بۇل كەلىنشەك كۇيەۋىن سەبەپسىز ۇستاعانىن ايتىپ، پوليتسەيلەردىڭ ارتىنان جۇگىرىپ ءجۇردى. قولىنداعى ءسابيى جىلاپ، اينالانى ازان-قازان ەتتى.

كەشە قازاقستان اۋماعىندا جۇمىسىنا تىيىم سالىنىپ، ەكسترەميستىك ۇيىم دەپ تانىلعان "قدت" (دۆك) ۇيىمىنىڭ جەتەكشىسى مۇحتار ابلازەۆ ەلىمىزدىڭ باستى قالالارىندا نارازىلىق شەرۋىن وتكىزۋگە ۇندەۋ جاريالاعان ەدى. سوعان وراي الماتى قالاسىندا ءتارتىپ كۇشەيتىلىپ، "قدت" ۇيىمىنىڭ ميتينگىسى وتپەي قالدى. Abai.kz اقپاراتتىق پورتالىنىڭ ءتىلشىسى وقيعا ورنىنا بارىپ، جاعدايدى ءوز كوزىمەن كورىپ قايتتى. 

دەسە دە، ساعات 6-30-دار شاماسىندا الماتى قالالىق ىشكى ىستەر دەپارتامەنتى قىزمەتكەرلەرى تولە بي مەن پانفيلوۆ كوشەلەرىنىڭ قيىلىسىندا ەلۋگە جۋىق ادامدى ۇستادى.

ۇستالعانداردىڭ اراسىندا ايەل ازاماتتار دا بولدى.

پوليتسەيلەر نەگىزىنەن كۇدىكتى كورىنگەن ادامداردىڭ قۇجاتتارىن تەكسەردى.

ءبىرلى-جارىم ازامات بولماسا، حالىققا ۇران تاستاعان ەشكىم بولمادى.

كەي جىگىتتەر كۇشپەن اۆتوزاكتارعا توعىتىلدى.

وسى وقيعانى كوزبەن كورىپ، جۇرەگى سىر بەرگەن مىنا ازاماتشانى "جەدەل جاردەم" الىپ كەتتى.

ومون قىزمەتكەرلەرىنىڭ دەنى قالاداعى ءتارتىپتى باقىلاپ تۇردى.   

ارنايى جاساق كوبىنە بەتپەردەلەرىن شەشىپ تاستاپ ءجۇردى.

كەشە ەكسترەميستىك ۇيىم سانالاتىن قدت ۇيىمى نارازىلىق شاراسىن الماتى قالاسىنىڭ اباي جانە بايتۇرسىنوۆ كوشەلەرىنىڭ قيىلىسىنان باستاپ، استانا الاڭىنا دەيىن شەرۋلەتىپ كەلمەك بولعان. پوليتسيا مەن ارنايى جاساق ساربازدارى وسى ايماقتاردى قورشاۋعا الىپ، رەسمي رۇقسات ەتىلمەگەن ميتينگ وتپەي قالدى.

ءتۇيىن

قر باس پروكۋراتۋراسىنىڭ مالىمەتىنشە سوڭعى كۇندەرى رۇقسات ەتىلمەگەن زاڭسىز ميتينگكە قاتىسقان 957 ادام ۇستالعان. ونىڭ 670-ءى قامالىپ، 115-ىنە ايىپپۇل سالىنعان. 172 ازاماتقا ەسكەرتۋ بەرىلىپ، بوساتىلعان. باس پروكۋراتۋرا ءالى دە زاڭسىز ميتينگكە شىققاندار قاتاڭ جازالاناتىنىن ەسكەرتەدى.

نۇراي كەمەل

Abai.kz