ايگۇل كەمەلباەۆا. قازاققا دۇشپان قازاق پا؟
قازاققا دۇشپان قازاق پا؟
مىناۋ ەلدى ۇستارلىق
كىسى ەمەسپىن، كەل، قۇتقار!
قولدان كەلمەس قورلىققا
نەگە بولدىم مۇنشا ىڭكار؟
«بولىس بولدىم، مىنەكي»
اباي انىق ءسوزدى ۇقپاس ميعۇلا ەلدىڭ جايىن ايتىپ زارلايدى. اقىن ءوز ءداۋىرىنىڭ جۇرتىن ۋايىمداپ ءوتتى. بيىل ابايدىڭ تۋعانىنا 166 جىل تولادى. ول كوزى اشىلعان قازاعىنىڭ ءسوزدى ءالى دە تۇك ۇقپاي، اداسىپ جۇرگەنىن دىم بىلمەي دۇنيەدەن وزدى. اباي ايتتى دەلىنىپ، كۇللى الاش ناسىلىنە ىرىتكى بولىپ، بۋىن-بۋىنىنا تاراپ، قانىنا ءسىڭىپ بارا جاتقان ءبىر جەگى ءسوز باياعىدان توبەمىزدە قۇزعىنشا اينالسوقتايدى. قۇزعىننىڭ قۇلقىنى- جەمتىك.
ول ءسوز ىسىك ءتارىزدى اسقىنىپ، جىلدان-جىلعا مەڭدۋاناداي قاۋلاپ، سايتاننىڭ ساپالاعىنىڭ قاۋەسەتىندەي ۇدەي قاڭعىپ، وسەكتىڭ ورتىندەي ءورشىپ بارادى.
ءمۇيىزى قاراعايداي ۇلكەن ەل اعالارى، ۇلتجاندى كوكەلەرىمىزدىڭ ءوزى بەتى شىمىرىكپەي الگى ارسىز ءسوزدى قايتالاي بەرۋدەن جالىقپايتىنى نەسى؟
«ابايدىڭ ءوزى سولاي دەگەن» - قۇپتاي ءتۇسۋ پيعىلى ءجيى كەزدەسەدى.
ۇلتتىق سانامىزعا جەگى قۇرتتاي ۇيالاپ ۇلگەرگەن ول نە ءسوز؟
قازاققا دۇشپان قازاق پا؟
مىناۋ ەلدى ۇستارلىق
كىسى ەمەسپىن، كەل، قۇتقار!
قولدان كەلمەس قورلىققا
نەگە بولدىم مۇنشا ىڭكار؟
«بولىس بولدىم، مىنەكي»
اباي انىق ءسوزدى ۇقپاس ميعۇلا ەلدىڭ جايىن ايتىپ زارلايدى. اقىن ءوز ءداۋىرىنىڭ جۇرتىن ۋايىمداپ ءوتتى. بيىل ابايدىڭ تۋعانىنا 166 جىل تولادى. ول كوزى اشىلعان قازاعىنىڭ ءسوزدى ءالى دە تۇك ۇقپاي، اداسىپ جۇرگەنىن دىم بىلمەي دۇنيەدەن وزدى. اباي ايتتى دەلىنىپ، كۇللى الاش ناسىلىنە ىرىتكى بولىپ، بۋىن-بۋىنىنا تاراپ، قانىنا ءسىڭىپ بارا جاتقان ءبىر جەگى ءسوز باياعىدان توبەمىزدە قۇزعىنشا اينالسوقتايدى. قۇزعىننىڭ قۇلقىنى- جەمتىك.
ول ءسوز ىسىك ءتارىزدى اسقىنىپ، جىلدان-جىلعا مەڭدۋاناداي قاۋلاپ، سايتاننىڭ ساپالاعىنىڭ قاۋەسەتىندەي ۇدەي قاڭعىپ، وسەكتىڭ ورتىندەي ءورشىپ بارادى.
ءمۇيىزى قاراعايداي ۇلكەن ەل اعالارى، ۇلتجاندى كوكەلەرىمىزدىڭ ءوزى بەتى شىمىرىكپەي الگى ارسىز ءسوزدى قايتالاي بەرۋدەن جالىقپايتىنى نەسى؟
«ابايدىڭ ءوزى سولاي دەگەن» - قۇپتاي ءتۇسۋ پيعىلى ءجيى كەزدەسەدى.
ۇلتتىق سانامىزعا جەگى قۇرتتاي ۇيالاپ ۇلگەرگەن ول نە ءسوز؟
«قازاقتىڭ جاۋى قازاق» دەگەندى ابايدىڭ ءوزى ايتىپ كەتكەن دەسەدى بۇل اسىرە نادان جۇرت، التى الاش دەسە ەڭىرەگەندە ەتەگى تولاتىن ءوز اعالارىمىز قاۋزاپ، سونى ابدەن اۋەزە قىلىپ الدى. اڭداماي ايتىپ، ءوز باۋىرلارىنا قيانات جاساپ جۇرگەندەرىن شىركىن ازاماتتار سەزەر ەمەس. ءاۋ باستا ءبىر جەلاۋىز ءجۋرناليستىڭ قىزدىرما تىلىنەن شىعىپ كەتسە كەرەك. اتاڭىز قازاق: ءسوز تاس جارادى، تاس جارماسا باس جارادى. بىلمەگەن ۋ ىشەدى. سول كەپكە ابدەن ۇرىندىق. مۇنداي سۇمدىق ءسوزدى دۇنيەدەگى ءبىر دە ءبىر دانىشپان ولسە دە ايتپايدى، سەبەبى بۇل ءبىر ادامنىڭ عانا ەمەس، بۇكىل ۇلتتىڭ تامىرىنا بالتا شاباتىن جەگى، يانات ءسوز.
«سامىي لۋچشي سپوسوب وبولگات چەلوۆەكا - ۆىرۆات يز ەگو رەچي كۋسوچەك. رامكا - تە سامىە نوجنيتسى، كوتورىە يز كونتەكستا ۆسە ي ۆىرەزايۋت». يراكلي شانيدزە، «فوتوگرافيا-ەتو لوج» (16.12.2009. «ۆرەميا»).
امەريكاندىق اۆانگارد فوتوگراف، جالاڭاش ءتاندى ءجيى تۇسىرەتىن ەركىن مىنەز جاننىڭ اۋزىنان شىعىپ تۇرعان بۇل سالماقتى ءسوزدى وقي سالا ناعىز فيلوسوفقا لايىق دەپ ۇقتىم. ابايعا تەلىنىپ جۇرگەن الگى دولى ءسوز دە تۇپتەپ كەلگەندە ءبىر ۇزىك، ءۇزىندى، جۇلىم ءسوز.
سونىڭ ءۇشىن نەگىزگى ويدى شولاق كەسىپ، زۇلىم سوزگە اۋىسىپ جۇرە بەرگەنى. ايتپەسە قازاققا دۇشپان قازاق پا؟ جوق.
اباي «ايتىلعان ءسوز اتىلعان سوزبەن تەڭ» دەگەندى بىلمەدى دەپ كىم ايتپاق.
ابايدىڭ 26 قارا سوزىندە بىلاي دەلىنگەن:
«ءبىزدىڭ قازاقتىڭ قوسقان اتى الدىندا كەلسە، تۇسىرگەن بالۋانى جىقسا، سالعان قۇسى السا، قوسقان ءيتى وزگەدەن وزىپ بارىپ ۇستاسا، ەسىپ شىعىپ ءبىر قۋانادى. بىلمەيمىن، سودان ارتىق قۋانىشى بار ما ەكەن؟ ءاي، جوق تا شىعار! وسى قۋانىش ءبارى دە قازاق قارىنداستىڭ ورتاسىندا ءبىر حايۋاننىڭ ونەرىنىڭ ارتىلعانىنا يا ءبىر بوتەن ادامنىڭ جىققانىنا ماقتانارلىق نە ورنى بار؟ ول وزعان، العان، ءوزى ەمەس، ياكي بالاسى ەمەس. مۇنىڭ ءبارى- قازاقتىڭ قازاقتان باسقا جاۋى جوق، بيتتەي نارسەنى ءبىر ۇلكەن ءىس قىلعان كىسىدەي قۋانعان بولىپ، انا وزگەلەردى ىزالاندىرسام ەكەن دەمەك. بىرەۋدى ىزالاندىرماق- شاريعاتتا حارام، شارۋاعا زالال، اقىلعا تەرىس. انشەيىن بىرەۋدى ىزا قىلماقتىڭ نەسىن داۋلەت ءبىلىپ قۋانادى ەكەن؟».
اباي وسى ويىنىڭ ۇشىعىن «قىران بۇركىت نە المايدى، سالسا باپتاپ» اتتى ولەڭىندە ناقتى بەرگەن:
قۋانار يەلەرى سوندا ىرجاقتاپ.
نە تاپتىق مۇنىمەنەن دەگەن جان جوق،
ءتۇنى بويى كۇپىلدەر قۇسىن ماقتاپ.
باسقا سايا، جانعا ولجا دانەمە جوق،
قايران جۇرت وسىنىمەن ءجۇر دالاقتاپ.
ابايدىڭ ءوزى «قازاقتىڭ جاۋى قازاق» دەگەن جاڭساق ءسوزدىڭ بۇرمالانىپ كەتۋى وسىدان شىعادى. شىن مانىندە اباي تۇيمەدەي نارسەنى تۇيەدەي قىلىپ زورايتىپ، دابىرا ۇلعايتىپ كورسەتۋدى سىناپ وتىر. ادامنىڭ مىنەز-قۇلقىنا ءتان ۇساق-تۇيەككە قۇمارلىقتى، تىم ءۇستىرت، تاياز ويلاۋدى جاقتىرتپاي ايتقان ءبىر اۋىز ءسوزىن وزىنەن 100 جىل كەيىن تۋعان ءتيىپ-قاشپا، شالاعاي بىرەۋلەر ارامزا سوزگە بۇرىپ، ءوڭىن اينالدىرىپ جىبەرەتىنىن، مۇنىڭ ۇلتتىق يدەولوگياعا قارا كۇيەدەي جاعىلارىن اباي اتامىز قايدان ءبىلسىن.
ول بۇل كونتەكستتە انشەيىن ءبىر اعايىن كۇندەس، كور-ءجوردى مالداناتىن، الىسقا ۇزامايتىن داقپىرتشىلدىققا اۋەستىكتى جاقتىرتپاي سويلەيدى. بار بولعانى وسى. ۇلت، ەتنوس تۋرالى دانەڭە جوق.
«كىم دە كىمنىڭ ادىلەتى جوق بولسا، ونىڭ ۇياتى دا جوق» دەيدى اباي. دانالىقتىڭ تۇما بۇلاعىنان قانىپ ىشكەن ابايداي اسىل تۋعان ۇلى ءوز ۇلتىنىڭ بەرەكەسىن بۇلاي بۇزبايدى، «جاقسى ءسوز جارىم ىرىس»دەپ دۇنيە تانيدى. اباي بۇلاي دەۋى مۇمكىن ەمەس. «وتىرىك ىرىستى كەسەدى»، مۇنى تۇركىلەر بىلگەن. ابايعا جاعىلعان جالا نەگە ۇدەپ بارادى؟ اباي ايتپاعان جەگى ءسوزدى نەگە ءبارىمىز ءسۇيىپ قايتالاۋعا اۋەسپىز؟ قيت ەتسە، ابايدىڭ ءوزى سولاي ايتقان دەي سالادى. راس، ءبىز «اعايىن كۇندەس» دەگەن فيلوسوفيالىق ۇعىمدى تۇيسىنگەن حالىقپىز. الايدا «اعايىن وكپەگە قيسا دا، ولىمگە قيمايدى»- مۇنى ايتقان دا قازاقتىڭ ءوزى.
تۇرىكتەر: «تۇرىكتىڭ دوسى - تۇرىك»-گۇلدەنگەن سايىن ءسۇي دەيدى، ال ءبىز قالايشا مىناۋ سوراقىلىقتىڭ استارىن تۇسىنبەي ءجۇرمىز؟ نەگە بىزدەر ات توبەلىندەي از حالىق، ءوز باۋىرىمىزدى جاتتان ارمەن كورىپ، قاس دۇشپان قىلىپ قاقساي بەرەمىز؟ ول قۇقىقتى كىم بەردى؟ جانە قاي زاماندا؟ عالامدانۋ الەمدى وراپ دوپشا دومالاتىپ بارا جاتقان الماعايىپ ساتتە. دۇنيەنى مەكەندەگەن تالاي ۇلت پەن ۇلىس قاڭباق شالعا اينالعانداي بۇلدىر كۇن كەشكەندە. اباي قازاقتىڭ عانا ەمەس، ءيىسى ادامزات ءناسىلىنىڭ ءالسىز تۇسىن ءدوپ تانيدى:
جاقسىلىعىڭ كۇندە ۇمىت،
ءبىر جاڭىلساڭ، بولدى كەك.
«قاجىماس دوس، حالىقتا جوق.»
راسىندا، ەر دانا (ەربول تىلەشوۆتىڭ تەڭەۋى) بابامىزعا وسىناۋ اداسقان جەگى ءسوزدى تاڭاتىنداي قاي تۇستان جاڭىلدى ەكەن جارىقتىق؟!
ءوزىڭ جالعىز، نادان كوپ،
ۇقتىراسىڭ سەن نە دەپ
اۋلەكى، ارسىز ەلگە ەندى؟
تىنىشتىق سۇيمەي قىشىنىپ،
وتىرىككە تۇشىنىپ،
پالەدەن تۇرماس شوشىنىپ،
تۇل بويىن جەلىك جەڭگەن-ءدى.
«كەلدىك تالاي جەرگە ەندى...»
سول باياعى قالىبىمىزدان ارىلمادىق پا؟ ءالى كۇنگە «وتىرىك پەن وسەككە / بايگە اتىنداي اڭقىلدار-» قازاق بولعانىمىز عوي.
اباي تىلگە بيپاز، ويعا ۇقىپتى قالىبىنان تانباسا دا وعان اۋىر جالا جابىلدى.
بەس-التى ميسىز باڭگى كۇلسە ءماز بوپ،
قيناماي قىزىل ءتىلدى كەل، ءتىلدى ال، قوي!
(«مەن جازبايمىن ولەڭدى ەرمەك ءۇشىن»)
ءماشھۇر-ءجۇسىپ: «قازاق تىلىنەن اسىل، قازاق تىلىنەن باي ءتىل جوق...ەگەر قازاق ءتىلىن بىلسە، ءدىن دە وسىندا، اۋليەلىك تە وسىندا». سونىڭ ءۇشىن قازاقتا ايتىلماعان ءسوز قالماعان. ءداستۇرلى دىندەردىڭ قاسيەتتى ءتورت كىتابىنداعى ادامزات اقىل-ويىنىڭ ساۋلەسى قازاقتىڭ كوكىرەگىنە بىتكەن. ۇلتىمىزدىڭ جانى قۋاتى بۇرقىراعان سوزىندە، ادامشىلىق قالىبى، يمانى مەن وبال-ساۋابى دا.
دانىشپان اباي تۇگىلى قازىرگى قازاقتىڭ قارشاداي قىزى، جاس اقىن نازگۇل بەردىقوجا:
قاعىنان بەزگەن قۇلانداي،
جايرادىڭ قانشا جۇتاپ كەپ.
قازاقتىڭ ءتىلى قۇرانداي،
كوكتەن ءبىر تۇسكەن كىتاپ بوپ.
ورالىپ كەلسەڭ وتكەندى،
ونەگە ءسوزدى تالدايسىڭ.
تىلىڭمەن بايلاپ كەتكەندى،
تىسىڭمەن شەشە المايسىڭ.
(«التىن تامىر» جۋرنالى №1.2008.)
قازاقتىڭ ءتىلى قۇرانداي-دەۋ عاجايىپ تەرەڭ تانىم!
بىزدەر سامارقاۋمىز. كەيدە كىتاپ اتاۋلىنى شالا-پۇلا، تۇسىنبەي وقيمىز. ايتپەسە، ابايداي قازىنالى قارتىنا، ەر داناسىنا مىناۋ قيانات، بىقسىق ءسوز تاڭىلماس ەدى.
ىنساپسىزعا نە كەرەك
ءىستىڭ اق پەن قاراسى؟
نان تاپپايمىز دەمەيدى،
بۇلىنسە ەلدىڭ اراسى.
يجديھاتسىز، ميحناتسىز
تابىلماس عىلىم ساراسى.
«ينتەرناتتا وقىپ ءجۇر»
«كوڭىلىڭدە جوق ساناسى»- بۇل ەندى مىنا ءبىز. ءبىر نارسە ايان. ابايشىل كورىنۋگە بەيىل بۇ قازاقتىڭ كوبى ۇلى اقىنىن دۇرىس اڭعارىپ وقىمايدى. بىلايشا ايتقاندا ىنساپسىز، ىقىلاسسىز وقيدى، سويتە تۇرا بىلگىشسيدى، ايتقانسيدى. ۇلتقا دەگەن ساتقىندىق تۋرالى گازەتتەردە ءجيى ايتىلىپ ءجۇر. حالىقتىڭ ماڭدايىنداعى باعىنا كەيدە وسى تەكتەس نەمقۇرايلىقتان تۋعان كەسىر ءسوز دە قاتەر توندىرەدى، ءسىرا.
ءتاڭىرى سۇيگەن ءسوزدى اۋەلدەن قازاق تۇسىنگەن، قاستەرلەگەن حالىق. اباي - بار قازاقتىڭ اقىل-ەسى، زامان ورلەردە بىتكەن بولمىس-ءبىتىمى، ۇلتتىق مۇددەسى ايقىن جادى. ابايدى قازاقتىڭ ماڭدايىنا بەرگەن ءبىر اللانىڭ ءوزى. اباي تۋعان ءداۋىردىڭ سۇسىن نىسانباي جىراۋ ولەڭىندە بەدەرلەيدى:
ويدا قوقان، قىردا ورىس،
حاكىم بولدى قالاسى.
كىمنەن تاياق جەگەندەي
ءبىزدىڭ قازاق بالاسى،
الدىرىپ جۇرگەن دۇشپانعا
ءوزدى-ءوزىنىڭ الاسى.
ول كەزەڭدەگى تايپالىق دەڭگەيدەگى ىدىراڭقى، بوسبەلبەۋ تىرلىكتىڭ ءسانى جوق. بۇل اتتاي ەكى ءجۇز جىل بۇرىنعى ءداۋىر ەدى.
شىن مانىندە ءبىزدىڭ بۇگىنگى قازاقتا شوشىنا ايتارلىق ترايباليزم جوق. بار دەپ قانشا دالەلدەسەك تە، ول كۇن كورىستىڭ قامىن كۇيتتەگەن ۇساق-تۇيەك توپتاسۋعا مۇددەلى پايداكۇنەمدىكتىڭ ءبىر كورىنىسى. مۇنىڭ شىن سىرىن كەشە عانا دۇنيەدەن وزعاندا قازاقتىقتىڭ التىن قازىعىن وزىمەن بىرگە الا كەتكەندەي اسەر ەتكەن مارقۇم اقسەلەۋ سەيدىمبەك پروتەكتسيونيزم دەپ اشىپ بەردى.
جەبىر ءسوز
اباي ايتپاعان جەگى ءسوز قازىر قازاقتىڭ ساناسىن بيلەپ، پەيىلىن بۇزىپ ءبىتتى. جەگى دەگەن نە؟ تاجالدىققا تاقاۋ سينونيم ەمەس پە؟ جەر استىنان جىك شىقتى، ەكى قۇلاعى تىك شىقتى دەيدى. ادامداردىڭ اراسىنا جىك تۇسەدى. ادامنىڭ اۋزىنداعى وتىز ەكى تىسىنە جىك، سىزات تۇسسە، ءتۇبى ءشىرىپ قۇريدى.
«جەگى» - بەلگىلى ساتيريك جازۋشى تابىل قۇلياستىڭ رومانىنىڭ اتى.
قۇلاعىن سالماس،
ءتىلىڭدى الماس
كوپ ناداننان ءتۇڭىلدىم.
ەكى كەمە قۇيرىعىن
ۇستا، جەتسىن بۇيرىعىڭ.
«سەگىز اياق».
اباي ايتقان: «جۇرتىم دەۋگە ارلىمىن،/وزگە جۇرتتان ۇيالىپ». وسىندايدان با ەكەن؟ سول ەكىۇشتىلىق، دۇرامالدىق، ءبىر نارسەنى ايقىن بىلمەي تۇرىپ، كەسىپ ايتۋ ابايدىڭ ءسوزىن ارسىز بۇرمالاۋدان كورىنىپ-اق تۇر.
قازاقتىڭ ۇلتتىق مىنەزى ۇساقتالىپ كەتكەنى راس. ونىڭ ءبىر سەبەبى قازاق ءوزىن-ءوزى بىرەسە جەر-كوككە سىيعىزباي ماقتايدى، بىرەسە ولتىرە جاماندايدى. شەگىنەن شىعۋ، ۇشقارىلىقتىڭ زيانىن ۇقپايتىنداي ارتىق كەتەدى. سوندايدا ءجيى كەلتىرەتىن ءۋاجى-اتاقتى ءتۇس - ابىلاي حاننىڭ ءتۇسى.
...ال ابىلايدىڭ تۇسىنە نەگە،
باقا مەن شايان، ءبۇيى كىردى ەكەن؟!
داۋلەتكەرەي كاپۇلى «ەلەگىزۋ» اتتى ولەڭىندە ريتوريكالىق ساۋال تاستايدى. قازاقتىڭ ءبىرتالاي اقىندارى ابىلايدىڭ ءتۇسىن فيلوسوفياعا اينالدىرىپ العان، ولەڭ جازسا ءجيى قايتالايدى. وسى ءتۇستى نەگە ۇمىتقىمىز كەلمەيدى؟ ابىلاي حان ول ءتۇسىن ءبىر-اق رەت كوردى عوي، بەلگىلى ءبىر تاريحي كەزەڭدە ايان ءتۇس راسقا شىقتى. الايدا ءبىر ءتۇستىڭ ايانى اي جاڭالاپ تۋعانداي، جىل ون ەكى ايداي اينالىپ كەلە بەرۋى ءتىپتى دە مۇمكىن ەمەس. ابىلايدىڭ جەگى ءتۇسىن اكسيوماعا اينالدىرىپ العان تاعى مىنا بىزدەر، قالاممەن كۇن كورەتىندەر. كوبىنەسە، ماقالانىڭ، يا نەمەسە ولەڭنىڭ تۇزدىعى رەتىندە ءسۇيىپ جازامىز. ايتپەسە، كوك ءبورىنى انا تۇتىپ، ءتۇز تاعىسىنىڭ ءوزىن اتىمەن اتاماي، «يت-قۇس»، «ۇلىما» دەپ تابۋ ارقىلى سويلەيتىن ادەبى زور اتانىڭ بالاسى ەدىك. بۇعان قانداي ءۋاج ايتاسىز؟
ابايدىڭ دانالىعىن، اۋليەلىگىن مويىندايمىز. اباي ءبىر توبە، ءبىز ءبىر بولەك بولماۋىمىز كەرەك. ۇلتىن ءسۇيۋدى ابايدان ۇيرەنسەك ۇتىلمايمىز. قازاقتىڭ ءار قيىرىندا اسان قايعىنىڭ سارىنىمەن ەلىم-جۇرتىم دەپ ەگىلە ۋايىمدايتىن كونە كوز قاريالاردىڭ قاتارىن قازىر دىمبىلمەستەر باسىپ بارادى.
قازاقتىڭ بۇرىنعى كىسىلەرى زامانا اۋىسۋىن اۋىر قابىلداۋى زاڭدىلىق. «قۇيرىعى جوق، جالى جوق، قۇلان قايتىپ كۇن كورەر» - ۇلى گۋمانيزمگە باعىپ، كۇڭىرەنگەن دالا فيلوسوفياسى - اسان قايعىنىڭ ماقامىن ءداستۇر بەرتىنگە دەيىن ساقتاپ كەلدى. بىراق قازاقتىڭ ءبىر قارياسى ايتقان «باسى بار، قۇلاعى جوق زامان تۋدى» دەۋى شىنىندا تەرەڭ فيلوسوفيالىق تامىر تارتادى ەمەس پە؟ انا ءتىلىن بىلمەيتىن قازاقتىڭ راسىمەن باسى بار، قۇلاعى ساڭىراۋ، كوكىرەگى بىتەۋ، ءوزىن-ءوزى تانۋعا قۇلقى دا، پەيىلى دە جوق. بابا ابايدىڭ اللاشىل رۋحى ريزا بولسىن، وزىنە جابىلعان سۇرقيا قارالاۋدان ايىقسىن دەپ اق قاعازعا قارا سيامەن وسى ويلارىمدى جازدىم. اباي قالىڭ ەلى قازاعى عانا ەمەس، «ادامزاتتىڭ ءبارىن ءسۇي، باۋىرىم دەپ» -اللاشىلدىقتىڭ نۇرىن ۋاعىزداعان ۇلى اقىن ەكەنىن بىلە تۇرا نەگە تەرىس ويلايمىز؟!
ابايتانۋشى عالىمدار، ءسوزدىڭ ءتۇبىن تۇسىرەتىن اقىن-جازۋشىلار، فيلوسوفتار سەلت ەتپەي قالماس، انىق ابايىن ءدۇبارا، كەسەلدى سوزدەن اراشالاپ الار، ءسويتىپ قازاقتىڭ قۇت-بەرەكەسىن، ىرىسىن ساقتاۋعا ينەنىڭ جاسۋىنداي ۇلەس قوسسا، كوپتىڭ تىلەۋى قابىل بولار دەگەن ءۇمىت كوكىرەكتە سونبەيدى.
ايگۇل كەمەلباەۆا
جازۋشى، ادەبيەتتانۋشى، كينودراماتۋرگ
«شۇعىلا» جۋرنالى
Baiolke.com cايتى
تۇپنۇسقاداعى تاقىرىپ: "اباي ايتپاعان جەگى ءسوز"
