Senbi, 30 Mamır 2020
COVID-19 QAZAQSTANDA. Jwqtırğandar — 10382. Jazılğandar — 5057. Qaytıs bolğandar — 37
Sañlaq 1928 20 pikir 8 Mamır, 2020 sağat 23:38

Tağı da doping dauı...

2012 jılğı Olimpiada oyındarınıñ qola jüldegeri, qazaqstandıq auır atlet Anna Nurmuhambetova doping erejelerin bwzğanı üşin 4 jılğa sporttan şettetildi.

Dopingke qarsı ortalıqtıñ habarlauınşa, sportşınıñ qanınan tıyım salınğan oralturinabol preparatı tabılğan körinedi.

Nurmuhambetova 2019 jılı tamız ayında Taldıqorğan qalasında ötken Spartakiada oyındarınan keyin test tapsırğan. Däl osı jarıs kezinde tapsırğan qan sınamasınan tıyım salınğan preparat tabılıp otır. Diskvalifikaciya merzimi - 2019 jılı 17 qırküyekten  bastap, 2023 jılı 17 qırküyekke deyin.

Sonday-aq, jeñil atlet Lyubov' Uşakova, veloşabandoz Roman Vasilenkov, voleybolşı Anton Kuznecov, samboşı Faruh Mirhakimovtar da tört jılğa sporttan şettetildi. Al jeñil atlet Aleksandr Bezrukov pen Olesya Zadorojnaya, gimnast Gauhar Tileubaeva eki jılğa şettetildi.

Negizi ziltemirşi Anna Nurmuhambetova 2012 jılğı Olimpiada oyındarında 69 keli salmaq därejesinde baq sınap, besinşi orın alğan. Biraq 2016 jılı Belarus' sportşıları Marina Şkermankova men Dina Sazanovec dopingpen wstalıp, otandasımız Olimpiadanıñ qola jüldegeri atanğan bolatın.

Anna Nurmuhambetova doping dauına wşırağan alğaşqı Olimpiada jüldegeri emes. Tipti eki dürkin Olimpiada çempionı Il'ya Il'inniñ özi medal'darın qaytarıp bergen.

2016 jılı Halıqaralıq Olimpiada komitetiniñ Tärtiptik komissiyası (HOK) men Sporttıq arbitrajdı sot (CAS) qazaqstandıq jeti auır atlet pen eki baluannıñ XXIX jäne XXX Olimpiada oyındarında jeñip alğan (Beyjiñ-2008, London-2012) medal'darın joqqa şığarıp, olardıñ dopingke qarsı erejeni bwzğandarın jariya etti. Şeşimge säykes atletter jarıstan şettetilip, nätijeleri joqqa şığarıldı jäne medal'dardı qaytaruğa mindetteldi.

Dopingpen wstalğan qazaqstandıq Olimpiada jüldegerleri: auır atletter Il'ya Il'in (altın medal', 2008, 2012), Zülfiya Çinşanlo, Mayya Maneza, Svetlana Podobedova (bäri altın, 2012), Irina Nekrasova (kümis, 2008), Mariya Graboveckaya (qola, 2008). Erkin küres şeberi Taymuraz Tigiev (kümis, 2008) jäne grek-rim küresiniñ şeberi Äset Mämbetov (qola, 2008).

Doping dauına wşırap sporttan şettetilgen ataqtı sportşılardıñ qatarında Jaswlan Qıdırbaev, Vladimir Sedov sındı älem çempiondarı da bar. Bwl tizimge Universiada oyındarınıñ (2015) jeñimpazı, jeñil atlet YUliya Rahmanova, 2014 jılğı Soçi Olimpiadasında Qazaqstan qwramasınıñ tu wstauşısı Erdos Ahmediev, tanımal boksşı Nazım Işanova, «Qazaqstan barısı» turniriniñ 2017 jılğı jeñimpazı Elaman Erğaliev, ataqtı şañğışı Aleksey Poltoranindi qosuğa boladı.

Bizdiñ elde jeke sportşınıñ älemdik arenada qol jetkizgen jaqsı nätijesin bükil eldiñ jetistigi dep tanu ädetke aynalğan. Bilik halıqtı osığan üyretip tastağalı qaşan? Biraq, sporttağı jetistikti memlekettiñ damuımen tikeley baylanıstıratın bilik sol sportşınıñ jeñilisin eldiñ kemşiligi dep sanamaytını tağı bar.

Mäselen, 2012 jılı Londonda Qazaqstan sportşıları 7 altın medal' jeñip alğanda, bwl bizdiñ eldiñ älemdegi alpauıt memleketter qatarına qosılğanınıñ belgisi dep ügittedi. Alayda, arada biraz jıldar ötkende sol «altındardıñ» törteuin doping dauına baylanıstı tartıp aldı. Al bwl jağdayğa bilik ökiniş bildirgen joq.

Sport pen sayasattı aralastırıp, sportşınıñ tek nätijesine ğana nazar audaratın jauaptı şendilerdiñ qateliginen bolar, elimizde doping dauı äli örşip twr. Tipti soñğı bes jılda 263 sportşı rwqsat etilmegen därumen paydalanğan körinedi. Bwl turalı QR Mädeniet jäne sport vice-ministri Eldos Ramazanov mälimdegen bolatın.

«Keñinen jürgizilip jatqan nasihat şaralarına qaramastan, dopingti paydalanu jağdayı azaymay keledi. Soñğı 5 jılda Qazaqstan sportşıları tarapınan doping paydalanudıñ 263 oqiğası anıqtaldı», - degen edi Ramazanov Parlament Senatındağı Ükimet sağatında.

Qazaqstan Respublikası Dopingke qarsı wlttıq ortalığı soñğı bes jılda dopingpen wstalğan qazaqstandıq sportşılardıñ tizimin jariyaladı.

Söz soñında tağı bir mälimetpen bölise keteyik. 2008-2012 jılğı Olimpiada oyındarında doping dauına ilingenderdiñ reytingisin «oşaqtıñ üş bwtınday asa tatu körşiler» - Resey, Qazaqstan jäne Belarus' bastap twr. Reseydiñ 19 sportşısı Olimpiada medalin qaytarıp berse, elimiz sportşıları enşilegen 9 Olimpiada jüldesi jaña iesin tapqan. Al Belarus' eliniñ 7 sañlağı medalinen ayırılğan eken (2018 jılğı derek).

Quanış Qappas

Abai.kz

20 pikir