قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا حالىقتىڭ از قامتىلعان توبىن، سونىمەن قاتار جۇمىس ىستەيتىن جاستاردى باسپانامەن قامتۋ شارالارى تۋرالى قر يندۋستريا جانە ينفراقۇرىلىمدىق دامۋ ءمينيسترى رومان سكليار باياندادى.   

قر يدم دەرەكتەرى بويىنشا، «نۇرلى جەر» باعدارلاماسىنىڭ اياسىندا كوپ بالالى وتباسىلار ءۇشىن تۇرعىن ءۇي ساتىپ الۋعا جانە سالۋعا قارجى قاراستىرىلدى. رەسپۋبليكالىق بيۋدجەتتەن جىلىنا 2 ملرد تەڭگە ءبولۋ جوسپارلانۋدا نەمەسە 7 جىلدا 150 ملرد تەڭگەنى قۇرايدى. جىل سايىن تۇرعىن ۇيمەن 6 مىڭ كوپ بالالى وتباسى قامتاماسىز ەتىلەتىن بولادى. 7 جىلدا 40 مىڭ وتباسى. وسى جىلدىڭ مامىر ايىنان باستاپ 1480 كوپ بالالى وتباسىعا باسپانا بەرىلدى.

نۇر-سۇلتان، الماتى، شىمكەنت قالالارىنداعى جۇمىس جاسايتىن جاستاردىڭ ەڭبەك موبيلدىلىگىن قامتاماسىز ەتۋ ءۇشىن 2019-2021 جىلدارى جىلىنا 1 مىڭ جالدامالى پاتەرلەردىڭ قۇرىلىسى جوسپارلانعان.

«مەملەكەت باسشىسىنىڭ تاپسىرماسىنا سايكەس جۇمىس جاسايتىن جاستار ءۇشىن جالدامالى تۇرعىن ۇيلەردى ساتىپ الۋعا جانە سالۋعا قارجىلاندىرۋ كولەمى ۇلعايۋدا. بۇل بىزگە جۇمىس جاسايتىن جاستارعا 2019, 2020 جانە 2021 جىلدارى 3 مىڭ جالدامالى پاتەردەن بەرۋگە مۇمكىندىك بەرەدى»، — دەدى ر. سكليار.

قر تۇرعىن ءۇي قۇرىلىس جيناق بانكى كوپ بالالى، تولىق ەمەس وتباسىلارعا جانە مۇگەدەك بالالارى بار وتباسىلارعا تۇرعىن ءۇي الۋعا جىلدىق 2%-بەن 10% العاشقى جارنامەن جەڭىلدەتىلگەن نەسيە بەرۋدى باستادى. بۇل ماقساتتارعا ءۇش جىل ىشىندە 150 ملرد تەڭگە ءبولۋ قاراستىرىلعان. جىل سايىن الەۋمەتتىك كومەكپەن 6 مىڭ وتباسى قامىلاتىن بولادى.

قر ۇلتتىق بانكىمەن بىرگە جالدامالى تۇرعىن ءۇيدى دامىتۋعا جەكە ينۆەستورلاردى تارتۋ تەتىگى ازىرلەنۋدە، وسىنىڭ ەسەبىنەن قوسىمشا 10 مىڭ جالدامالى پاتەر سالۋعا مۇمكىندىك بەرەدى جانە جىلىنا 20 مىڭ وتباسىنى باسپانامەن قامتاماسىز ەتەدى.

الەۋمەتتىك تۇرعىن ءۇيدى ۇيلەستىرۋ تەتىگىن جەتىلدىرۋ جانە بۇل پروتسەسستەردىڭ ايقىندىلىعىن جوعارىلاتۋ بويىنشا جۇمىستار جۇرگىزىلىپ جاتىر. بۇل ءۇشىن بىرىڭعاي رەسپۋبليكالىق اۆتوماتتاندىرىلعان كەزەكتە تۇرۋشىلاردىڭ بازاسى قۇرىلۋدا. ازاماتتار ءوز كەزەكتەرىنىڭ جىلجۋىن ونلاين رەجيمدە قاداعاي الادى.

«جالپى قابىلدانىپ وتىرعان شارالار تۇرعىن ۇيگە مۇقتاج ازاماتتاردىڭ ماسەلەسىن قىسقا مەرزىمدە شەشۋگە مۇمكىندىك بەرەدى. مەملەكەت باسشىسىنىڭ بارلىق تاپسىرمالارى ۋاقىتىلى جانە تولىق ورىندالاتىن بولادى»، — دەدى مينيستر.

Abai.kz