسىنەن قوس حالىققا قايعى جۇتتىرعان وسى قاسىرەتتى ءان قارسى الادى.

نۇرلان قازيۇلىنىڭ الەۋمەتتىك جەلىدەگى پاراقشاسىنان

Abai.kz