ەلباسى ن.نازارباەۆتىڭ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا حالىقتىڭ سپورتپەن اينالسۋىنا ۇلكەن ءمان بەرگەن بولاتىن. ءتىپتى ءار اۋلادا سپورت الاڭدارى بولۋ قاجەت دەگەن دە تاپسىرا بەردى. وسىعان وراي وڭىرلەردە سپورتتى دامىتۋ بويىنشا ءتۇرلى جۇمىستار اتقارىلىپ جاتىر.

ماسەلەن، تۇركىستان وبلىسىنىڭ شاردارا اۋدانىنا ەۆروپا ارمرەستلينگ فەدەراتسياسىنىڭ ۆيتسە-پرەزيدەنتى الەكساندر ياكوۆيتس كەلگەن بولاتىن. حورۆاتيا ارمرەستلينگ فەدەراتسياسىنىڭ پرەزيدەنتى شاعالالى اۋدانداعى سپورتشىلارمەن تاجىريبە الماسقان ەدى.

الەكساندر ياكوۆيتس ساپارىنىڭ ماقساتىن بۇكىل الەمگە تانىلىپ ۇلگەرگەن شاردارا ارمسپورت سپورت كلۋبىنا كەلۋدى كوپتەن بەرى ويلاپ جۇرگەندىگىمەن ءتۇسىندىردى. ول وسى كومانداعا كەلىپ، چەمپيوندارمەن قاۋىشقانىنا وتە قۋانىشتى ەكەنىن ايتتى. سونداي-اق، مۇنداي جاتتىعۋ زالىن بۇرىن-سوڭدى كورمەگەنىن جەتكىزىپ، تاڭعالىسىن جاسىرمادى.

شەتەلدىك قوناق ارمرەسلينگتەن الەم چەمپيوندارىنىڭ جاتتىعۋ بارىسىن بەينەكامەراعا ءتۇسىرىپ، ءوز ەلىندە ماقتانىشپەن كورسەتەتىنىن اتاپ ءوتتى. وسىنداي كوماندا قۇرعان ارمان قارسىباەۆقا العىسىن ءبىلدىرىپ، جاتتىقتىرۋشىنىڭ كوپتەگەن مەملەكەتتەر جەتپەگەن جەتىستىكتەرگە جەتىپ جۇرگەن كوماندا دايىنداعانىنا قۇرمەت كورسەتتى. قازىر اتالعان كوماندا قازان ايىندا تۋركيا ەلىنىڭ انتاليا قالاسىندا وتەتىن الەم چەمپيوناتىنا دايىندىق ۇستىندە.

ايتا كەتەيىك، ارمان قارسىباەۆ دايىنداعان شاردارالىق كوماندا بۇگىندە الەمدىك دەڭگەيدە ۇلكەن جەتىستىكتەرگە قول جەتكىزىپ كەلەدى. اتاپ ايتقاندا، كوماندانىڭ 24 سپورتشىسى الەم چەمپيونى اتانسا، ولاردىڭ جەتەۋى ەكى دۇركىن الەم چەمپيوندىعىن جەڭىپ العان. ال كوماندا باپكەرى ارمان قارسىباەۆ - ازيانىڭ 2004 جىلعى ءابسوليۋتتى چەمپيونى، قازاقستاننىڭ ەڭبەك سىڭىرگەن جاتتىقتىرۋشىسى.

Abai.kz