مينيسترلىك “تەكسەرۋ بارىسىندا كەيبىر وتباسىلاردىڭ كاسىپكەرلىكتەن تۇسەتىن تابىسىن تومەندەتكەنى، جۇمىستارىن جاسىرعانى، كوميسسيالاردىڭ وتباسىلاردىڭ تابىسىن انىقتاعاندا دۇرىس جۇمىس ىستەگەنى انىقتالدى” دەپ مالىمدەدى.
ۆەدومستۆو “مەملەكەتتىك اتاۋلى الەۋمەتتىك كومەك تۋرالى” زاڭدى بۇزعانداردان جاردەماقىنى قايتارىپ الماق. مينيسترلىك بۇعان دەيىن دە ەلدەگى وتباسىلار ااك الۋ ءۇشىن وتىرىك اجىراسىپ جاتقانىن ايتقان.
بيىل 4 اقپاندا استانانىڭ كوكتال-1 شاعىن اۋدانىنداعى شىڭعىستاۋ كوشەسىندە ورنالاسقان جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى بەس بالا وپات بولعان.
وسى وقيعادان كەيىن كوپ بالالى انالار نارازىلىعى كۇشەيدى. 6 اقپاندا ەل استاناسىندا جۇزدەگەن انا جينالىپ، بيلىكتەن جاردەماقى مەن جورگەكپۇلدى ءوسىرۋدى، كوپ بالالى وتباسىلاردىڭ بالالارىنا تەگىن ءبىلىم بەرۋدى، انا مەن بالانى تەگىن ەمدەۋدى، باسپانا الۋدى جەڭىلدەتۋدى تالاپ ەتتى.
21 اقپاندا سول كەزدەگى قازاقستان پرەزيدەنتى نۇرسۇلتان نازارباەۆ پرەمەر-مينيستر باقىتجان ساعىنتاەۆ باسقارعان ۇكىمەتتى "حالىقتىڭ جاعدايىن جاقسارتا المادى" دەپ سىناپ، تاراتىپ جىبەردى. كەيىن پرەمەر-مينيستر بولىپ اسقار مامين تاعايىندالدى.
27 اقپان "نۇر وتان" پارتياسىنىڭ سەزىندە نازارباەۆ كوپ بالالى وتباسىلارداعى ءار بالاعا 21 مىڭ تەڭگە تولەنەتىنىن مالىمدەگەن ەدى. وسىدان كەيىن ەڭبەك جانە حالىقتى الەۋمەتتىك قورعاۋ مينيسترلىگى ساۋىردەن باستاپ تۇرمىسى تومەن وتباسىلارعا اتاۋلى الەۋمەتتىك كومەك تولەي باستاعاندارىن حابارلاعان. بىراق ايەلدەر ااك الۋ شارتىنىڭ قيىندىعىنا شاعىنادى.
انالار بيلىكتەن جاردەماقىدان بولەك باسپانا ماسەلەسىن شەشۋدى تالاپ ەتەدى. 3 ماۋسىمدا نۇر-سۇلتاندا ونداعان انا اقوردا مەن ۇكىمەت ءۇيى ماڭىنا بارىپ، قازاقستان پرەزيدەنتى قاسىم-جومارت توقاەۆ پەن پرەمەر-مينيستر اسقار ءماميننىڭ شىعۋىن تالاپ ەتكەن. بيلىك ەلدەگى باسپانا ماسەلەسىن شەشۋ ءۇشىن ءتۇرلى جوبالار جاسالىپ جاتقانىن ايتادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ەسەبىنشە، 15 تامىزداعى جاعداي بويىنشا 1,8 ميلليون قازاقستاندىق ااك العان. بيۋدجەتتەن اەك تولەۋ ءۇشىن 103 ميلليارد تەڭگە (1 دوللار – 387 تەڭگە) بولىنگەن. جاردەماقى العانداردىڭ 42 پايىزى قالادا، 58 پايىزى اۋىلدا تۇرادى.
Abai.kz
