Jwma, 10 Şilde 2020
COVID-19 QAZAQSTANDA. Jwqtırğandar — 53021. Jazılğandar — 31277. Qaytıs bolğandar — 264
Ne deydi?! 1448 15 pikir 30 Mamır, 2020 sağat 14:35

140 mlrd dollar. Bwl – offşordağı aqşa...

2015-2019 jıldıñ aralığında Qarjı ministrliginiñ nwsqauımen şetel asqan aqşağa qatıstı 238 qılmıstıq is qozğalıptı. Solardıñ arasında tek üşeui ğana sotqa jetken. Bwl turalı Senat deputatı Ol'ga Perepeçina deputattıq saual joldadı.

Sonımen, deputat keltirgen derekke köz jügirteyik:

QR Qarjı ministrligi, Qarjı monitoringi komitetiniñ Ekonomikalıq tergeu qızmeti wlttıq nemese şeteldik valyutalardı repatriaciyalau talaptarın orındamağanı üşin 2015-2019 aralığında wzın-ırğası 238 is qozğağan. YAğni, sotqa deyingi tergeudiñ biriñğay reestrine osınşa is tirkelgen.

2015 jılı – 75,

2016 jılı – 83,

2017 jılı – 16,

2018 jılı – 41,

2019 jılı – 23.

Osı 238 istiñ tek 3-eui ğana sotqa jetken.

«Şamamen 170 is qılmıstıq qwramı däleldenbegendikten toqtatıldı. Iä, aqşanıñ şetel asqanı anıq. Alayda, Qazaqstannıñ zañı boyınşa bwl qwqıq bwzu dep tabılmaydı», - depti Perepeçina.

Al sotqa deyin jetken üş qılmıstıq is boyınşa aqşanı keri qaytaru qarastırılmaptı, sebebi Qılmıstıq-processualdıq kodekste aqşanı keri qaytaru turalı talap joq eken.

«Tax Justice Network» Halıqaralıq wyımınıñ dereginşe, soñğı 20 jılda Qazaqstannan şığarılğan kapital kölemi 140 milliard dollardı qwraptı. Bwl tek qana offşorlıq aymaqtarğa şığarılğan aqşa soması eken.

Deputattıñ sözinşe, qanşa qılmıstıq is qozğalsa da, şetelge şığarılğan qarajattan Qazaqstanğa kök tiın da qaytpağan.

Osı mäleseni söz etken deputat Perepeçina Ükimetbası Mamin men Bas bankir Dosaevqa saual joldaptı.

«Qazirgi qoldanıstağı zañ sırtqa ağılğan kapitaldı elge qaytaruğa qauqarsız. Bwl tarapta naqtı taldau jürgizip, ekonomikalıq zertteu jasau qajet. Qazaqstanda qıruar aqşanı zañdı türde şetelge alıp şığatın san türli joldar bar. Tipti qarajattı zañsız alıp şıqqanı däleldense de, onı şetelden keri qaytaratın talaptar qoldanıstağı zañda qarastırılmağan.

Jalpı Ükimettiñ kapitaldı keri qaytaruğa qatıstı ne bilgeni bar? Mwnımen naqtı qay memlekettik organnıñ aynalısatının anıqtap alu qajet», - deydi senator.

Ayta keteyik, 2016 jılı Panama offşorlarınıñ tizimi jariyalanıp, onda sol kezdegi Dariğa Nazarbaeva, Erlan Sağadiev bastağan birqatar qazaqstandıq şeneuniktiñ atı atalğan edi.

Bwl mäsele jöninde ötken jılı Azat Peruaşev Prem'er-ministr Asqar Mamin men Bas prokuror Ğizat Nwrdäuletovtiñ atına deputattıq saual joldağan bolatın. Onıñ aytuınşa, Qazaqstannan 167 mlrd. dollar zañsız şığarılıp, offşorlarğa jasırılğan.

Al biıl Azat Peruaşev offşorğa ketken aqşanı qaytaru üşin BWW tobına «Aq jol» ökilderin qosudı wsınğan bolatın.

Abai.kz

15 pikir