بۇگىن ەلوردادا پارلامەنت ءماجىلىسىنىڭ كەڭەيتىلگەن وتىرىسى ءوتتى. وعان تومەنگى پالاتا سپيكەرى نۇرلان نىعماتۋليننىڭ ءوزى توراعالىق ەتتى. بۇل تۋرالى "اباي اقپارات" حابارلايدى.

توراعا نىعماتۋليننىڭ توراعالىعىمەن وتكەن جيىندا تومەنگى پالاتا دەپۋتاتتارى الگىندەگى ەلباسى نۇرسۇلتان نازارباەۆتىڭ باس پارتيانىڭ XVIII سەزىندە كوتەرگەن ماڭىزدى باستامالارىن تالقى ەتتى.

اتاپ ايتقاندا، ەلدەگى الەۋمەتتىك تۇرمىس جاعدايى تومەن وتباسىلاردى جەڭىلدەتىلگەن تارتىپپەن باسپانامەن قامتۋ، از قامتىلعان وتباسىلارعا الەۋمەتتىك قولداۋ كورسەتۋ، ولاردىڭ باسپانا ماسەلەسىن، ءبىلىم الۋ ماسەلەسىن، دەنساۋلىق ماسەلەسىن شەشۋ جولدارىن جاقسارتۋ، وڭىرلەردى دامىتۋ ءۇشىن قابىلدانعان اۋقىمدى باستامالاردى جۇزەگە اسىرۋدىڭ جولدارىن قاراستىرۋ سەكىلدى بىرقاتار ماسەلەلەرگە توقتالدى.

ءماجىلىس سپيكەرى، اتالعان مىندەتتەردى جۇزەگە اسىرۋ ءۇشىن مەملەكەت بيۋدجەتىنەن ارنايى قاراجات قاراستىرىلۋى كەرەكتىگىن العا تارتتى. ەلىمىزدە الەۋمەتتىك جاڭعىرتۋدىڭ جاڭا كەزەڭىنىڭ باستالعانىن جانە سوعان ساي جوعارىداعى ەلباسى نۇرسۇلتان نازارباەۆ مىندەتتەگەن تاپسىرمالاردى ورىنداۋ ءۇشىن قارجىلىق قولداۋ بولاتىنىن دا ايتتى.

"ەڭ الدىمەن پرەزيدەنتىمىزدىڭ "نۇر وتان" پارتياسىنىڭ سەزىندە بەرگەن بارلىق تاپسىرمالارىن جەدەل ءارى ساپالى زاڭنامالىق قامتاماسىز ەتۋىمىز قاجەت. ەلباسى ءماجىلىس دەپۋتاتتارى، اسىرەسە، مەملەكەتتىك جانە سالالىق باعدارلامالاردى ىسكە اسىرۋعا مونيتورينگ جاساۋ جۇمىستارىنا بەلسەنە قاتىسۋعا ءتيىس ەكەندىگىن اتاپ ءوتتى. ءبىز وسى تاپسىرمالاردى اتالعان باعدارلامالاردى ورىنداۋعا جاۋاپتى قۇزىرلى ورگان وكىلدەرىن "ۇكىمەت ساعاتىندا", سونداي-اق، ماجىلىسكە كىرگەن ساياسي پارتيالار فراكتسيالارىنىڭ وتىرىستارىندا تىڭداۋ ارقىلى جۇزەگە اسىرۋدى جوسپارلاپ وتىرمىز", - دەدى توراعا نىعماتۋلين.

ءماجىلىس تىزگىنشىسى نۇرلان زايروللاۇلى ءوز كەزەگىندە اتالعان جيىندارعا، بيۋرو وتىرىستارىنا ۇكىمەتتىك ەمەس ۇيىم مۇشەلەرى مەن ساراپشىلاردىڭ، بۇقارالىق اقپارات قۇرالدارىنىڭ دا شاقىرتىلاتىنىن، تالقى جيىندار اشىق ءارى جاريا تۇردە وتكىزىلەتىنىن ناقتىلاپ ايتتى.

سونداي-اق، بۇگىنگى ءماجىلىس بيۋروسىنىڭ كەڭەيتىلگەن وتىرىسىندا وزگە دە قوردالانىپ جاتقان ماسەلەلەر قاراستىرىلدى. اتاپ ايتساق، بىرقاتار حالىقارالىق قۇجاتتار راتيفيكاتسيالاندى. ولار: قازاقستان مەن رەسەي فەدەراتسياسى اراسىنداعى بايقوڭىر قالاسىنىڭ مارتەبەسى تۋرالى كەلىسىم، قازاقستان مەن قىتاي  ۇكىمەتتەرى اراسىنداعى قىتاي حالىق رەسپۋبليكاسىنىڭ جەڭىلدىكتى كرەديت بەرۋى تۋرالى كەلىسىمى جانە قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى  وتەۋسىز اسكەري-تەحنيكالىق كومەك كورسەتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى.

ايتا كەتەيىك، اتالعان ماسەلەلەر مەن حالىقارالىق قۇجاتتاردى راتيفيكاتسيالاۋ ماسەلەسى كۇن ءتارتىبى بويىنشا ءماجىلىس دەپۋتاتتارىنىڭ قاراۋىنا ءوتتى.

Abai.kz