كۇنى كەشە عانا Abai.kz اقپاراتتىق پورتالى جازعان ماسەلەگە قاتىستى بۇگىن استانا قالاسىنىڭ پوليتسيا دەپارتامەنتى رەداكتسيامىزعا رەسمي جاۋاپ قايتاردى.

استانا پوليتسيا دەپارتامەنتىنىڭ تۇسىندىرمەسىندە:

«پوليتسيا قىزمەتكەرلەرى ۇلى جازۋشىنىڭ ەسكەرتكىشىنە قۇرمەتسىزدىك تانىتقان قىزدى انىقتادى. الەۋمەتتىك جەلىلەردە قىزدىڭ فوتوسۋرەتكە ءتۇسۋ بارىسىندا بەيىمبەت ءمايليننىڭ ەسكەرتكىشىنە شىعىپ، مادەني نىسان مەن قوعامدىق ورىنعا قۇرمەتسىزدىك تانىتقانى بەينەلەنگەن ۆيدەو تارادى.

پوليتسيا قىزمەتكەرلەرى 18 جاستاعى استانا تۇرعىنىن انىقتاپ، «بايقوڭىر» اۋدانى پوليتسيا باسقارماسىنا جەتكىزدى. قۇقىق بۇزۋشى ۇساق بۇزاقىلىق جاساعانى ءۇشىن جاۋاپتىلىققا تارتىلدى.ماتەريالدار شەشىم قابىلداۋ ءۇشىن سوتقا جولداندى»، - دەلىنگەن.

سونىمەن قاتار، پوليتسيا وسىنداي ارەكەتتەرگە جول بەرىلمەيتىنىن جانە مادەنيەت نىساندارى مەن تاريحي مۇرالارعا ۇقىپتى ءارى قۇرمەتپەن قاراۋ قاجەتتىگىن ەسكەرتەدى.

سونداي-اق ەسكەرتكىشتەردى، مادەنيەت جانە تاريحي مۇرا نىساندارىن قاساقانا ءبۇلدىرۋ ۆانداليزم رەتىندە باعالانىپ، زاڭدا بەلگىلەنگەن جاۋاپكەرشىلىككە، سونىڭ ىشىندە قىلمىستىق جاۋاپتىلىققا اكەپ سوعاتىنىن ەسكە سالامىز.

Abai.kz