Qazaqstandyq mәnerlep syrghanaushy, 2026 jylghy Olimpiada chempiony Mihail Shaydorov songhy bes aidan beri jalaqy almay jýrgenin mәlimdedi.

Búl turaly sportshy Timur Balymbetovke bergen kólemdi súhbatynda aitty.

Shaydorovtyng sózinshe, mәsele onyng 2025 jylghy tabysy turaly jariyalanghan esepti synaghanynan keyin bastalghan. Sportshy ol qújatta tek jalaqysy men bapkerlerge tólengen qarajat kórsetilip, al dayyndyqqa kómektesken otbasy men demeushilerding enbegi eskerilmegenin aitty.

– Olimpiadadaghy jenisten beri bes ay ótti, әli kýnge deyin jalaqy alghan joqpyn, – dedi ol.

Sportshynyng aituynsha, qazirgi jaghdayda jana baghdarlamalar dayyndau, jattyghu jiyndaryn úiymdastyru jәne kelesi mausymgha jospar qúru qiyndaghan.

Sonymen qatar Mihail Shaydorov 1 aqpannan beri resmy týrde dәrigerlik baqylausyz qalghanyn aitty. Onyng sózinshe, mәnerlep syrghanau – jaraqat qaupi joghary sport týri bolghandyqtan, túraqty medisinalyq qoldau asa manyzdy.

Shaydorov – tәuelsiz Qazaqstan tarihyndaghy mәnerlep syrghanaudan Olimpiada altynyn alghan alghashqy sportshy. Búghan deyin ol әlem chempionatynyng kýmis jýldesin, Tórt qúrlyq chempionatynyng altynyn jәne Gran-pry kezenderining medalidaryn jenip alghan.

Sportshy Olimpiadadan keyin Turizm jәne sport ministrligi men Mәnerlep syrghanau federasiyasyna sportty damytu jóninde úsynystar joldaghanyn da aitty. Onyng ishinde halyqaralyq lobbi, tóreshiler dayarlau jәne ýzdik sportshylardy qoldau mәseleleri kóterilgen.

Alayda, sportshynyng aituynsha, federasiyadan oghan qatang jauap kelgen. Onda Shaydorovty jýiening júmysyn ýstirt týsinedi dep aiyptap, qazaqstandyq tóreshige qarsy qysym úiymdastyrdy degen kinә taghylghan.

– Eger múnday jaghday Olimpiada chempionymen bolyp jatsa, basqa sportshylardyng jaghdayyn elestetu qiyn, – dedi ol.

Soghan qaramastan sportshy jattyghuyn toqtatpaghanyn aitty. Qazir ol kýnine birneshe uaqyt múz aidynynda dayyndalyp, kelesi olimpiadalyq siklge qatysudy josparlap otyr.

Sonday-aq Shaydorov Qazaqstanda jeke múz shouyn ótkizudi qolgha alghanyn mәlimdedi. Onyng aituynsha, shou jeltoqsanda ótip, oghan әlemning tanymal mәnerlep syrghanaushylary shaqyryluy mýmkin.

Ázirge Turizm jәne sport ministrligi men Mәnerlep syrghanau federasiyasy sportshynyng mәlimdemesine qatysty resmy pikir bildirmedi.

Derekkózi: zhasalash.kz

Abai.kz