Jwma, 7 Tamız 2020
COVID-19 QAZAQSTANDA. Jwqtırğandar — 96922. Jazılğandar — 70680. Qaytıs bolğandar — 1058
Jañalıqtar 5821 0 pikir 25 Aqpan, 2013 sağat 09:02

Äziret Barbol. «Qazaqstan 2030» strategiyası: neden wttıq, neden wtıldıq?

N.Nazarbaev. «Qazaqstan-2030» Strategiyası: «Eger eline qauip tönip twrsa, jeke adam qanşalıqtı sätti ömir sürgenimen, ol bäribir qorğansızdıñ künin keşedi. Qoğamdıq müddeniñ jekemenşik müddeden basım ekenin körsete otırıp, mwnı äsirese bizdiñ wlttıq kapitalımızdıñ ökilderi tereñ payımdauğa tiis.»

N.Nazarbaev. «Qazaqstan - 2050» Strategiyası: «Osılayşa 2030 Strategiyasında belgilengen negizgi mindetter orındaldı, qalğandarı orındalu üstinde»

N.Nazarbaev. «Qazaqstan-2030» Strategiyası: «Eger eline qauip tönip twrsa, jeke adam qanşalıqtı sätti ömir sürgenimen, ol bäribir qorğansızdıñ künin keşedi. Qoğamdıq müddeniñ jekemenşik müddeden basım ekenin körsete otırıp, mwnı äsirese bizdiñ wlttıq kapitalımızdıñ ökilderi tereñ payımdauğa tiis.»

N.Nazarbaev. «Qazaqstan - 2050» Strategiyası: «Osılayşa 2030 Strategiyasında belgilengen negizgi mindetter orındaldı, qalğandarı orındalu üstinde»

Elbasımız ötken jıldıñ soñında «Qazaqstan-2050» Strategiyasın jariyalap, wzaq merzimge Qazaq eliniñ damu bağdarlamasın jasap bergen bolatın. Bwl zañdılıq. Öytkeni kez-kelgen örkenietti memleketterdiñ barlığında da wzaq merzimdi qamtitın Strategiyalıq josparları bar. Alayda Elbasımız N.Nazarbaevtıñ «Qazaqstan - 2050» Strategiyasında: «Osılayşa 2030 Strategiyasında belgilengen negizgi mindetter orındaldı, qalğandarı orındalu üstinde» - dep atağanday eldigimizdiñ simvolına aynalğan jaña elordamız - Astananıñ boy köterui, äleumettik-ekonomikamızdıñ künnen-künge qarıştap ösui, memlekettik üdemeli industriyalıq bağdarlamasınıñ jüzege asuı, innovaciyalıq tehnologiyalarğa qol jetip qoğam igiligine aynaluı, jwmıssızdıq barınşa azayıp, elimizde twraqtılıq ornap, etnosaralıq tatulıqqa qol jetkizuimidiñ arqasında elimiz EQIW-ğa törağalıq etip, Wyımnıñ Sammitiniñ Astanada ötui, EKSPO-2017 halıqaralıq körmeni ötkizuge qol jetkizudiñ barlığı ärine «Qazaqstan-2030» Strategiyasınıñ merziminen bwrın orındaluı dep wqsaq, «qalğandarı orındalu üstinde» dep Elbasımız atağan, äli tolıq orındalıp bolmağan, biraq äli «orındalu üstinde» twrğan   «Qazaqstan-2030» Strategiyasınıñ negizgi basım bağıttarın söz etsek.  

Qazaqstan - 2030 strategiyası
1-wzaq merzimdi basımdıq: Wlttıq qauipsizdik

1. Bostandıq pen täuelsizdikti jeñip alu jetkiliksiz, onı tabandı türde qorğap, nığaytıp, wrpaqtarğa qaldıru qajet.

2. Eger biz öz memlekettiligimizden ayrılıp, egemendigimizdiñ strategiyalıq negizderin, öz jerlerimiz ben resurstarımızdı qolımızdan şığarıp alsaq, bizge keşirim joq.

3. Qauipsizdiktiñ basımdığı anıq: eger elimiz qauipsizdigin saqtamasa, onda twraqtı damu josparları turalı söz qozğaudıñ özi qisınsız.                            

4. Babalarımızdıñ öz memleketiniñ irgetasın qalauı men damıtuın şolıp qarağanda, olardıñ öz memlekettiligin saqtap qalu üşin tarihi auır jäne qatal küres jürgizgenin ayqın körsetedi.

5. Eger eline qauip tönip twrsa, jeke adam qanşalıqtı sätti ömir sürgenimen, ol bäribir qorğansızdıñ künin keşedi. Qoğamdıq müddeniñ jekemenşik müddeden basım ekenin körsete otırıp, mwnı äsirese bizdiñ wlttıq kapitalımızdıñ ökilderi tereñ payımdauğa tiis.

6. Bizge degen nieti teris küş iesi öziniñ, onı qoldanbaq äreketine nemese qater töndiruine qarsılıq körsetiletinin aldın ala bilu üşin biz älemge birligimiz ben täuelsizdikke degen erik-jigerimizdi, azamattığımız ben otansüygiştigimizdi paş etuge tiispiz. Ayqın azamattıq twğırımız bolmayınşa, strategiyanıñ täuelsizdikti qamtamasız etuge bağıttalğan basqa elementterin oydağıday iske asıru öte qiınğa tüsedi.

7. Wlttıq qauipsizdik basımdıqtarınıñ deñgeyine mıqtı demografiyalıq jäne köşi-qon sayasatı şığarıluğa tiis. Eger bizdiñ memlekettik organdarımız bwğan bwrınğısınşa nemqwraydılıqpen qaraytın bolsa, onda biz HHİ ğasırdıñ qarsañında Reseydiñ artınan adam sanı sırtqı köşi-qon procesterinen ğana emes, tabiği jolmen kemi beretin «demografiyalıq oppa» jağdayına tap bolamız. Bwl tendenciya dereu toqtatıluğa tiis.»

Qazaqstan - 2030 strategiyası
7-wzaq merzimdi basımdıq:

NEGİZGİ MİNDETTERMEN ĞANA
ŞEKTELETİN KÄSİPQOY MEMLEKET

1. Bet-jüzine, lauazımına qaramay, sıbaylas jemqorlıqqa qarsı ımırasız küres jürgizu qajet. Basqaru korpusı batıl tazaruğa jäne jañaruğa tiis.

2. Jaña twrpattı şeneunik - öz wltınıñ otanşıl äri ädil, isine adal jäne käsipqoy bilikti qızmetşisi boluğa tiis. Memlekettik qızmettiñ bedelin biik köteru jäne qoldap otıru - bizdiñ tayau jıldarda şeşuge tiis strategiyalıq mindetimiz.

3. Käsipqoylıq, otanşıldıq, wzaq merzimdi mindetter qoyuğa qabilettilik, olardı jaña jağdayda şeşe alatın bilimdilik pen jigerlilik - kadrlardı irikteu men joğarılatudıñ bastı ölşemderi.

4. Kadrlardı basqarudıñ jalpımemlekettik jüyesin qwru qajet, onda olardı elimizde jäne sırt jerlerde nısanalı äri tiimdi dayarlaudıñ, olardı qızmet babında joğarılatudıñ ädiletti tärtibi, birıñğay aqparat tetigi, äleumettik qorğau kepildigi äri basqarudıñ eñ irgeli resursı - adamğa degen sergek közqaras qamtıluğa tiis.

5. Sonımen birge bwl memlekettik jüyeniñ bilimsiz, biliktiligi tömen qızmetkerlerdi ığıstıra alatın qabileti de boluı kerek. Är qızmetker is jüzinde özingiñ paydalı ekenin jäne kerektigin wdayı däleldep otıruğa tiis.» - delingen wlttıñ wlı mwrattarı aytılğan bolatın.
Endi osı joğarıda aytılğan «Qazaqstan-2030» Strategiyasınıñ bastı bağıttarı qay deñgeyde orındaldı?! Strategiyada Elbası qoyğan talaptardıñ tolıq orındalmauı nelikten?! Qazaq qoğamı «2030-Strategiyasınan» ne wttı, neden wtıldı sonı älimizşe taldap köreyik.
Juırda Memleket Basşısı Nwrswltan Nazarbaev respublikadağı qwqıq qorğau organdarınıñ basşılarımen keñeytilgen mäjilis ötkizgen bolatın. Sol jiında elimizdiñ bas prokurorı Ashat Dauılbaev bayandama jasap, soñğı kezdegi qwqıq qorğau salasındağı bastı kemşilikterdi jipke tizgendey atap: «- Sottar qılmıskerlerdi negizsiz türde aqtap şığuın toqtatar emes,», «-Soñğı üş jılda prokuratura narazılığına qaramastan 71 twlğağa qatıstı osınday jağday boldı. 2011 jılı Astana sotı kisi ölimine qatısı bar Botabaev degen azamattı aqtadı. Al prokuraturanıñ barlıq narazılığı alınıp tastaldı. Bir jıl ötpey jatıp älgi Botabaev İle Alatauı wlttıq parkinde bolğan qayğılı oqiğağa qatısı bar ekstremistik toptıñ qwramınan tabıldı. Qazir ol izdeude. Alayda sud'yalardıñ äli eşbiri bwğan qatıstı öz moynına jauapkerşilik alğan joq.» - dedi bas prokuror. Elbasınıñ: «Onıñ kisi öltirgeni däleldense de sottalmağan ba?» - degen swrağına A.Dauılbaev: «Iä, onıñ qılmısı däleldense de, ol jazasın tartqan joq» - dep jauap berdi. Atalğan jağdaylardan habardar bolğan Elbası Joğarğı Sot törağasına: «Bwl jağdayğa Bektas, nege jaybaraqat qarap otırsıñdar? Jañağı kisi öltirgen adamdı sot beker bosatqan joq. Olar para, yağni aqşa alu jolımen bosatıp otır. Nege onı jwmıstan quıp şıqpadıñdar, halıqqa nege aytpadıñdar?» - dep sınğa aldı.
- Eldegi twraqtılıq pen wlttıq qauipsizdik mäselesi «Qazaqstan-2050» Strategiyasında tolıq qamtılğan, - dedi Prezident N.Nazarbaev. Sol sekildi Elbası İşki ister ministri Q.Qasımovtı ornınan twrğızıp: «Olar kimniñ esebinen jalaqı alıp otırğandarın wmıtıp ketetin sekildi. Bwl qızmetkerlerge aylığı uaqıtında salıq esebinen tölenip otır. Nege tiisti tärbielik jwmıstar joq, nege sizder osınday adamdardı köpşilik aldında jazalamaysızdar?» -dep mansabın teris maqsatqa paydalanğandardı äşkere etti.
- Korrupciyamen küresetin organnıñ qızmetkerleri özderi para alsa, oğan kim senedi. Onda da jemqorlıqpen biz «wsaqtarın» ğana qwrıqtaymız, al joğarıda otırıp bwyrıq bergenderdi wstamaymız, - dep atay otırıp: - Mısalı, bıltır ğana qarjı policiyasınıñ 21 qızmetkeri osı is boyınşa qılmıstıq jauapkerşilikke tartılıptı. Men aytqan bolatınmın, eger qızmetker qolğa tüsse, onıñ basşısı jauap berui kerek. Qanşasın wstadıñızdar? Degen N.Nazarbaevtıñ swrağına bas qarjı policeyi Raşid Tüsipbekov: «Biz attestaciya ötkizgenimizge qaramastan, tipti attestaciyadan keyin de biz para alğan altı qızmetkerimizdi anıqtadıq», - dedi.
«Jalpı qarjı policiyası siyaqtı organ bizge kerek pe? Älde Singapurdağıday arnayı byuro jasaymız ba? Ne sebepti qarjı policiyası jemqorlıqpen kürese almaydı?» - degen orındı swraq tastadı N.Nazarbaev.  
«Qazaqstan - 2030 Strategiyasınıñ «Wlttıq qauipsizdik» attı 1-wzaq merzimdi basımdığındağı: « Eger biz öz memlekettiligimizden ayrılıp, egemendigimizdiñ strategiyalıq negizderin, öz jerlerimiz ben resurstarımızdı qolımızdan şığarıp alsaq, bizge keşirim joq.» - degen wlttıñ wlı mwratın köksegen «Strategiyalıq negizderdi» qalay orındaldı dep ayta alamız egerde qauipsizdik qızmetkerleriniñ özderi «wlttıq qauipsizdikke»  «qauip töndirse»      
«Eger eline qauip tönip twrsa, jeke adam qanşalıqtı sätti ömir sürgenimen, ol bäribir qorğansızdıñ künin keşedi. Qoğamdıq müddeniñ jekemenşik müddeden basım ekenin körsete otırıp, mwnı äsirese bizdiñ wlttıq kapitalımızdıñ ökilderi tereñ payımdauğa tiis.» - delingen «2030-Strategiyasında» aytılğan basım bağıttı orındadıq dep te qalay maqtanamız?! Eger de Elbası N.Nazarbaev aytqanday: «Korrupciyamen küresetin organnıñ qızmetkerleri özderi para alıp jatsa?»
Sol sekildi «2030-Strategiyadağı»: «Qauipsizdiktiñ basımdığı anıq: eger elimiz qauipsizdigin saqtamasa, onda twraqtı damu josparları turalı söz qozğaudıñ özi qisınsız» - delingen «Strategiyalıq jospardı» da tolıq orındadıq dep qalay ayta alamız?! Eger de  «2030-Strategiyada» atalğan «twraqtı damu josparların» jüzege asıruşı negizgi organ Memlekettik biliktegi jemqorlıq derti memleketimiz damığan sayın künnen-künge ösip, elimiz örkendegen sayın tıyılmasa?!
Elimizdiñ bas sanaqşısı, qatın bastıq «tügenşe» tüyeni tügimen jwtıp qaşıp ketipti, Hrapunov anau qazına mülkin qarmap qaşıp ol ketti» degen sözderge qazaq qoğamınıñ qwlağı üyrengeni sonşa ol qazir «qalıptı» jağday retinde qalıptastı.  Mäselen soñğı kezdegi otandıq BAQ-tardıñ betinen tüspey kele jatqan atı şulı «Hrapunov isiniñ» özi memlekettik qauipsizdigimizge qanşalıqtı sına qaqtı?! 2009 jıldıñ jeltoqsan ayında francuzdıq «Bilan» jurnalı onı Şveycariyadağı eñ däuletti 300 adamnıñ sanatına qosqan. BAQ-tağı mälimetterde 2009 jılı onıñ jeke qarjısı 300-400 million şveycar frankine, dollarmen eseptesek 360-480 million AQŞ dollarına jetipti. Ärbir qazaqtıñ mañday terinen jiılıp, qwralğan qarjını jımqırıp, aqırı şetelge qaşqan Almatı qalasınıñ eks-äkimi bolğan, basınan baqayşığına deyin haramnan mal jiğan, 20 qılmıstıq isti moynına jüktegen Hrapunov 2004 jılı Şığıs Qazaqstan oblısınıñ äkimi, odan soñ 2007 Tötenşe jağdaylar ministri de bolıp ülgerip edi.  
Interpoldıñ izdeuinde jürgen «Qazatomprom» AQ-nıñ vice-prezidenti Rüstem Twrsınbaev «memlekettik menşiktegi mülikti talan-tarajğa salıp» 20 mln. dollardı alıp şet asqan.
Osılayşa şetel asqan, şetel qaşqandardı tizbektey berseñ kete beresiñ, kete beresiñ. Basınan bülinip, bilikte otırıp, qazaqtıñ qarjısın qımqırıp qaşıp ketkenderdiñ soñğı on üş jılda Qazaqstannan zañsız şekara asırılğan qarajat kölemi 300 mlrd. dollarğa juıqtağandığın basqa emes, sol otandıq bilikşil BAQ-tıñ özi jarısa jazağan bolatın.
Osıdan soñ «Qazaqstan - 2030» Strategiyasınıñ: «Bet-jüzine, lauazımına qaramay, sıbaylas jemqorlıqqa qarsı ımırasız küres jürgizu qajet. Basqaru korpusı batıl tazaruğa jäne jañaruğa tiis», «Jaña twrpattı şeneunik - öz wltınıñ otanşıl äri ädil, isine adal jäne käsipqoy bilikti qızmetşisi boluğa tiis. Memlekettik qızmettiñ bedelin biik köteru jäne qoldap otıru - bizdiñ tayau jıldarda şeşuge tiis strategiyalıq mindetimiz» - delingen «7-wzaq merzimdi basımdığın» jüzege asırdıq, orındaldı dep qalay ayta alamız?!  «Basqaru korpusı batıl tazardı jäne jañardı» dep qaytip maqtanamız, egerde deni osınday basqaru korpusındağılar 300 mlrd. dollar qazaq qarajatın alıp qaşıp, elin satıp ketse?!  
Bwl biz biletin äşkere bolğandarı desek, el bilmeytin, biraq sol el esebinen esirip, eldi eleñ etkizbey eñiretip otırğandarı qanşa?! Qazir eñ qauiptisi, qorqınıştısı osı bolıp twr.     
«Wlttıq qauipsizdik basımdıqtarınıñ deñgeyine mıqtı demografiyalıq jäne köşi-qon sayasatı şığarıluğa tiis. Eger bizdiñ memlekettik organdarımız bwğan bwrınğısınşa nemqwraydılıqpen qaraytın bolsa, onda biz HHİ ğasırdıñ qarsañında Reseydiñ artınan adam sanı sırtqı köşi-qon procesterinen ğana emes, tabiği jolmen kemi beretin «demografiyalıq oppa» jağdayına tap bolamız. Bwl tendenciya dereu toqtatıluğa tiis.» - delingen  «2030-Strategiyadağı» «demografiyalıq» mäselemizdi qanşalıqtı şeşe aldıq, oğan  Elbasımız aytqan «memlekettik organdarımız bwğan bwrınğısınşa nemqwraydılıqpen qaramay», kerisinşe «Wlttıq qauipsizdik basımdıqtarınıñ deñgeyine mıqtı demografiyalıq jäne köşi-qon sayasatı şığarıldı» ma?! Desek te bwl mäseleniñ de «kenjelep» artta qalıp otırğandığın añğaru tağı da qiın emes.
Demograf Maqaş Tätimovtiñ statistikalıq mälimeti tastandı balalardı 80 mıñ dep körsetken. Al, 120 mıñ käri qızdardıñ otbasın qwrudan jeke ömirdiñ läzzätin artıq sanauı osınıñ däleli.     
Amerikalıq tanımal sayasi sarapşı Patrik Dj B'yukenenniñ Ortalıq Aziyadağı wlttar ösimi turalı saraptaması boyınşa 2000 jılı bizdiñ elde jılına 200 mıñ äyel jasandı tüsik jasatsa, sonıñ 14 mıñğa juığı äli kämeletke tolmağan qızdar eken. Al, Qazaqstanda jasandı jolmen tüsik tastau Europa Odağı elderimen salıstırğanda üş ese köp degen qorqınıştı derekter de bar. Ayağı auır 100 äyeldiñ ortaşa eseppen 62-si abort jasatadı eken. (Qalbay Ädil. «Qazaq qaytip köbeyer...» Zañ gazeti, №19, 2009)
Osılayşa elimizdegi ayağı auır 100 äyeldiñ 62-si işindegi qanday jolmen bitkendigi belgisiz bolğan «aram sidik» balasın özi qolşa öltirip jatsa oğan ne amal, ne şara?! Jatırındağı teksiz «aramın» boyına şaytani jolmen «bitirgende» bir, onı «öltirip» abort jasatıp aldırtqanda eki künäli bolğan qazaq qızınıñ ananday auır haline qarap qan jılağannan basqa amalımız bar ma?! Al osınday jağdaydı közimizben körip, qwlağımızben estip ösken qoğamda jürip: «demografiyalıq oppa» jağdayına tap bolmadıq» dep aytuğa auız qalay baradı?! Tipti alañdatarlığı sol - irip, şirip barajatqan Europa elderinen asıp tüskendigimiz bolıp twr. Sonda bizdiñ kim bolıp, qayda bet alıp, köş tüzep baramız?! Jadırağan jarqın bolaşağımız qayda?! Ötken tarihtağı atam qazaq aytqan: «Wlt boludıñ bası - äueli besigin tüzegen», «Bir qolımen besikti, ekinşi qolımen älem» terbetetin äyelderimiz, äsirese, örimdey jas qazaq qızınıñ ananday qasiretke duşar boluı - «demografiyalıq oppanıñ»  naq özi bolıp twrğanday.   

QORITINDI SÖZ

Elbasımız N.Nazarbaevtıñ «Qazaqstan - 2050» Strategiyasında: «Osılayşa 2030 Strategiyasında belgilengen negizgi mindetter orındaldı, qalğandarı orındalu üstinde» - dep atağanday «Qazaqstan - 2030» dıñ äli de orındalu üstinde twrğan negizgi basımdığı ol - «Wlttıq qauipsizdik» mäselesi ekendiginde dau joq. Onı joğarıda barınşa ayqın däleldermen körsete bildik. Sondıqtan da «Wlttıq qauipsizdik» mäselesimen aynalısatın qwqıq qorğau qızmetkerleri Elbası aytqanday: «jemqorlıqpen kürese almay, wlttıq qauipsizdikti saqtay almasa, onday organnıñ qanşalıqtı qoğamğa keregi bar?»
Degenmen, Elbası aytqanday: «wsaqtarı» ğana qwrıqtalıp, al joğarıda otırıp bwyrıq bergenderi wstalmay» otırğan qazirgi bizdiñ qoğamda qanşa jazıqsızdar japa şegip otır, qanşası «organ qızmetinen» ümit üzip otır ol jağı Bir Allağa ğana ayan! Bas prokurordıñ mälimetine sensek osılay demeske amal bar ma?! Degenmen elimizdegi zañnıñ orındaluın qadağalauşı organ - prokuratura da bwl dertten qwlan taza ayıqqan «aman» desem haqiqatqa haram bolar. Bärine birdey küye jağu bizdiñ mindet emes, biraq işinara kezdesetindigi ayan.  
«Qazaqstan-2030» Strategiyasınıñ Elbası atağanday: «äli orındalıp bolmağan, biraq orındalu üstinde» boluınıñ anığı - wltıq qasiretimizge aynalğan ruhani dert, ruhani keseldiñ qoğamdıq sipat alıp, el ömirine dendep enui bolıp twr. Tipten qazir qoğamda «janı taza» adamnıñ kün körui ekitalay bolıp, sondıqtan mäjbürli türde «halalın» «haramğa» jwmsauı - bwl jazılmağan zañ, biraq, küşine engen zañıñnan da  beterligi ekiniñ biriniñ kökeyinde sayrap twr.
«Adamdıq borışıñ halqıña qızmet et» dep bar ğwmırın sarp etip ruhani derttiñ emin tapqan ruhani wstaz Şäkärim äulieniñ «Boqtı boqpen juğan men el tüzelmes» degeni esimizge oraladı  eriksiz.
Ş.Qwdayberdiwlı:
Men adamnan taza aqıl taba almadım,
Oylanıp, özelenip, qarmağanda.
Körseqızar, jalmauız, bäri aldağış,
Köp adamnıñ qılığın barlağanda.
Önerpaz , bilimdi eldiñ minezi osı -
Ayau, järdem, mahabbat qalmağan ba?
* * * *

«Ğılım degen bwl bolsa, adıra qalsın», -
Demeske bara jatır işim tolıp.
Qaneki, aq jürekke qaysıñ jettiñ?
Jettim dep tamam jandı tentirettiñ.
Jiırmasınşı ğasırdıñ adamınan
Anıq taza bir eldi körmey öttim.
Nemese,
Tamam adam perişte bolmay twrıp,
«Al tüzelşi degenge» eşkim könbes.
Ayla, küş - ayuandıqtıñ eñ jamanı,
Boqtı boqpen juğanmen el tüzelmes.
Ar tüzeytin bir ğılım tabılmasa,
Zwlımdıqtı jalğanda ädil jeñbes.
Qwr aytqanmen qolınan tük kelmeydi,
Aq jürekti taza adam bolsa kem-kes.
Qas tüzeymin dep jürip köz şığarıp,
«Qalmaq oyın» oynaumen eşteme önbes.
Jas balanı wrğanmen şırıldatıp,
Oyı tolmay twrğanda aqılı önbes.
Aranı aşıq jalmauız, arsız töbet.
Aulaqta jemtik jeuden jiirkenbes.
Adamnıñ sırtqı dene jaralısı,
Näpsisi ayuanmen anıq teñdes.
Bölektigi - jalğız-aq taza aqılda,
äliñ kelse, jol tap ta, osını emdes!» - dep,  «Qas tüzeymin dep jürip köz şığaratın», «Aranı aşıq jalmauız, arsız töbetterdiñ», «Al tüzelşi degenine» eşkim könbeytindiginiñ»  bastı sebebi - «Boqtı boqpen juğannıñ» mısalınday dep körsetedi äulie atam.
Şäkärim qajınıñ sözimen aytsaq: «Önerpaz, bilimdi el bola twra» «Jiırmasınşı ğasırdıñ adamında bolğan» bwl qoğamdıq kesel qanşa önerli, ğılımdı, örkenietti bolsaq ta jiırma birinşi ğasırdıñ adamına jwğıp, dendep, tipti tıyılmay otırğandığın qazir köz körip, qwlaq estip, et üyrenip ketti.   
Sondıqtan da «Qazaqstan-2050» Strategiyasında aytılğan: «Mäñgilik El boluımız» üşin, «Qazaqstan-2050» Strategiyasınıñ basım bağıtı: «Biz özimizdiñ wlttıq mädenietimiz ben dästürlerimizdi osı äraluandığımen jäne wlılığımen qosıp qorğauımız kerek, mädeni igiligimizdi bölşektep bolsa da jinastıruımız kerek.
Birligi bar el ozadı, birligi joq el tozadı.
Bwl - tarih zañı...
«Qazaqstannıñ eldigi asqan, erligi tasqan, kemel de kelisti elge aynaluına bizden - qazaqtardan artıq müddeli kim bar?!» - dep Elbasımız aytqanday tek «Wltımızdıñ genetikalıq kodı - wlı dästürlerimiz ben salt-sana, töl mädenietimizdi» jañğırtumen ğana «Qazaqstan-2050» Strategiyasınıñ basım bağıttarına qol jetkizip, QAZAQ MÄÑGİLİK EL BOLMAQ!
Abai.kz

0 pikir