الاش قايراتكەرى، جازۋشى، قازاق تەاترىنىڭ نەگىزىن قالاۋشىلاردىڭ ءبىرى، تۇڭعىش اعارتۋ ءمينيسترى بولعان سماعۇل سادۋاقاسۇلىنىڭ سۇيەگىنىڭ كۇلى 77 جىلدان سوڭ تۋعان ەلىندە مۇسىلمان ادەت-عۇرىپتارىمەن جەر قويناۋىنا تاپسىرىلدى. جىل باسىندا ماسكەۋدىڭ دون قابىرستانىنان استاناعا قايتارىلعان قوعام قايراتكەرىنىڭ سۇيەگىنىڭ كۇلى سادۋاقاس قاجى عىلماني مەشىتىندە ساقتالعان ەدى. كەشە الاش قايراتكەرىن اقتىق ساپارعا شىعارىپ سالۋعا ونىڭ تۋعان-تۋىستارى، جاقىندارى، پارلامەنت دەپۋتاتتارى، قالالىق اكىمدىك وكىلدەرى، زيالى قاۋىم مەن جاستار ۇيىمدارى، ساياسي پارتيا، قوعامدىق بىرلەستىك، ت.ب. مۇشەلەرى قاتىستى.

الاش قايراتكەرى، جازۋشى، قازاق تەاترىنىڭ نەگىزىن قالاۋشىلاردىڭ ءبىرى، تۇڭعىش اعارتۋ ءمينيسترى بولعان سماعۇل سادۋاقاسۇلىنىڭ سۇيەگىنىڭ كۇلى 77 جىلدان سوڭ تۋعان ەلىندە مۇسىلمان ادەت-عۇرىپتارىمەن جەر قويناۋىنا تاپسىرىلدى. جىل باسىندا ماسكەۋدىڭ دون قابىرستانىنان استاناعا قايتارىلعان قوعام قايراتكەرىنىڭ سۇيەگىنىڭ كۇلى سادۋاقاس قاجى عىلماني مەشىتىندە ساقتالعان ەدى. كەشە الاش قايراتكەرىن اقتىق ساپارعا شىعارىپ سالۋعا ونىڭ تۋعان-تۋىستارى، جاقىندارى، پارلامەنت دەپۋتاتتارى، قالالىق اكىمدىك وكىلدەرى، زيالى قاۋىم مەن جاستار ۇيىمدارى، ساياسي پارتيا، قوعامدىق بىرلەستىك، ت.ب. مۇشەلەرى قاتىستى.

ەستەرىڭىزگە سالا كەتسەك، زيالى قاۋىم وكىلدەرى تاراپىنان بابامىزدىڭ سۇيەك كۇلىن قابانباي باتىردىڭ كەسەنەسىنىڭ جانىنداعى ۇلتتىق پانتەونعا نەمەسە جاستار اۋدانىنداعى كەنەسارى باتىردىڭ ساربازدارى جاتقان زيراتحاناعا جەرلەۋ قاجەتتىگى ايتىلعان ەدى. بىراق سماعۇل سادۋاقاسۇلىنىڭ سۇيەك كۇلى استراحان تاس جولىنداعى مۇسىلمان زيراتحاناسىندا جەرلەنەدى دەپ شەشىلىپتى. بۇعان قاتىستى الاشتانۋشى عالىم ديقان قامزابەكۇلى: «قازىر كەيبىر ازاماتتار «نەگە سماعۇل سۇيەگى ۇلكەن پانتەونعا قويىلمادى» دەگەندەي سىن ايتىپ جاتىر. بۇعان باستى سەبەپ - پانتەون ءالى دايىن ەمەس. سوندىقتان مۇسىلمان عۇرپىمەن، ەل داستۇرىمەن جەر قويناۋىنا تاپسىرىلىپ جاتىر. مىقتى قايراتكەر قاي جەردە جاتسا، سول جەر قادىرلى ەمەس پە؟! بۇل ەلدىڭ ۇلكەن يماندىلىق شاراسى دەپ ەسەپتەيمىز» - دەي كەلە: «سماعۇل سۇيەگىنىڭ اكەلىنۋى قوعامعا ۇلكەن سۇراق سالدى: جالپى، سەندەردىڭ ۇلتتىق قابىرستاندارىڭ بار ما؟! بىزدە ۇلتتىق قابىرستان جوق. ءدىني تۇرعىدان الساق، بۇل تالاستى ماسەلەگە اكەلەدى. ءدىندار ازاماتتار «ەشقاشان دا ءبىر كىسىنى ءبىر كىسىدەن تومەندەتۋگە بولمايدى» دەيدى. حان دا، قاراپايىم ادام دا اللا الدىندا پەندە عانا. بىراق زايىرلى مەملەكەت رەتىندە ايتساق، ءبىز ۇرپاققا ۇلتتىق ءتالىم-تاربيە بەرۋ ءۇشىن ەلگە قىزمەت ەتكەن مىقتى ازاماتتاردىڭ زيراتىن كورنەكى ەتىپ قويعاندى دۇرىس كورەتىن جايىمىز بار» - دەپ، ويىن تۇيىندەيدى.

ءماجىلىس دەپۋتاتى جاراسباي سۇلەيمەنوۆ بۇل شارانىڭ ماڭىزىنا ەرەكشە توقتالا كەلە: «وكىنىشكە قاراي، سماعۇل بابامىزدىڭ سۇيەگىنىڭ كۇلى 77 جىلدان بەرى جەر قويناۋىنا تاپسىرىلماي كەلدى. وعان ەشكىمدى كىنالاۋعا بولماس. ماسكەۋدە ءجۇرىپ، مەرت بولىپ، سول ەلدىڭ داستۇرىمەن، تارتىبىمەن حريستيان زيراتىنا قويىلدى. تاۋەلسىز ەل بولعان سوڭ، مۇنىڭ ارى قاراي دا سولاي جالعاسقانى دۇرىس بولماس ەدى. مۇسىلمان بالاسى ءارى ەلگە بەلگىلى قايراتكەر بولعان سوڭ، بابامىزدىڭ تۋعان توپىراقتا جانىنىڭ ماڭگىلىك تىنىشتىق تاپقانى دۇرىس» - دەيدى.

ديقان قامزابەكۇلىنىڭ ايتۋىنشا، ەندىگى كەزەكتە كەنەسارى حان مەن كەيكى باتىردىڭ باس سۇيەكتەرىن ەلگە قايتارۋ ىسىندە ۇلت بىرتۇتاستىعىن كورسەتۋمەن قاتار، ولاردى كۇتىپ الۋدىڭ ەلدىك جورالعىلارىن قالىپتاستىرا ءبىلۋ قاجەت.

«ايقىن» گازەتى