قر پرەمەر-ءمينيسترى اسقار مامين تۇركىستان قالاسىندا مەملەكەت باسشىسىنىڭ قالانى دامىتۋ تۋرالى تاپسىرماسىن ىسكە اسىرۋ جونىندە كەڭەس وتكىزدى، دەپ حابارلايدى ەل ۇكىمەتىنىڭ رەسمي سايتى.

كەڭەس بارىسىندا قالادا ءومىر ءسۇرۋ جاعدايلارىن قامتاماسىز ەتۋ جانە قۇرىلىس سالۋ، ونىڭ ىشىندە ينجەنەرلىك ينفراقۇرىلىم جۇرگىزۋ، سونداي-اق ەكونوميكا جانە بيزنەستىڭ، ءتۋريزمنىڭ ءوسۋىنىڭ جاڭا باستاۋى رەتىندە دامىتۋ پەرسپەكتيۆالارى قارالدى.

«ەلباسى ءوزىنىڭ تاريحي شەشىمىمەن تۇركىستان وبلىسىن قۇرىپ، تۇركىستان قالاسىن جاڭا وبلىس ورتالىعى عانا ەمەس، سونىمەن بىرگە بۇكىل تۇركى دۇنيەسىنىڭ مادەني-رۋحاني ورتالىعى رەتىندە دە دامىتۋدى تاپسىردى»، — دەپ ا. مامين، "مەملەكەت باسشىسىنىڭ ستراتەگيالىق شەشىمىنىڭ ارقاسىندا بۇل ايماقتىڭ وركەندەۋىنە قارقىندى سەرپىن بەرىلگەنىن" اتاپ ءوتتى.

پرەمەر-مينيستر تۇركىستاندا اۋقىمدى قۇرىلىس جۇمىستارى باستالعانىن ايتتى. پرەزيدەنت تاپسىرماسىن ورىنداۋ ماقساتىندا ۇكىمەت تاراپىنان ناقتى شارالار قولعا الىنعان. ماسەلەن، بيۋدجەتتى ناقتىلاۋ اياسىندا قۇرىلىسقا قاتىستى بارلىق ۇسىنىستار قولداۋعا يە بولىپ، قاجەت قارجى تولىعىمەن بەرىلەتىن بولدى، جوبالاردى ىسكە اسىرۋ ارقىلى ينجەنەرلىك-كوممۋنيكاتسيالىق، كولىك ينفراقۇرىلىمىن جۇرگىزۋ قامتاماسىز ەتىلەدى، سونداي-اق قۇرىلىس جۇمىستارىنىڭ قارقىنىن ارتتىرۋ ماقساتىندا قولدانىستاعى زاڭنامالىق اكتىلەرگە وزگەرىستەر ەنگىزۋ جۇمىستارى اتقارىلىپ جاتىر.

تۇركىستاندا قۇرىلىس جۇرگىزۋ بويىنشا پرەزيدەنت تاپسىرمالارىن ورىنداۋ بارىسى جانە قالانى دامىتۋ بويىنشا بۇدان كەيىنگى جوسپارلار تۋرالى تۇركىستان وبلىسىنىڭ اكىمى ءو. شوكەەۆ باياندادى. مادەنيەت جانە سپورت ۆيتسە-ءمينيسترى ە. كوجاعاپانوۆ، يندۋستريا جانە ينفراقۇرىلىمدىق دامۋ ۆيتسە-ءمينيسترى — ق. وسكەنباەۆ، ەنەرگەتيكا ۆيتسە-ءمينيسترى — م. مىرزاعاليەۆ، ءوز كەزەگىندە، تاريحي-مادەني ورتالىقتى اباتتاندىرۋ، يۋنەسكو-مەن جوسپارلانعان رەكونسترۋكتسيا جۇمىستارىن كەلىسۋ بارىسى، كول-كولىك ينفراقۇرىلىمىن جانە تكش نىعايتۋ، سۋمەن جابدىقتاۋ جانە سۋ تارتۋ، گازبەن، جىلۋمەن جانە ەلەكتر قۋاتىمەن جابدىقتاۋ جۇيەلەرىمەن قامتاماسىز ەتۋ بويىنشا اتقارىلىپ جاتقان جۇمىستار تۋرالى باياندادى. «قازاقتەلەكوم» اق باسقارما توراعاسى ق. ەسەكەەۆ Smart City جوباسىن دامىتۋ جوسپارلارى تۋرالى مالىمدەدى.

ەلباسى تاپسىرماسىنا سايكەس ەلىمىزدىڭ ءاربىر ءوڭىرى تۇركىستان قالاسىندا جەكەلەگەن ينفراقۇرىلىمدىق جوبالاردى ازىرلەۋمەن جانە سالۋمەن اينالىسىپ جاتقانىن ايتا كەتكەن ءجون. وسىعان بايلانىستى، پرەمەر-مينيستر سەلەكتورلىق رەجيمدە وبلىس جانە استانا، الماتى، شىمكەنت قالالارىنىڭ اكىمدەرىنىڭ اتقارىلىپ جاتقان جۇمىستار تۋرالى باياندامالارىن تىڭدادى. سونداي-اق، كەڭەس بارىسىندا وبلىستى دامىتۋعا جانە نىسانداردى سالۋعا بەلسەندى تۇردە قاتىسىپ جاتقان قۇرىلىس كومپانيالارىنىڭ باسشىلارى ءسوز سويلەدى. ولاردىڭ قاتارىندا، Build Investment Group حولدينگىنىڭ پرەزيدەنتى ا. راحىمباەۆ، Highvill Kazakhstan باس ديرەكتورى كانگ دجون دە، «بازيس-ا» ديرەكتورى ا. بەلوۆيچ، «مابەتەكس گرۋپپ» پرەزيدەنتى ا. پاكوللي، Sembol Construction اق تەحنيكالىق دەپارتامەنت ديرەكتورى ي. سەلدجۋك بولدى.

«مەملەكەت باسشىسى تۇركىستان قالاسىنىڭ دامۋىنا ەرەكشە كوڭىل ءبولىپ وتىر»، — دەپ پرەمەر-مينيستر «ءاربىر نىسانعا جاۋاپتى ناقتى باسشى بەكىتىلگەنىن، ونى ورىنداۋدىڭ ناقتى مەرزىمى بەلگىلەنگەنىن» اتاپ ءوتتى.

العا قويىلعان مىندەتتەردى ءتيىمدى شەشۋ بويىنشا ۇيلەسىمدى جۇمىس اتقارۋ كەرەك. بارلىق وڭىرلەردىڭ قاجەتتى رەسۋرستارى بار.

«ءبىز ورتاق كۇش-جىگەرىمىزدى جۇمىلدىرىپ، مەملەكەت باسشىسى العا قويعان تاپسىرمالاردى ىسكە اسىرۋعا بىردەن كىرىسۋىمىز كەرەك»، — دەپ ا. مامين، تۇركىستاندى اسا دامىعان وبلىس ورتالىعىنا جانە ۇلكەن تۋريستىك، مادەني جانە رۋحاني ورتالىققا اينالدىرۋ قاجەت ەكەنىن ايتتى.

Abai.kz