ەلباسى نۇرسۇلتان نازارباەۆ ءبىر جىل بۇرىن پرەزيدەنتتىڭ بەس الەۋمەتتىك باستاماسى دەپ اتالاتىن ۇندەۋ جاريالاعان بولاتىن. ونداعى ءۇشىنشى باستاما - “جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ” دەپ اتالادى. وسىعان سايكەس ەلىمىزدە بىرقاتار شارالار اتقارىلىپ جاتىر.

ماسەلەن، بۇگىندە وڭتۇستىك استانادا جاتاقحانالار سانى وسكەن. الداعى ەكى جىلدا الماتىدا 20 مىڭ ورىندىق 42 جاتاقحانا سالىنادى. ال، ولاردىڭ بەسەۋى بيىل قولدانىسقا بەرىلمەك. ماسەلەن، بۇگىندە ق.ساتباەۆ اتىنداعى ۋنيۆەرسيتەتكە تيەسىلى ەكى قاباتتى عيماراتقا كۇردەلى جوندەۋ جۇمىستارى ءجۇرىپ جاتىر. بۇرىن كوللەدج بولعان بۇل نىسان ەندى از ۋاقىتتا زامان تالابىنا ساي جابدىقتالعان جاتاقحاناعا اينالماق. جالپى، ساتباەۆ ۋنيۆەرسيتەتىندە 3 جارىم مىڭعا جۋىق ستۋدەنت جاتاقحاناعا مۇقتاج. قازىر ۋنيسۆەرسيتەت 2 مىڭنان استام جاستى ستۋدەنتتەر ۇيىمەن قامتاماسىز ەتىپ وتىر. ۋنيۆەرسيتەتتىڭ دەپارتامەنت ديرەكتورى امانجول كەنجەحانۇلىنىڭ ايتۋىنشا، قالا اكىمشىلىگىنەن ۋنيۆەرسيتەتكە بولىنگەن بوس جەر بار. سول جەرگە 3 جاتاقحانا سالۋ جوسپارلانىپ وتىرعان كورىنەدى. ال، رەكونسترۋكتسيا جاساپ جاتقان عيمارات 265 ادامعا ارنالعان جاتاقحانا بولادى ەكەن. بۇدان بولەك، ساتباەۆ ۋنيۆەرسيتەتى العاباس ىقشام اۋدانىنان 1200 ادامعا ارنالعان زاماناۋي ستۋدەنتتىك كامپۋس سالماقشى.

سونىمەن قاتار پرەزيدەنت باستاماسىنا دىنمۇحامەد قوناەۆ اتىنداعى ەۋرازيالىق زاڭ اكادەمياسى دا ءۇن قوسپاق. بۇل وقۋ ورنىندا قازىر 500 ورىندىق جاتاقحانا سالىنىپ جاتىر. د.قوناەۆ اتىنداعى ەۋرازيالىق زاڭ اكادەمياسىنىڭ پرورەكتورى باقىت شاكىروۆتىڭ ايتۋىنشا، ۋنيۆەرسيتەتكە شەتتەن كەلىپ تۇسكەن ءار بالانىڭ كۆارتيرا جالداپ، ۇلكەن قارجات شىعارماۋى ءۇشىن ۋنيۆەرسيتەت جاتاقحانا قۇرىلىستارىن جوسپارلاپ، سالىپ جاتقان كورىنەدى. پرورەكتوردىڭ ايتۋىنشا، ۋنيۆەرسيتەتتە شاڭىراق كوتەرگەن ستۋدەنتتەرگە دە ارنايى بولمەلەر جاساقتالعان.

ال، جاتاقحانا قۇرىلىسىنىڭ ارحيتەكتورى بەرىك دالدەنباەۆتىڭ سوزىنشە، جاتاقحاناعا ساپالى قۇرىلىس ماتەريالدارى قولدانىلىپ، ءتيىستى تالاپتار مۇقيات ساقتالادى. ايتا كەتۋ كەرەك، قۇرىلىس ءجۇرىپ جاتقان جەردىڭ استىندا نەگىزىنەن جەرتولە بار. ونىڭ استىندا 1,5 مەترلىك پليتا قۇيىلعان. سول پليتانىڭ ۇستىنە 500/500 كولوننالار قويىلىپ، ءتورتىنشى قاباتقا دەيىن، ودان ارى قاراي 400/400 كولوننالارمەن كەتەدى. ونىڭ ءبارى ەسەپ بويىنشا نورمالىق تالاپتار بويىنشا جاسالىنعان.

جالپى ەلدەگى ۋنيۆەرسيتەتتەردىڭ 39-ى الماتىدا ورنالاسقان. ولاردا وزگە وڭىرلەردەن كەلگەن 93 مىڭ ستۋدەنت وقيدى. سوندىقتان قالادا جاتاقحانا قۇرىلىسىنا ەرەكشە ءمان بەرىلىپ وتىر. ستۋدەنتتىك ءۇي سالۋعا اۋماعى 15 گەكتار بولاتىن 25 جەر تەلىمى بولىنگەن. ونىڭ ىشىندە 11 جەر تەلىمىن اكىمدىك مەملەكەتتىك قور ەسەبىنەن بەرسە، قالعاندارى ۋنيۆەرسيتەتتەرگە جاساعان رەۆيزيادان كەيىن انىقتىلدى. ناتيجەسىندە، قالادا الداعى ەكى جىلدا 20 مىڭ ورىندىق 42 جاتاقحانا سالىناتىن بولادى.

Abai.kz