"مەملەكەتكە وپاسىزدىق جاسادى" دەپ ايىپتالعان ساياساتتانۋشى كونستانتين سىروەجكين قازاقستان ازاماتتىعىنان ايىرىلدى. بۇل تۋرالى الماتى قالالىق سوتى حابارلادى. سىروەجكين 175-باپتىڭ، 1-ءبولىمى بويىنشا ايىپ تاعىلىپ، 10 جىلعا باس بوستاندىعىنان ايىرىلعان بولاتىن. ساياساتتانۋشى ەندى جازاسىن وتەپ بولعاننان كەيىن ەلدەن شىعارىلماق.

الايدا، بۇل ۇكىم ءالى كۇشىنە ەنگەن جوق. سوندىقتان ساياساتتانۋشىنىڭ قورعاۋشىلارى ونىڭ كىناسىز ەكەنىن دالەلدەۋ ءۇشىن جوعارى ينستانتسيا سوتتارىنا جۇگىنۋى مۇمكىن. ال، الماتى قالاسى مامانداندىرىلعان اۋدانارالىق قىلمىستىق ىستەر جونىندەگى سوتىنىڭ ۇكىمىنە سايكەس، كونستانتين سىروەجكين ون جىلعا سوتتالىپ، قازاقستان رەسپۋبليكاسى ازاماتتىعىنان ايىرىلدى. جانە، الماتى قالالىق سوتىنىڭ رەسمي حابارلاماسىندا "ول قاۋىپسىزدىگى جوعارى قىلمىستىق-اتقارۋ جۇيەسى مەكەمەسىندە جازاسىن وتەيدى", - دەلىنگەن.

سونىمەن قاتار، عالىم جازاسىن وتەگەننەن كەيىن، قىلمىستىق كودەكستىڭ 51-بابىنا سايكەس، ءماجبۇرلى تۇردە ەلدەن شىعارىلادى. وعان بەس جىل بويى قازاقستان اۋماعىنا كىرۋگە تىيىم سالىنادى.

ايتا كەتەيىك، كونستانتين سىروەجكين – ساياساتتانۋشى، شىعىستانۋشى، تاريح عىلىمدارىنىڭ كانديداتى، ساياسي عىلىمدار دوكتورى، پروفەسسور. ول 2019 جىلدىڭ اقپانىندا "مەملەكەتكە وپاسىزدىق جاسادى" دەگەن ايىپپەن قاماۋعا الىندى. امەريكالىق Wall Street Journal گازەتى 10 شىلدەدە دەرەككوزدەرىنە سىلتەمە جاساپ، «سىروەجكين اقشالاي سىياقىعا قىتايعا قۇپيا قۇجات ساتۋى مۇمكىن» دەگەن اقپارات تاراتقان. Wall Street Journal قىتاي بيلىگىنىڭ سىروەجكين ءىسىن «جوقتان بار جاساۋ» دەپ سيپاتتاعانىن ەسكەرتكەن. باسىلىم سىروەجكيننىڭ قازىرگى پرەزيدەنت قاسىم-جومارت توقاەۆ پرەمەر-مينيستر بولىپ تۇرعاندا قىتاي ماسەلەسى بويىنشا كەڭەسشىسى بولعانىنا دا نازار اۋدارعان.

Abai.kz