Düysenbi, 1 Mausım 2020
COVID-19 QAZAQSTANDA. Jwqtırğandar — 11308. Jazılğandar — 5404. Qaytıs bolğandar — 41
Ğibırat 4875 0 pikir 31 Qañtar, 2020 sağat 12:13

Kuratorlıqtan kemeñgerlikke deyin...

Professor N.Omaşev şäkirti A.Säulebekti 60 jıldığımen marapattap twr

Bügin L.N.Gumilev atındağı Euraziya Wlttıq universitetiniñ twñğış Prezident auditoriyasında Qazaqstannıñ eñbek siñirgen qayratkeri, ğılım doktorı Namazalı Omaşevtiñ 70 jıldıq mereytoyına arnalğan «Elimizdiñ mediakeñistigi: izdenister men jobalar» attı halıqaralıq ğılımi-täjiribelik konferenciya ötedi.

1977 jıl. Almatınıñ jaymaşuaq küzi. Kirov köşesine ornalasqan KazGU-diñ bas ğimaratı (Keşirersizder, ol kezde eşkim QazMU dep atamaytın). Qazaqstannıñ mañdayındağı jalğız jurnalistika fakul'tetine tüsken 50 jas jigit pen qızdıñ quanışında şek joq. Eñ baqıttı kün. Bir ayı boyı Alataudıñ eteginen san aluan tätti almalardı terip qaytqan bolaşaq jurnalister jaña oqu jılın bastamaqşı.

Sol jıldarı jurfaktiñ studenti atanu qiın ğana emes, azapqa teñ bolatın. Bir orınğa 11-13 abiturient talasatın. Basqa oqu orındarına tüsuşiler tört sınaq tapsırsa, mwnda altı sınnan sürinbey ötu kerek. Şığarmaşılıq bayqau eki kezeñnen twratın: alğaşqısı – tañdap alğan taqırıbıñ boyınşa jazuşılıq qabiletiñdi tanıtu bolsa, ekinşisi – belgili ğalımdar men merzimdik baspasöz jetekşileriniñ saualdarına jauap beru.

Bir jaqsısı, eki sınnan süringender basqa oqu orındarına qwjat tapsıruğa ülgeretin. Olardıñ köbi filologiya fakul'tetin qalaytın.

Dekanat elu studentti eki topqa bölipti. Bizge jiırma jeti jastağı körikti jigit Namazalı Omaşev kurator bop tağayındalıptı. Mädenietti, salmaqtı, qaq-soqpen jwmısı joq, ünemi külimsirep jüretin. Aqırın söyleytin, dörekiligi bayqalmaytın. 25 studenttiñ segizi ğana wl bala bolğandıqtan ba, äyteuir, Namazalı ağamız qızdarğa erekşe iltipat bildirip, jımiıp külip kelip, jarqıldap şığatın auditoriyadan. Qızdar da oğan ä degennen bauır basqanday, öz ağalarınan kem körmedi. Qısqası, kuratormen aramızda tabiğattıñ tamıljığan tamaşa künindey ädemi de, äserli, közge körinbeytin, tek köñilderde küy bop şertiletin şınayı sezim payda boldı. Öz basım Näñkeñniñ bir wlğa, ne qızğa dauıs kötergenin, ne renjitkenin körgen de, estigen de emespin. Jasıratını joq, sabaqqa qatıspağan kezderimiz de, eptegen bwzaqılığımız da boldı ğoy. Bir qızığı, sonıñ birde-birine kurator aralasqan emes. Esesine sazayımızdı fakul'tet dekanı, professor Temirbek Qojakeev beretin. Kezinde ol kisiniñ qataldığına renjip te jürdik. Tipti onı jek körgender de kezdesti. Degenmen uaqıt öte kele «Temkeñniñ tepkisi-ay!» dep sağınatın boldıq.

«Egerde, - degen edi 20 jıldıq kezdesuimizde söylegen sözinde sol kezdegi QR Mädeniet jäne qoğamdıq kelisim, aqparat ministri Mwqtar Qwl-Mwhammed, - Temkeñniñ qataldığı bolmağanda auıldan Almatığa top etip tüsken añğal jastardıñ köpşiligi tağdırdıñ basqa jolına tüsip keter me edi?!».

Älginde topta nebäri segiz jigit oqıdıq dedim ğoy. Atap bereyinşi: starostamız Mwqtar Qwlmwhamedov, Jağıppar Qarabalaev, Orınbasar Äljikov, Ğalım Äripov, Nwrğali Orazov, Qonısbek Botbaev, Quantay Bayjolov jäne osı joldardıñ avtorı. Qızdardan Aygül Hasenova, Nwrjan Mwhamedjanova, Qarşığa Esimseyitova, Qatira Nwrbaeva, Äliya Mıñbaeva, Wlaş Tölebaeva, t.b.

Atap ötuge tiistimiz, wstazdarımız Temirbek Qojakeev, Tauman Amandosov, Äbilfayız Idırısov, Fayzolla Orazaev, Danday Isqaqov, Marat Barmanqwlov, Beysembay Kenjebaev, Zeynolla Qabdolov, Qabijan Isqaqov, Rahmanqwl Berdibaev, Mırzatay Serğaliev, Äbsattar Derbisäli, Rayhan Ğabitqızı Müsirepova, Sağımbay Qozıbaev, t.b. bizdiñ bilimdi, mädenietti, zeyindi jas bolıp qalıptasuımızğa köp eñbek siñirdi.

Älbette sol kezdegi kuratorımız Namazalı ağamızdıñ bizdiñ ünemi birlikte, wyımşıldıqta bolıp, keleşekte memleketimizdiñ damuına atsalısatın azamat boluımızğa qosqan ülesi orasan. Ol bizdi jaqsılap tärbieledi, tüzu jolğa saldı, sabırlıq tanıtıp, aqıl-keñesterin qwlağımızğa qwyıp otırıp, boyımızda senim küşiniñ nığayuına erekşe äser etti dep oylaymın.Arada qırıq jılday uaqıt ötse de bizdiñ ayaulı kuratorımız sol bayağı qalpında. Külimdep qarsı aladı. Naq bir jaqsı köretin tuısıñday jağdayıñdı täptiştep swraydı. Jan-jaqtağı şäkirtteriniñ qol jetkizgen tabıstarına quanıp otıradı. Sälem joldaydı. Jılı qabaq tanıtıp, arasında ädemi külkisin qosqanda, bayağı kurator-wstazıñdı sol qalpında körip otırğanday tätti sezimge bölenesiñ.

Sirä, Namazalı ağamız bizge aldımen tärbie berip, sonsoñ bilim närin boyımızğa siñirudi maqsat etken tärizdi. Alla Tağalla da sol kezdegi jas ğalımnıñ adal piğılına nazar audarğan şığar, şükir, şäkirtteri eşqaşanda wyatqa qaldırğan emes! Kerisinşe, fakul'tettegi üzdik top bolıp şıqtı.

Mısalığa, bir ğana şäkirti – Mwqtar Qwl-Mwhamedtiñ özi nege twradı deseñizşi?! Memleket jäne qoğam qayratkeri! Şın mänindegi halıq

qalaulısı. Äygili ğalım. Qazaqtıñ bolaşağı üşin şırıldap jürgen mecenat. Patriot. Aytulı şeşen. İsker basşı.

Basqa qız-jigitterimiz de osal emes. Şetinen mıqtı. Biraq, olardıñ lauazımın atap jatudı jön körmedim. Bärin tizip şığu qiın. Birin atap, ekinşisin qaldırsam, key köñil şirkin bwzıluı mümkin.

Wstazımız Namazalı Omaşev bizdi qanattandırıp, wyadan wşırğan soñ özi de tınımsız izdenisiniñ arqasında ğılımnıñ biik şıñdarın bağındırdı. Ğılım doktorı, professor atandı, onı aytasız, YUNESKO-nıñ professorı atandı, N'yu-York akademiyasınıñ akademigi bop saylandı, äl-Farabi atındağı Qazaq Wlttıq universitetiniñ prorektorı qızmetin abıroymen atqardı. QR Bilim jäne ğılım ministrliginiñ arnayı şaqıruımen Almatıdan Astanağa qızmet auıstırdı. L.N.Gumilev atındağı Euraziya wlttıq universitetiniñ jurnalistika institutınıñ direktorı retinde bolaşaq jurnalisterdi dayarlauğa ölşeusiz eñbek siñirdi.

Soñğı qırıq jıl işindegi qazaq jurnalistikasındağı aytulı wstaz, belgili ğalım, täjiribeli maman, ozıq oylı azamat Namazalı Omaşevti bir kezdegi kuratorımız bolğanı üşin ğana maqtamaymız, biz tağdırımız jolıqtırğan - osınday ğajap adammen, kemeñger wstazben maqtanamız!

Asa qadirmendi Namazalı ağa! Sizdi 70 jıldıq mereytoyıñızben şın jürekten qwttıqtaymız! Sizge mıqtı densaulıq, otbasılıq baqıt, düniedegi barlıq jaqsılıqtı jäne wzaq ğwmır tileymiz!

Aytbay Säulebek,

Qazaqstan Respublikası twñğış Prezidenti sıylığınıñ laureatı.

Abai.kz

0 pikir