Senbi, 15 Tamız 2020
COVID-19 QAZAQSTANDA. Jwqtırğandar — 102287. Jazılğandar — 80716. Qaytıs bolğandar — 1269
Aqmıltıq 2628 27 pikir 13 Şilde, 2020 sağat 10:34

Bwl Täñirdiñ sınağı!

Qazirgi bizdegi pandemiyanıñ uşığuı osıdan 2-3 ay bwrın Iran, Italiya, Ispaniyalarda boldı. Olardağıdan bizdiñ jağdaydıñ ayırmaşılığı - olar senbey ürınsa, biz karantindi tiimdi paydalanbağandıqtan jağday uşıqtı. Oğan, osınday indettiñ kezinde qazına qarjısın tonau, Wlttıq parkterdi satu, eskertkişter salıp otşaşudan qoldarı bosamağan, yağni, el qayğısına nemqwraylı, korrupciyağa bılıqqan bilik pen Sarıağaşta imamdı jerleu kezinde saqtıq şaraların sanalı türde bwzıp, şwbırıp jürgen 600-700 essiz tobırdıñ özderi kinäli.

Qasietti Qwranda: «Eger belgili bir qauım öz müddesi üşin tirlik jasamasa, ol qwridı», degen mağınada jazılğan.

Körşi qırğızdıñ osı indetke qarsı istep jatqan jan süysinerlik birligi men tirliginen bolar, eldiñ bolaşağın körsek. Bizdegi bireuler äleumettik jelide «Qonaev tatar ma?», «Eger solay bolsa, onı basşılıqqa saylağan Oñdasınov kinäli?!» degen qanden ittiñ sarığanınan asa almay jür.

Bwl «Qwm jinalıp tas bolmas, Qwl jinalıp el bolmastıñ» tirligi!

2009 jılı Oñt. Koreyadağı investforumda LG, Hyunday t.b. kompaniyalarda bolğanda, olardıñ maqtanıp aytatındarı 1997 jılğı dağdarıstan şığu üşin barlıq qız-kelinşekter altın, bağalı sırğa-saqinaların, barlıq azamattar bağalı zattarın jinap Prezidentinen dağdarıstan şığarudı talap etken. Ol el keme, kabel' şığarudan älemde birinşi, avto şığarudan besinşi, jalpı damu körsetkişi 13-şi orında.

Bwl, öz bağasın biletin, birligi berik, bir jağadan bas, bir jeñnen qol şığarğan eldiñ berekeli tirligi. Onday, birligi mıqtı eldi jau da, pandemiya da almaydı. Qazirgidey kezdi qazaq, «äkemdi alğan qwdayğa senbeymin» deydi.

Däri mäselesimen aynalısqan on künde körgenimiz, Qabibolla Jaqıpov ağamız qorğa qarjı audarıp, oğan äriptesterin jwmıldırsa, Asqar Mırzahmetov äkimderdi wyımdastırıp, Qırımbek Köşerbaev aldıñğı küni eki bort (samolet) Resey men Ündistanğa därige ketkenin habarladı. Talğat Temenov, Alma Tüsipbekova, Beşir Jañaltay (Londonnan), Nesiev Omarbek (Mäskeuden), Baqtiyar Mäken t.b. ärkim şamalarınşa kömek berude. Bwl biz biletin är jerdegi jaqsılar. Basqa ağayındardıñ el tağdırına alañdağan tirlikterin estip jatırmız.

Biraq bwl, köp tükirgende bolatın köl emes, tamşı ğana. Qazaq elin ekinşi soqqan pandemiya da biriktire alatın emes!.. Sebebi, Asan qayğı babamız aytatın «narmaya sirek, ayır köp». Mahambet mwndayda, «tirşilikte sıylaspağan ağayın, ölgennen keyin köziñe qan qwyılsın» deydi.

Bizge wlt bolıp birigip, kovidpen küresu üşin beybit uaqıtta qanşa qandasımız, otandasımız ölu kerek? Älde, qanşa qoñırat, dulat, aday... öldi dep statistika jürgizip otıra beremiz be?

Bwl Täñirdiñ sınağı!

Biz biletin Nwh payğambardıñ kezindegi topan suınan bastap, Iesus payğambardı darğa asu... 1337-1345 jj. Europa halqınıñ 1/3 jalmağan oba, 1918-1920 jj. 200 mln adamnıñ ölimine sebep bolğan «ispanka» t.b., bwlar ärkez bolıp twratın sınaqtar...

Biligi el üşin qızmet etetin Tayland memleketi 03.01.2020 küni habardı estigen künniñ erteñine tügeldey şekarasın jauıp, karantin jariyaladı. Ol elde 6 mln qıtay twrıp jatsa da, indet tarağan joq, adam ölimi de, korrupciya da joq.

Älemniñ aldına şıqqan bizdiñ bügingi qayğılı jağdayımızdıñ negizgi sebebi, - ol öz mindetterin bilmeytin biliktegi ezbeler jäne zañ men tärtip degendi bilmeytin kezbelerdiñ kesirinen olarğa des berip kelgen essiz eldiñ olaqtığınan bolıp otır.

Qazaq, «Salaqtan olaq jaman» deydi. Salaq adam bolsa da, olaq wlt bolmaydı. YAğni, mäñgürtter jinalıp memleket bolmaydı.

Bwl künder de öter. Biz odan tiisti sabaq ala alamız ba?! Älde oydı toyğa, ömirdi ölimge, eldikti qwldıqqa, adamdıqtı nadandıqqa, namıstı naqwrıstıqqa ayırbastap jüre beremiz be?! Mäsele osında ğoy...

Janwzaq Äkim

Abai.kz

27 pikir