وبلىس اكىمى بەردىبەك ساپارباەۆ جۇمىس ساپارىمەن سەمەي قالاسىندا، ۇلان جانە گلۋبوكوە اۋداندارىنىڭ ەلدى مەكەندەرىندە بولىپ، اۋىل شارۋاشىلىعى سالاسىندا ءونىمدى ەڭبەك ەتىپ جاتقان بىرقاتار شارۋا قوجالىقتارىنىڭ جۇمىسىمەن تانىستى.

وبلىس اكىمى بەردىبەك ساپارباەۆ جۇمىس ساپارىمەن سەمەي قالاسىندا، ۇلان جانە گلۋبوكوە اۋداندارىنىڭ ەلدى مەكەندەرىندە بولىپ، اۋىل شارۋاشىلىعى سالاسىندا ءونىمدى ەڭبەك ەتىپ جاتقان بىرقاتار شارۋا قوجالىقتارىنىڭ جۇمىسىمەن تانىستى.

ايماق باسشىسى ەڭ الدىمەن سەمەي قالاسىنا ات باسىن تىرەدى. جالپى، سەمەي مەن وسكەمەن قازىر شىعىستىڭ قوس شامشىراعىنداي قاتار جارقىراپ، جايناپ كەلەدى. ارالارىندا اجىراماس مىقتى بايلانىس ورناعاندىعىن حالىقتىڭ كوزى كورىپ وتىر. وسكەمەندە وتكىزىلگەن سەمەي قالاسىنىڭ، سەمەي جۇرتشىلىعىن قۋانتقان وسكەمەننىڭ كۇندەرى، اۋدانداردىڭ اۋىل شارۋاشىلىق ونىمدەرىنىڭ جارمەڭكەلەرى، كورمەلەر، تاۋەلسىزدىكتىڭ 20 جىلدىعىنا وراي وتكىزىلىپ جاتقان ءارتۇرلى مادەني-رۋحاني ءىس-شارالار، وسىنىڭ ءبارى كەيىنگى كەزدەرى ارادا بەرىك ورناعان بەرەكە-بىرلىكتىڭ، ىنتىماقتاستىقتىڭ جەمىستى كورىنىسى. جۇمىس ساپارى بارىسىندا وبلىس اكىمى بەردىبەك ساپارباەۆ سالتاناتتى تۇردە تۇساۋىن كەسىپ، اق جول تىلەگەن سەمەي قالاسىنىڭ ىرگەسىندەگى «پريرتىش برويلەر قۇس فابريكاسى» جشس-ءنىڭ ينكۋباتسيا، قۇس سويۋ جانە ەت وڭدەۋ تسەحىنىڭ اشىلۋى دا سول ىنتىماقتاستىقتىڭ زاڭدى جالعاسى ءھام ەل تاۋەلسىزدىگىنىڭ 20 جىلدىعىنا ارنالعان 20 جارقىن ءىستىڭ بىرەۋى.  
ەل نارىعىندا 20 جىلدان استام ۋاقىت جۇمىس ىستەپ كەلە جاتقان بۇل فابريكا نەگىزىنەن بالاپان شىعارۋ، قۇس ءوسىرۋ جانە برويلەر تاۋىعىنىڭ ەتىن وندىرۋمەن اينالىسادى. 1984 جىلى قۇرىلعان كاسىپورىن تاۋەلسىزدىكتىڭ العاشقى جىلدارىندا ءبىراز قيىندىقتى باستان كەشىرگەنىمەن تىنىمسىز ەڭبەكتىڭ ارقاسىندا كەيىنگى جىلدارى ەڭسەسىن تىكتەي باستاعان. 2003-2004 جىلدارى قايتا جابدىقتاۋ جانە ءوندىرىستى جاڭعىرتۋ جۇمىستارىنىڭ ءبىرىنشى كەزەڭى جۇرگىزىلىپتى مۇندا. وسىعان سايكەس ءونىم ءوندىرۋ تەحنولوگياسى دا تۇبەگەيلى وزگەرىسكە ۇشىراعان. 2009 جىلى وندىرىستىك جاڭعىرتۋدىڭ ەكىنشى كەزەڭى قولعا الىنىپ، نيدەرلاندىنىڭ «Pas Reform» فيرماسى جاساپ شىعارعان قۋاتتىلىعى جىلىنا 10 ملن. جۇمىرتقاعا شاقتالعان ينكۋباتورىمەن جابدىقتالادى. قۇس ءوسىرۋ تسەحىنىڭ 39 كورپۋسىندا تەحنولوگيالىق جەلىلەردى قايتا جابدىقتاۋ مەن جاڭارتۋ جۇمىستارى جۇزەگە اسىرىلىپ، سىيىمدىلىعى 8 تونناعا دەيىن ەت ساقتايتىن «Bitser» فيرماسىنىڭ توڭازتقىش كامەرالارى ورناتىلعان.

برويلەر بالاپاندارىن ءوسىرۋ كورسەتكىشى بويىنشا ەلىمىزدى بىلاي قويعاندا تمد شەڭبەرىندە ەڭ ۇزدىك دەڭگەيگە قول جەتكىزگەن سەمەيلىك قۇس فابريكاسىنىڭ كەلەشەگى زور. بالاپان باعۋدىڭ بابىن بىلەتىن بىلىكتى ماماندار اينالاسى 42 كۇننىڭ ىشىندە برويلەرلەردىڭ سالماعىن 2,2-2,4 كەلىگە دەيىن جەتكىزەدى. ءبىر ەسكەرەتىن جايت، برويلەرلەر وتە نازىك، كىرپياز، ءارى سەزىمتال كەلەدى ەكەن. قاتتى شىققان داۋىستان، جارىق ەتكەن جارىقتان شوشىنسا نەمەسە كىر-قوقىستا ءجۇرىپ قالسا ءولىپ كەتۋى ىقتيمال. سول سەبەپتى جۇمىسكەرلەر ۇستەرىنە اق جەيدە، باستارىنا تەلپەك، اياقتارىنا ارنايى شۇلىق كيىپ جۇمىس ىستەيدى. تازالىق قاتاڭ ساقتالۋى كەرەك. فابريكانى ارالاۋ كەزىندە ءبىز دە سولاي كيىنىپ جۇردىك. دەگەنمەن مۇنىڭ ءبارى قانشالىقتى قيىن بولسا دا بالاپانداردىڭ 98 پايىزىن ولتىرمەي ءوسىرىپ وتىر. ال كاسىپورىنعا قاجەتتى ينكۋباتسيالىق برويلەر جۇمىرتقالارى گلۋبوكوە اۋدانىنىڭ «پلەمپتيتسا» جشس-نەن جەتكىزىلەدى. سونداي-اق 2006 جىلدان باستاپ ISO 9001:2000 ستاندارتى بويىنشا جۇمىس ىستەپ كەلگەن كاسىپورىن بىلتىرعى ماۋسىم ايىندا UKAS-تا تىركەۋدەن وتكەن Bureau Veritas Certification كومپانياسىنىڭ ISO 9001:2008 حالىقارالىق ستاندارت تالاپتارىنا سايكەستىگىنىڭ رە-سەرتيفيكاتسيالىق ءاۋديتىن وتكىزگەن. ەڭ باستىسى، حالىق تۇتىناتىن ونىمدەردىڭ بارلىعى دا حالال. ايتالىق مۇزداتىلعان برويلەر-بالاپان ەتى، قاپتالعان سان، ءتوس، جىلىنشىك، قانات ەتتەرى جۇرتشىلىقتىڭ سۇيىكتى ازىعى دەسەك ارتىق ايتقاندىق ەمەس. ەلدىڭ سۇرانىسىن قاناعاتتاندىرۋدى كوزدەگەن شارۋاشىلىقتىڭ بۇل ويىن وبلىس باسشىلىعى دا قۇپتادى.
- ءبىزدىڭ مەملەكەتىمىزدىڭ، ەلباسىنىڭ ۇستانعان ساياساتى حالىقتىڭ ءال-اۋقاتىن ارتتىرۋ. ول ءۇشىن وندىرىستەر مەن شارۋاشىلىقتار جاقسى جۇمىس ىستەپ، ەكونوميكا ىلگەرى باسۋى كەرەك. بۇگىنگى مىنا فابريكالارىڭىز سونىڭ ءبىر ايعاعى. ەگەر ءبىز دامىعان ەلدەردىڭ قاتارىنا قوسىلۋدى ماقسات ەتسەك، عىلىمنىڭ، جاڭا تەحنولوگيالاردىڭ جەتىستىكتەرىن مەڭگەرىپ، كاسىپورىندارعا ەنگىزۋىمىز قاجەت. فابريكاعا ورناتىلعان الەمدىك ستاندارتتارعا ساي زاماناۋي قۇرال-جابدىقتار بارىنەن بۇرىن شىعىندى ازايتىپ، ءونىمدى مولايتۋعا كومەكتەسەدى. وسى جاڭارتۋ جۇمىستارىنا 800 ملن. تەڭگەدەي قارجى جۇمسالدى. سونىڭ ارقاسىندا ءونىمنىڭ كولەمى ارتىپ بىلتىر 7 مىڭ توننا الىنسا، الداعى جىلدارى بۇل 12 مىڭ تونناعا دەيىن بارادى. سىزدەردىڭ كاسىپورىن وبلىستا شىعارىلاتىن ەتتىڭ 7 پايىزىن، سونىڭ ىشىندە قۇس ەتىنىڭ 40 پايىزىن بەرەدى. ول از ەمەس. كەيىنگى جىلدارى ادامدار قۇستىڭ ەتىن كوپتەپ تۇتىنۋدا، سۇرانىس كۇشەيگەن. سوندىقتان قازىر ءبىز 60 پايىزداي قۇس ەتىن شەتەلدەن اكەلەمىز. وسى رەتتە پرەزيدەنت نۇرسۇلتان نازارباەۆتىڭ بەرگەن تاپسىرماسىنا سايكەس سىرتتان كەلەتىن يمپورتتىڭ كولەمىن مەيىلىنشە ازايتۋىمىز كەرەك. جالپى اۋىل شارۋاشىلىعىن، ونىڭ ىشىندە قۇس فابريكالارىن دامىتۋعا مەملەكەت باسا كوڭىل بولۋدە. بىلتىردىڭ وزىندە سىزدەردىڭ فابريكا 230 ملن. تەڭگەدەي مەملەكەتتەن قوسىمشا سۋبسيديا الدى. كەلەشەكتە دە مۇنداي كومەكتەر كورسەتىلەتىن بولادى. سەبەبى حالىقتىڭ جاعدايىن مەملەكەت ەشقاشان نازاردان تىس قالدىرعان ەمەس، - دەپ اتاپ كورسەتكەن ايماق باسشىسى بەردىبەك ساپارباەۆ كاسىپورىن باسشىلىعىنا، جۇمىسكەرلەرگە جانە باسقا دا ماماندارعا جاڭا تەحنولوگيانى مەڭگەرۋگە اتسالىسقاندارى ءۇشىن ريزاشىلىعىن جەتكىزدى.

akimvko.gov.kz