وسى سوزبەن وستىك، ەر جەتتىك، تاربيە الدىق. «سەنىڭ ۋاقتىڭ كەلەدى...» ۇمىتتەندىك. يدەولوگيا دا سولاي بولدى. كورگەن كينومىزدا. نۇرمۇحان ءجانتورين شوقاندى ويناعان فيلم دە سولاي اتالاتىن «ەگو ۆرەميا پريدەت»... شوقان با، ءجانتورين بە ءوز ۋاقىتىن كۇتىپ ءجۇر ءالى دەمەك.

بۇرىن كەڭەس ۇكىمەتى سولاي ۇگىتتەدى، ەندى اسا مارتەبەلى جارناما ۇكىمەتى دە سولاي ناسيحات جۇرگىزەدى. ءيا، قاتە جازعامىن جوق، «جارناما ۇكىمەتى» كەڭەس ۇكىمەتى نە ءىشىپ نە كيەتىنىڭدى، كىممەن تۇرىپ، كىممەن جۇرەتىنىڭدى، كىم «دوس»، كىم «جاۋ» ايقىنداپ بەرگەن. «ءىرىپ، ءشىرىپ بارا جاتقان كاپيتاليزمگە» كۇلىپ ەر جەتتىك. ەندى ءوزىمىزدىڭ ەگەمەندىگىمىزدى الدىق دەگەن كەزدە قاراساق، تاعى دا باسقا ۇكىمەت – جارناما ۇكىمەتى كەلدى. وربيت، بلەندامەت، تامپاكس،..

بۇرىن «مادەنيەت جانە تۇرمىس»، «عىلىم مەن تەحنيكا»، «ءبىلىم جانە ەڭبەك»، «ۆوكرۋگ سۆەتا» - دەگەندەردى وقىپ، تەك سوعان كوڭىل ءبولىپ جۇردىك. جارناما ۇكىمەتى اۋىزدان شىققان دەمنىڭ يىسىنە، ءتىستىڭ مارجانداي بولۋىنا، بۇتىڭنىڭ قۇرعاق جۇرۋىنە وي-سانانى اۋدارىپ جىبەردى. ۇياتتاعى، بۇرىن سوعان ءمان بەرمەپپىز، ەلدىڭ دەمى ساسىماعان، ءتىسى سارعايماعىن بولۋى كەرەك. ال، ايەلدەر تالاي دۇنيەنى جاسىرىپ كەلىپتى عوي، قايدان بىلەيىك. اينالايىن جارناما كوزدى اشتى! قىزدى اكەگە ەستىرتپەي قۇپيا تاربيەلەيتىن شاڭىراق قازىر شاي ءىشىپ وتىرە-ە-ە-ەپ بالا-شاعاسىمەن "تامپاكستى" كورىپ، ءبىلىپ وتىرادى.

ءبارى ءتۇرىڭنىڭ كەلىستى بولۋىنا ارنالعان. ميدىڭ كەلىستى بولۋىنا ەشتەمە جوق! كينولار دا سولاي. باستى قالاي قاق جارۋعا بولاتىنىن اسىقپاي كورسەتەدى، ونى نەمەن تولتىرۋعا بولاتىنىن بىلمەيمىز.

«ۋاقىتىم كەلەر» - دەپ تىرباڭدايمىز. ءالى دە سول ءبىرىمىز ءۇيسىز، ءبىرىمىز كۇيسىز، ءبىرىمىز ەڭبەگىمىزگە گونورارسىز... سەبەبى، ادامنىڭ ىشكى جان-دۇنيەسىنە اقشاسىز كىرگەن جەڭىل. اقشاسىز رۋحتانامىز، جاڭارامىز، جاڭعىرامىز... اش ادامنان ادال ونەر تۋىندايدى!

«ءسىزدىڭ ۋاقىتىڭىز ءوتىپ كەتكەن، قازىر وتپەيسىز!» - دەيدى سوسىن بىرەۋ. ول ءوزىنىڭ ۋاقىتى وسى ەكەنىن بىلەتىن سياقتى. ءبىز بىلمەيمىز. ءبىزدىڭ ۋاقىتىمىز ءالى بولعان جوق، بولمايدى دا. سەنگىش، كونگىش، توزگىش، ءبىز سياقتى جالتاق بۋىننىڭ ۋاقىتى كەلمەيدى ەشقاشان. نە وتكىزىپ العامىز، نە جەتە الماي ءجۇرمىز. بىراق، ۋاقىت ءوتىپ جاتىر.

زەينەت؟ ونىڭ دا ۋاقىتى بولعان جوق. سەنىڭ كەرەكتىگىڭنەن ەمەس، ساعان بەرەرى جوقتىقتان. تاعى سول، "ەگو ۆرەميا پريدەت" - دەپ، تەگىن قارتاياسىڭ...

اسقار نايمانتايدىڭ facebook پاراقشاسىنان

Abai.kz