ەل ەكونوميكاسىنىڭ ەڭ نەگىزگى سالاسىنىڭ ءبىرى - اۋىل شارۋاشىلىعى.
وكىنىشكە وراي، ازىق- تۇلىك قاۋىپسىزدىگىنىڭ ستراتەگيالىق ماڭىزدىلىعىن تولىق سەزىنە الماي كەلەمىز. سونىڭ سالدارىنان اۋىل شارۋاشىلىعىمەن اينالىساتىن سالا ەڭبەككەرلەرىنە بيلىك تاراپىنان كەشەندى كومەك كورسەتىلمەي جاتىر.

اۋىل شارۋاشىلىعىن قولداۋ ماقساتىندا قۇرىلعان "كاز-اگرو" ،"اۋىل شارۋاشىلىعىن قولداۋ قورى" سەكىلدى قۇرىلىمداردىڭ جۇمىس ىستەۋ مەحانيزمىندە كەمشىلىكتەر باستان اسادى. مىسالى: اۋىل شارۋاشىلىعى تەحنيكالارىنىڭ باعالارى زاۋىتتان شارۋا قوجالىعىنا جەتكەنشە ەكى ەسەگە قىمباتتاپ كەتەتىنى مۇلدە اقىلعا قونبايدى.بۇل اۋىل ەڭبەككەرلەرىن قولداۋ ەمەس، قاناۋ بولىپ تابىلادى.

شاعىن شارۋا قوجالىق يەلەرىنە جەڭىلدەتىلگەن كرەديت الۋ دا، دۇنيەنىڭ قيامەتى. جوعارىداعى ەكسپەديتور بولىپ تابىلاتىن قۇرىلىمدار تاراپىنان ءتۇرلى بيۋروكراتيالىق كەدەرگىلەرگە تاپ بولادى. قيىنداتىلعان قاعاز تاسقىنى، زالوگقا قويىلعان مۇلىكتىڭ تىم تومەن باعاعا باعالانۋى سەكىلدى تولىپ جاتقان كەدەرگىلەردى ايتۋعا بولادى. تاۋى شاعىلعان اۋىل بالاسىنىڭ وسىلاردان كەيىن كرەديت الىپ شارۋاسىن وركەندەتۋدەن جولى كەسىلەدى. ەگەر وكىمەت وسى ماسەلەلەرگە وڭ كوزقاراسپەن قاراپ قولداۋ كورسەتەر بولسا اۋىلدا قالىپ ناقتى ىسپەن اينالىسقىسى كەلەتىن قابىلەتتى جاستار بارشىلىق.

بىزدە اۋىل شارۋاشىلىعىنا بولىنگەن قاراجاتتاردىڭ بارلىعىنىڭ پايداسىن الپاۋىت "اگرو-حولدينگتەر" عانا كورىپ وتىر. ال، ولاردىڭ ارعى جاعىنداعى جاسىرىن قوجايىندارى كۋلاگين، بوجكو، ت.ب.ءىرى شەنەۋنىكتەر ەكەنى ايتپاسا دا تۇسىنىكتى.

بيىلعى جاستاردى قولداۋ جىلى اۋىل جاستارى نازاردان تىس قالماۋى ءتيىس.
ولاردىڭ ناقتى كاسىپپەن اينالىسۋىنا، تۋعان جەرگە تۋ تىگىپ ءوزىن دالەلدەۋىنە بيلىكتىڭ قامقورلىعى، كەشەندى جوسپارى قاجەت.

پارلامەنت تورىندەگى دارمەنسىز دەپۋتاتتار مەن سەناتورلاردىڭ اۋىل شارۋاشىلىعىنا بەرىلەتىن كرەديتتەرگە شۇيلىگۋى اۋىلعا دەگەن جاناشىرلىقتىڭ تىم تومەن دەڭگەيدە ەكەنىن كورسەتەدى.

امانجول ءالتايدىڭ facebook پاراقشاسىنان

Abai.kz