تۇركىستاندا «تەرەڭ تاريحتان - جارقىن بولاشاققا!» aتتى وبلىس  اكىمىنىڭ جۇلدەسى ءۇشىن رەسپۋبليكالىق پىكىرسايىس ءتۋرنيرى  ءوتتى. بۇل تۋرالى Abai.kz اقپاراتتىق پورتالى قازاقپارات اگەنتتىگىنە سىلتەمە جاساي وتىرىپ حابارلايدى.

«جاستار رەسۋرستىق ورتالىعىنىڭ» ۇيىمداستىرۋىمەن وتكەن شاراعا ءوڭىر باسشىسى جانسەيىت تۇيمەباەۆ پەن باسقارما باسشىلارى، ەلىمىزدىڭ تۇكپىر-تۇكپىرىنەن كەلگەن تاجىريبەلى تورەشىلەر مەن جاس پىكىرسايىسشىلار قاتىستى.

رەسپۋبليكانىڭ بارلىق وڭىرىنەن 75 كوماندا قاتىسقان پىكىرسايىستا مەملەكەت باسشىسى ن.ءا.نازارباەۆتىڭ قازاقستان حالقىنا جولداۋىندا كوزدەلگەن  ماسەلەلەر قارالدى. جاستاردىڭ بويىندا كوممۋنيكاتيۆتىلىكتى ارتتىرۋ، كوماندادا جۇمىس ىستەي ءبىلۋ سىندى  قاسيەتتەردى قالىپتاستىرۋ كوزدەلدى.

سونداي-اق، اتالعان شارا قاتىسۋشىلاردىڭ سىني ويلاۋ، شەشەندىك قابىلەتىن دامىتىپ، جاستارعا تۇركىستان قالاسىنىڭ تاريحىن تەرەڭىنەن تانىتۋ ماقساتىندا ۇيىمداستىرىلدى. جيىن بارىسىندا وبلىس اكىمى جانسەيىت تۇيمەباەۆ جاستاردىڭ تۇركىستاندى تۇلەتۋگە شاقىردى. ەل  بولاشاعىنىڭ جارقىن بولۋى ءۇشىن بىلىمدەرىن جەتىلدىرىپ، كوپ ەڭبەكتەنۋ كەرەكتىگىن اتاپ ءوتتى. ال، تۋرنيرگە قاتىسقان جاستار زامانداستارىن بولاشاقتىڭ باياندىلىعى ءۇشىن ساۋاتتىلىققا، دوستىققا شاقىرىپ، ولاردىڭ  قوعامداعى ءرولى مەن ماڭىزدىلىعىن سەزىنۋگە شاقىردى.

پىكىرسايىس بارىسىندا  تاقىرىپقا ساي مەملەكەتتىك ماڭىزى بار ماسەلەلەر جاستاردىڭ كوزقاراسىمەن تالقىلانىپ، ولاردى شەشۋ باعىتىندا  تىڭ  يدەيالار مەن مەحانيزمدەر ۇسىنىلدى.  تۋرنير قورتىندىسى بويىنشا ۇزدىك  فراكتسيالار مەن سپيكەرلەر انىقتالىپ، ولار 700 مىڭ تەڭگە جۇلدە قورىمەن ماراپاتتالدى.

Abai.kz