قازاقستاندىق مانەرلەپ سىرعاناۋشى، 2026 جىلعى وليمپيادا چەمپيونى ميحايل شايدوروۆ سوڭعى بەس ايدان بەرى جالاقى الماي جۇرگەنىن مالىمدەدى.

بۇل تۋرالى سپورتشى تيمۋر بالىمبەتوۆكە بەرگەن كولەمدى سۇحباتىندا ايتتى.

شايدوروۆتىڭ سوزىنشە، ماسەلە ونىڭ 2025 جىلعى تابىسى تۋرالى جاريالانعان ەسەپتى سىناعانىنان كەيىن باستالعان. سپورتشى ول قۇجاتتا تەك جالاقىسى مەن باپكەرلەرگە تولەنگەن قاراجات كورسەتىلىپ، ال دايىندىققا كومەكتەسكەن وتباسى مەن دەمەۋشىلەردىڭ ەڭبەگى ەسكەرىلمەگەنىن ايتتى.

– وليمپياداداعى جەڭىستەن بەرى بەس اي ءوتتى، ءالى كۇنگە دەيىن جالاقى العان جوقپىن، – دەدى ول.

سپورتشىنىڭ ايتۋىنشا، قازىرگى جاعدايدا جاڭا باعدارلامالار دايىنداۋ، جاتتىعۋ جيىندارىن ۇيىمداستىرۋ جانە كەلەسى ماۋسىمعا جوسپار قۇرۋ قيىنداعان.

سونىمەن قاتار ميحايل شايدوروۆ 1 اقپاننان بەرى رەسمي تۇردە دارىگەرلىك باقىلاۋسىز قالعانىن ايتتى. ونىڭ سوزىنشە، مانەرلەپ سىرعاناۋ – جاراقات قاۋپى جوعارى سپورت ءتۇرى بولعاندىقتان، تۇراقتى مەديتسينالىق قولداۋ اسا ماڭىزدى.

شايدوروۆ – تاۋەلسىز قازاقستان تاريحىنداعى مانەرلەپ سىرعاناۋدان وليمپيادا التىنىن العان العاشقى سپورتشى. بۇعان دەيىن ول الەم چەمپيوناتىنىڭ كۇمىس جۇلدەسىن، ءتورت قۇرلىق چەمپيوناتىنىڭ التىنىن جانە گران-پري كەزەڭدەرىنىڭ مەدالدارىن جەڭىپ العان.

سپورتشى وليمپيادادان كەيىن تۋريزم جانە سپورت مينيسترلىگى مەن مانەرلەپ سىرعاناۋ فەدەراتسياسىنا سپورتتى دامىتۋ جونىندە ۇسىنىستار جولداعانىن دا ايتتى. ونىڭ ىشىندە حالىقارالىق لوببي، تورەشىلەر دايارلاۋ جانە ۇزدىك سپورتشىلاردى قولداۋ ماسەلەلەرى كوتەرىلگەن.

الايدا، سپورتشىنىڭ ايتۋىنشا، فەدەراتسيادان وعان قاتاڭ جاۋاپ كەلگەن. وندا شايدوروۆتى جۇيەنىڭ جۇمىسىن ءۇستىرت تۇسىنەدى دەپ ايىپتاپ، قازاقستاندىق تورەشىگە قارسى قىسىم ۇيىمداستىردى دەگەن كىنا تاعىلعان.

– ەگەر مۇنداي جاعداي وليمپيادا چەمپيونىمەن بولىپ جاتسا، باسقا سپورتشىلاردىڭ جاعدايىن ەلەستەتۋ قيىن، – دەدى ول.

سوعان قاراماستان سپورتشى جاتتىعۋىن توقتاتپاعانىن ايتتى. قازىر ول كۇنىنە بىرنەشە ۋاقىت مۇز ايدىنىندا دايىندالىپ، كەلەسى وليمپيادالىق تسيكلگە قاتىسۋدى جوسپارلاپ وتىر.

سونداي-اق شايدوروۆ قازاقستاندا جەكە مۇز شوۋىن وتكىزۋدى قولعا العانىن مالىمدەدى. ونىڭ ايتۋىنشا، شوۋ جەلتوقساندا ءوتىپ، وعان الەمنىڭ تانىمال مانەرلەپ سىرعاناۋشىلارى شاقىرىلۋى مۇمكىن.

ازىرگە تۋريزم جانە سپورت مينيسترلىگى مەن مانەرلەپ سىرعاناۋ فەدەراتسياسى سپورتشىنىڭ مالىمدەمەسىنە قاتىستى رەسمي پىكىر بىلدىرمەدى.

دەرەككوزى: zhasalash.kz

Abai.kz