قازاقستاندا اتاۋلى الەۋمەتتىك كومەك الۋشىلار قاتارى كوبەيەدى. ويتكەنى بيىل وسى جاردەماقىنى تاعايىنداۋ كەزىندە ەسەپكە الىناتىن كەدەيشىلىك شەگى ۇلعايتىلدى. وسى جانە وزگە دە وزگەرىستەر تۋرالى قر پرەزيدەنتى اكىمشىلىگى ىشكى ساياسات ءبولىمىنىڭ باسشىسى، "نۇر وتان" پارتياسى ساياسي كەڭەسىنىڭ مۇشەسى ايدا بالاەۆا Sputnik قازاقستان اگەنتتىگىنە ەگجەي-تەگجەيلى بايانداپ بەردى.

قازاقستان پرەزيدەنتى نۇرسۇلتان نازارباەۆ 27 اقپاندا "نۇر وتان" پارتياسىنىڭ سەزىندە كوپبالالى جانە تۇرمىسى تومەن قازاقستاندىقتاردىڭ تۇرمىسىن جاقسارتۋ بويىنشا بىرقاتار تاپسىرما بەردى.

الەۋمەتتىك كومەك الۋعا قالاي ءوتىنىش بەرۋگە بولادى؟

اتاۋلى الەۋمەتتىك كومەك (ااك) جان باسىنا شاققانداعى ورتاشا تابىسى كەدەيشىلىك شەگىنە دە جەتپەيتىن ازاماتتارعا تاعايىندالادى.

بۇگىنگى تاڭدا كەدەيشىلىك شەگى ەڭ تومەنگى كۇنكورىس دەڭگەيىنىڭ 50 پايىزىن نەمەسە 14 849 تەڭگەنى قۇرايدى.

"ەلباسىنىڭ تاپسىرماسىنا سايكەس، ەندى كەدەيشىلىك شەگى ەڭ تومەنگى كۇنكورىس دەڭگەيىنىڭ 50 ەمەس، 70 پايىزىن قۇرايدى. دەمەك، بۇل 20 789 تەڭگە دەگەن ءسوز", - دەپ مالىمدەدى بالاەۆا.

ونىڭ ايتۋىنشا، مۇنداي جاعدايدا بۇل الەۋمەتتىك كومەككە جۇگىنەتىن ازاماتتاردىڭ سانى كۇرت ارتادى دەپ بولجانىپ وتىر. ياعني، وسىعان دەيىن اتاۋلى الەۋمەتتىك كومەك الىپ جۇرگەندەردىڭ قولىنا 14 849 تەڭگە تيسە، ەندى 20 789 تەڭگە بەرىلمەك.

جاڭا وزگەرىسكە سايكەس، اتاۋلى الەۋمەتتىك كومەك جاردەماقىسىن تىركەتۋدە ازاماتتاردان كوپ قۇجات سۇرالمايدى.

"ەلباسىنىڭ تاپسىرماسى بويىنشا، 2019 جىلدىڭ 1 شىلدەسىنەن باستاپ بۇل پروتسەدۋرا وڭتايلاندىرىلادى. جاڭا ءتارتىپ بويىنشا، حالىققا قىزمەت كورسەتۋ ورتالىعى نەمەسە اۋىلدىق وكرۋگ اكىمدەرى ارىز تولتىرۋشىدان قوسىمشا قۇجات سۇراتپايدى. ازاماتتار جەكە باسىن كۋالاندىراتىن قۇجاتپەن ارنايى مەكەمەگە كەلىپ، اتاۋلى الەۋمەتتىك كومەك الۋعا ءوتىنىش جازادى، بولدى", - دەيدى قر پرەزيدەنتى اكىمشىلىگىنىڭ ىشكى ساياسات ءبولىمىنىڭ باستىعى ايدا بالاەۆا.

ايتا كەتەلىك، وسىعان دەيىن ءتارتىپ بويىنشا، اتاۋلى الەۋمەتتىك كومەك تاعايىنداۋدا قۇزىرلى ورگاندار ازاماتتارعا قوسىمشا قۇجاتتار جيناتاتىن. مىسالى، بانكتىڭ شوتى، بالانىڭ تۋ تۋرالى كۋالىگى، نەكە تۋرالى كۋالىك دەگەن سياقتى. ەندى وسى قاعازباستىلىقتىڭ كوزى جويىلماق.

وتباسىنىڭ "پروپيسكاسى" جوق بولسا نە ىستەۋ كەرەك؟

سونداي-اق بالاەۆا جاردەماقىنى تاعايىنداۋدا ازاماتتاردان تۇرعىلىقتى مەكەن-جاي انىقتاماسى نەلىكتەن تالاپ ەتىلەتىنىن ءتۇسىندىرىپ بەردى.

"ويتكەنى اتاۋلى كومەككە اقشا جەرگىلىكتى بيۋدجەتتىڭ قارجىسىنان قاراستىرىلادى. بۇل – بىرىنشىدەن. ەكىنشىدەن، مۇنداي مىندەتتى تالاپ بولماسا، وندا الاياقتىققا جول بەرىلۋى مۇمكىن. ماسەلەن، اتاۋلى كومەككە جۇگىنە الاتىن ادام ول اقشانى تۇراقتى تىركەلگەن مەكەن-جايى بويىنشا دا، سول سەكىلدى ۋاقىتشا تۇراتىن مەكەن-جايى بويىنشا دا اۋدارتىپ الۋى ىقتيمال عوي", -دەيدى ول.

حالىقتى كوپ الاڭداتىپ وتىرعان ماسەلە دە وسى تۇراقتى مەكەن-جاي تىركەۋى. سەبەبى تۇرمىسى تومەن وتباسىلاردىڭ كوبىسى پاتەر جالداپ تۇرادى. تۇراقتى تىركەۋى جوق. مۇنداي جاعدايدا قايتپەك كەرەك؟ بۇعان بالاەۆا بىلاي جاۋاپ قاتتى:

"ەگەر وتباسىنىڭ ەشقانداي دا تۇرعىلىقتى مەكەن-جاي تىركەۋى بولماسا، وندا ولار جالداپ تۇرىپ جاتقان ءۇي يەسىنەن وزدەرىن تىركەۋگە الۋىن تالاپ ەتۋى ءتيىس. زاڭعا سايكەس، ءۇيىن جالعا بەرەتىن مەنشىك يەلەرى پاتەرىن جالداۋشىلاردىڭ بارلىعىن تىركەۋگە تۇرعىزۋعا مىندەتتى. ۋاقىتشا بولسىن، تۇراقتى بولسىن تىركەۋ جاساۋى ءتيىس", - دەيدى ول.

ال ەگەر ءۇي قوجايىنى پاتەر جالداۋشىلاردى مەكەن-جايىنا تىركەۋدەن باس تارتسا، وندا بىردەن پوليتسياعا نەمەسە اكىمدىككە شاعىم تۇسىرگەن ابزال. زاڭدا ولاردى جاۋاپقا تارتۋ بويىنشا ناقتى شارالار قاراستىرىلعان.

"زاڭ بويىنشا پاتەرىن جالعا بەرەتىن تۇرعىن ءۇي يەلەرى سالىق تولەۋگە مىندەتتى. ال ونى ەلەمەيتىن جالعا بەرۋشىلەر جاۋاپكەرشىلىككە تارتىلادى", - دەپ ءتۇسىندىردى ىشكى ساياسات ءبولىمىنىڭ باسشىسى.

بالالار ءۇيىنىڭ تاربيەلەنۋشىلەرى تۇرعىن ۇيگە كەزەككە قالاي تۇرادى؟

 ايدا بالاەۆانىڭ ايتۋىنشا، بالالار ۇيىنەن تۇلەپ شىققان جاستار ءۇي كەزەگىنە تۇرۋى ءۇشىن وقىپ جاتقان وقۋ ورىندارىنىڭ جاتاقحاناسىنا مىندەتتى تۇردە تىركەلۋى ءتيىس.

"بالالار ۇيىنەن تۇلەپ شىققان جاستاردىڭ ءۇي كەزەگىنە تۇرۋى ءۇشىن مىندەتتى تۇردە تۇرعىلىقتى مەكەن-جاي تىركەۋى بولۋى ءتيىس. بۇل رەتتە ولار ءوزى وقىپ جاتقان كوللەدجدىڭ نەمەسە جوو-نىڭ جاتاقحانالارىنا تىركەلە الادى. ال ەگەر جاستار ۇيىندە تۇراتىن بولسا، وندا سول اراعا تىركەلگەنى دۇرىس", - دەيدى ول.

ايتا كەتەلىك، بۇل جاڭا وزگەرىستەرگە سايكەس، اتاۋلى الەۋمەتتىك كومەك جاردەماقىسىن قازاقستاندىقتار 2019 جىلدىڭ 1 شىلدەسىنەن الا باستايدى. بۇل تۋرالى الدىندا ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ءمالىم ەتكەن ەدى.

Abai.kz