ءبىز بار عوي، اتام زاماننان شەكارا ماسەلەسىن شەت قالدىرمايتىن ەل ەكەنبىز. وسىنداي ەلدىگىمىزگە ءبىر كەۋدە كوتەرىپ قويساق بولادى-اۋ دەيمىن.

كەشەگى قاسىم حان، تاۋەكەل، ەسىم حانداردان باستالعان شەكارا مەن ەل بۇتىندىگى جولىنداعى كۇرەستەرىمىز الاشورداشىلاردىڭ تۇسىندا جالعاسىپ، تاۋەلسىزدىگىمىزدىڭ العاشقى ون جىلدىعىندا تولىق شەشىمىن تاپقان سياقتى. ارينە، مەن دە الا باعانداردىڭ ار جاعىندا قالعان اتا-بابامنىڭ جەرىنە ءىشىم ۋداي اشيدى، يمپەريالىق رۋح پەن سانامىز جاڭعىرىپ اتقا مىنگەن كۇندەرى ول جەرلەردى قايتارىپ تا الارمىز. ازىرگە بارعا ءتاۋبا!

بۇنى ايتىپ وتىرعان سەبەبىم: 30 جىلدىڭ شەگىندە مىنا قىرعىز اعايىندار تاجىكپەن اراسىنداعى جەردىڭ مەملەكەتتىك مارتەبەسىن ناقتىلاپ الۋعا كوڭىل بولمەي كەلىپ ەدى، وتكەندە سونىڭ سۇمدىعىن كورە جازدادى. قىرعىز بەن تاجىك ءبىر بىرىنە وق اتتى. ال بۇل ەكى ەلدىڭ ءبۇلىنۋى الدىمەن رەسەيگە، سوسىن وزگە دە سىرتقى كۇشتەرگە كەرەك.

قىرعىز-تاجىك قاقتىعىسىنان كەيىن اتامباەۆ ارسالاڭداپ ماسكەۋ بارىپ كەلدى. پۋتين دوسى ارنايى ات...كەشىرىڭىزدەر، ۇشاق جىبەرىپ الدىرىپتى-مىس. بۇل تەگى تەگىن شاقىرتۋ ەمەس. ويتكەنى قىرعىز حالقى كىمنىڭ دوس، كىمنىڭ دۇشپان ەكەنىن وسى كۇنى ءبىلىپ قالدى. ساياسي كۇشتەردىڭ اراسىندا انتي-رەسەيشىل تۇلعالار كورىنە باستادى. وسىنى ءىشى سەزگەن پۋتين "ماناس - رەسەيلىك" دەپ كەزىندە جانقالتاسىنان "جاڭالىق" سۋىرعان اتامباەۆتىڭ قولتىعىنا دىم بۇركىپ، "بيلىكتى قايتادان قولىڭا ال" دەپ جىبەرۋى مۇمكىن. ال اتامباەۆتىڭ قازاق بيلىگىمەن الاكوز ەكەنىن بىلەسىز... الايدا قىرعىز بەن تاجىك مەمباسشىلارى كەشەلى بەرى شولپان-اتادا كەلىسسوز جاساپ، شەكارا ماسەلەسىن شەشىپ الۋعا كىرىستى. ساتىمەن بولسىن ىستەرى. ال، شولپان-اتادا قازاقتىڭ اندەرى شىرقالىپ تۇر. جاڭا عانا كوشەنى ءبىر كولىك "شۋدىڭ بويىندى" دەپ شۋلاتىپ ءوتتى...

داۋرەن قۋاتتىڭ فەيسبۋكتەگى جازباسى

Abai.kz