پراگادا تاعى دا نارازىلىق! حالىقتىڭ بىرنەشە ايدان بەرى كوڭىلى الاڭ. "ۇكىمەت باسشىسى ەۋروپا وداعى بەرگەن اقشانى تالان-تاراجىعا سالدى، ورنىمەن جۇمساي المادى" دەيدى. ءۇش اپتا بۇرىن قالاداعى ۆاتسلاۆ الاڭىنا 120 مىڭ ادام جينالىپ، پرەمەر-مينيستر اندرەي ءبابيشتىڭ قىزمەتتەن كەتۋىن تالاپ ەتكەن. سول كەزدە سوڭعى 30 جىلداعى ەڭ ۇلكەن نارازىلىق جيىنى دەپ باعا بەرگەن.

بۇگىن لەتنا دەگەن پارككە كەپ جاتىر. 250 مىڭداي بولدى دەيدى. قىزىعى - پاركتە تۇسكى 12 كەزىندە ەلۋ-الپىس دارىگەر مەن جاسىل جيلەت كيگەن ءبىر توپ ادام (جۋرناليستەرگە ۇقسامايدى) ءجۇردى. دارىگەرلەرى تۇسىنىكتى. ال جيلەتتىلەردىڭ جايىن كەيىن ءبىلدىم. ولار نارازىلىققا كەلگەندەرگە جول سىلتەۋشى، قاي جەرگە بارۋ، قايدا تۇرۋ كەرەك ەكەنىن ءتۇسىندىرۋشى ەرىكتىلەر ەكەن.

ساعات 13 شاماسىندا پوليتسيا جينالدى. بىزدەگىدەي بەتىن جاپقان، ماسكا كيگەندەرىن كورمەدىم. كوبىنىڭ ءجۇزى اشىق، بەتى جارقىن. ال دەمونستراتسياعا قاتىسۋشىلار ساعات 14 شاماسىندا كەلە باستادى. ءنوپىر xالىق. جەر قايىسادى. سامساعان "سارى قول". چەxيانىڭ بۇكىل قالاسىنان كەلىپتى دەسەدى. قالاارالىق اۆتوبۋستار مەن پويىزدارعا بيلەت ءبىر اپتا بۇرىن تاۋسىلىپ قاپتى. جينالعانداردىڭ ءبارى دە كوڭىلدى دەۋگە بولادى. تۇنەرگەن، قورىققان ەشكىمدى بايقامادىم. قۇددى ءبىر تويعا كەلگەندەي. بالاسىن ەرتكەن، جەتەكتەگەن، سۇيرەگەن ەل. كارى-جاسى ارالاس. قولىنان كەلگەنى ۇلكەن باننەر، كەلمەگەنى ءبىر پاراققا ءوز پىكىرىن جازىپ العان. اگرەسسيا دا جوق. بىرەۋدى بىرەۋ جۇلقىلاعان، ساباعان نەمەسە بالاعاتتاپ جاتقاندارىن دا بايقامادىم.

نارازىلىققا شىعۋدىڭ مادەنيەتىن جاقسى مەڭگەرىپتى. ەڭ نەگىزگى تالاپ - ءبابيشتىڭ ورنىنان كەتۋى. ال چەxياداعى ەڭ باي ەكى ادامنىڭ ءبىرى بابيش كەتكىسى كەلمەيدى. جۇرە تۇرعىسى بار بيلىكتە. ەكى جىلى بۇرىن عانا كەلىپتى بۇل ورىنعا. ول نارازىلىقتار تۋرالى "چەxيا xالقى توڭىپ ەمەس، تويىپ سەكىرىپ ءجۇر" دەپتى.

P/S: نارازىلىققا ارنايى بارمادىم. وتباسىممەن پاركتە قىدىرىپ جۇرگەندە كورگەنىم. "پوليتسيا ءبارىن ۇستاپ اكەتۋى مۇمكىن" دەگەن ءسىڭىپ قالعان ۇرەي مە، الدە شىنىمەن شارشادىق پا، كەشكە قاراي ۇيگە تەزىرەك قايتىپ كەتتىك. 

نۇربەك ءتۇسىپحاننىڭ facebook پاراقشاسىنان

Abai.kz