Jwma, 15 Qaraşa 2019
Bilik 2771 0 pikir 26 Mausım, 2014 sağat 17:21

ELBASI ŞQO KÄSİPKERLERİMEN KEZDESTİ

 Öz sözinde Memleket basşısı Şığıs Qazaqstan oblısı elimizdiñ biregey önim türlerin öndiretin iri önerkäsiptik öñiriniñ biri ekendigine toqtaldı.

– Euraziyalıq ekonomikalıq odaq turalı şartqa qol qoyıluına baylanıstı öñir käsiporındarınıñ aldınan jaña narıq aşıluda. Industriyalıq-innovaciyalıq damu bağdarlamasın jüzege asıruğa zor köñil bölinude. Sonımen birge auıl şaruaşılığı qarıştap ilgerileude. Oblısta maylı daqıldardıñ törtten biri öndiriledi, et pen süt öndiruden jetekşi orında, – dedi Nwrswltan Nazarbaev.

Qazaqstan Prezidenti bükil respublika boyınşa basımdıqqa ie şağın jäne orta biznes sektorınıñ bwl öñirde qarqındı damıp kele jatqandığına toqtaldı.

– Şağın jäne orta käsiporındar şığaratın önimderdiñ kölemi eki jarım esege wlğaydı, barlıq jwmıs isteytinderdiñ üşten biri osı salada qamtılğan. Bwl öte mañızdı, öytkeni ekonomikağa negizgi tabıstı iri käsiporındar äkeledi, biraq olar barlığın jwmıs ornımen qamtamasız ete almaydı. Sondıqtan bwl twsta naq osı şağın biznes bağa jetpes röl atqaradı, –  dep atap ötti Memleket basşısı.

Nwrswltan Nazarbaev şağın käsipkerliktiñ damuı orta taptı qalıptastıra otırıp, ekonomikalıq qana emes, äleumettik jüyeniñ de twraqtılığın qamtamasız etetinin ayttı.

Qazaqstan Prezidenti öñirde äleumettik sala jaqsı damıp kele jatqandığına nazar audardı.

– Şığıs Qazaqstan oblısı twrğındarınıñ ömir jasınıñ ortaşa wzaqtığı jetpis jasqa deyin wzardı, tuu körsetkişi 41 payızğa östi. Bwl – twrmıs deñgeyi köterilgendiginiñ, densaulıq saqtau salası halıq üşin tiisti  deñgeyde jwmıs istep jatqandığınıñ ayğağı, – dedi Qazaqstan Prezidenti. 

Memleket basşısı Şığıs Qazaqstan üşin ayrıqşa özekti ekologiyalıq ahualdı jaqsartu jwmıstarın da atap ötti.  

Sonday-aq Qazaqstan Prezidenti basa den qoyudı qajet etetin birqatar bağıttarğa da toqtaldı.

Atap aytqanda, Memleket basşısı oblısta tüsti metaldardıñ negizgi qorı şoğırlanğanına jäne onı igeru men ekonomikalıq aynalımğa tartu jönindegi jwmıstardı küşeytu qajettigine nazar audardı.

Qazaqstan  Prezidenti önerkäsiptik besjıldıq ayasında iske qosılğan nısandardı tolıq paydalanu qajettigin de atap körsetti.

– Äkimdikterdiñ barlığı jobalardı öz aumağına tartqısı keledi, biraq jaña öndiristik nısandardıñ qajetti boluın jäne olar narıqta swranısqa ie önim şığaruğa tiis ekendigin eskergen jön. Biıl iske qosılğan barlıq nısandardıñ jwmısın qamtamasız etu kerek, – dedi Nwrswltan Nazarbaev.

Memleket basşısı agrarlıq sektordı qoldau üşin köptegen elderdiñ auıl şaruaşılığı tauarın öndiruşileriniñ qolı jete bermeytin türli mümkindikter wsınılıp jatqanına nazar audardı. Olardı öz deñgeyinde paydalanbauğa bolmaydı.

Qazaqstan Prezidenti apattı jağdaydağı mektepter mäselesin şeşudi jäne densaulıq nısandarınıñ qwrılısı kestesin mültiksiz saqtaudı tapsırdı.

Nwrswltan Nazarbaev sırtqı narıqtardağı twraqsızdıq jağdayında ekonomikanı ärtaraptandıru, işki rezervterdi paydalana otırıp, damudıñ jaña mümkindikterin izdeu mäselelerine erekşe tiyanaqtılıqpen qarau kerektigin ayttı.

Bwl orayda kadrlıq jäne ğılımi äleuetti damıtu şeşuşi mañızğa ie bolmaq.

– Öñirde jaqsı ğılımi-ağartuşılıq baza bar, biraq onıñ naqtı sektormen özara is-qimılın küşeytu kerek. Ğılım eñbek önimdiligin arttıruğa qızmet etuge tiis, innovaciyanıñ mäni de osında jatır. Jaña tehnologiyalar älemde qarqındı türde engizilude, biz de qalıspauğa tiispiz, – dedi Memleket basşısı.

Nwrswltan Nazarbaev Qazaqstanda barlıq negizgi äleumettik-ekonomikalıq salalarda – biznes jürgizude, auıl şaruaşılığı öndirisin wyımdastıruda, twrğın üy qwrılısında, oquda, medicinada, mädeniette teñdessiz şarttar wsınılıp otırğandığın atap ötti. Tek twrğındar tarapınan bastamaşılıq qajet, ol üşin tiimdi tüsindiru jwmıstarın jürgizgen jön.

Qazaqstan Prezidenti oblıstıñ jalpı alğanda tabıstı damıp kele jatqanın, biraq qarqındı äli de üdete tüsu qajettigin ayttı.

– Qajetti bağdarlamanıñ barlığı qabıldandı jäne qarajatpen qamtamasız etildi.  Olar sapalı orındaluğa tiis – dedi Memleket basşısı.  

Soñında Nwrswltan Nazarbaev memlekettik qızmetşilerdi käsibi merekelerimen qwttıqtap, barşasına tabıs tiledi.

Kezdesu barısında oblıs äkimi B.Saparbaev öñirdiñ äleumettik-ekonomikalıq damuı jöninde bayandama jasadı.

Sonday-aq Memleket basşısı «jasıl ekonomika» jäne balamalı energetika salasındağı jobalardıñ Oskemen EXPO 2014 körmesin aralap kördi.

http://www.akorda.kz/

0 pikir