ەلوردا اكىمدىگىنىڭ «رۋحانيات» كمم ۇيىمداستىرۋىمەن «ۇلى ابايدىڭ ىزىمەن...» اتتى ەكسپەديتسيا جولعا شىقتى.

رۋحاني ساپاردىڭ ماقساتى – مەملەكەت باسشىسىنىڭ تاپسىرماسى اياسىندا «رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» باعدارلامالىق ماقالاسىنىڭ ماڭىزدىلىعى مەن وزەكتىلىگىن جان-جاقتى دəرىپتەۋ.

اباي قۇنانبايۇلىنىڭ ءجۇرىپ وتكەن جەرلەرى ارقىلى ۇلى اقىننىڭ مول مۇراسىن ەلگە پاش ەتۋ. ولكەتانۋ جۇمىستارىن جانداندىرۋعا اتسالىسۋ. ۇلى دالانىڭ رۋحاني قازىنالارىن ناسيحاتتاۋ ارقىلى حالىقتى تۇتاستىققا، بىرلىككە شاقىرۋ.

16-19 تامىز ارالىعىندا ءبىر توپ تاريحشى-عالىمدار، قوعام قايراتكەرلەرى، ابايتانۋشىلار مەن جۋرناليست-بلوگەردەن قۇرالعان ەكسپەديتسيا نۇر-سۇلتاننان باستاپ قارقارالى – ابىرالى – قاينار – قاراۋىل – سەمەي – پاۆلودار باعىتىمەن ءجۇرىپ وتپەك.

-حاكىم ابايدىڭ 175 جىلدىعىنا وراي «رۋحانيات» ورتالىعى دانىشپان بابامىز دۇنيەگە كەلگەن وسى تامىز ايىندا بىرقاتار ءىس-شارالاردى ۇيىمداستىرىپ كەلەدى. «ادامزاتتىڭ ابايى» اتتى فەستيۆال اياسىندا 8-31 تامىز ارالىعىندا بىرقاتار شارالار وتەدى دەپ جوسپارلانعان. سونىڭ ءبىرى – «ۇلى ابايدىڭ ىزىمەن...» اتتى رۋحاني ساپار. وسكەلەڭ ۇرپاقتىڭ بويىنداعى ۇلتتىق يممۋنيتەتتى كوتەرىپ، جاستاردىڭ ساناسىنا ۇلگى تۇتار تۇلعانى قالىپتاستىرۋ جانە ەڭ باستىسى ۇلتتىق بولمىستى جاڭعىرتۋدا مۇنداي بىرەگەي شارالاردىڭ قولعا الىنعانى ەلىمىز ءۇشىن پايدالى، - دەيدى «رۋحانيات» كمم باسشىسى ەرجان ەڭسەباي.

Abai.kz