ء وز سوزىندە مەملەكەت باسشىسى شىعىس قازاقستان وبلىسى ەلىمىزدىڭ بىرەگەي ءونىم تۇرلەرىن وندىرەتىن ءىرى ونەركاسىپتىك ءوڭىرىنىڭ ءبىرى ەكەندىگىنە توقتالدى.

– ەۋرازيالىق ەكونوميكالىق وداق تۋرالى شارتقا قول قويىلۋىنا بايلانىستى ءوڭىر كاسىپورىندارىنىڭ الدىنان جاڭا نارىق اشىلۋدا. يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋعا زور كوڭىل بولىنۋدە. سونىمەن بىرگە اۋىل شارۋاشىلىعى قارىشتاپ ىلگەرىلەۋدە. وبلىستا مايلى داقىلداردىڭ تورتتەن ءبىرى وندىرىلەدى، ەت پەن ءسۇت وندىرۋدەن جەتەكشى ورىندا، – دەدى نۇرسۇلتان نازارباەۆ.

قازاقستان پرەزيدەنتى بۇكىل رەسپۋبليكا بويىنشا باسىمدىققا يە شاعىن جانە ورتا بيزنەس سەكتورىنىڭ بۇل وڭىردە قارقىندى دامىپ كەلە جاتقاندىعىنا توقتالدى.

– شاعىن جانە ورتا كاسىپورىندار شىعاراتىن ونىمدەردىڭ كولەمى ەكى جارىم ەسەگە ۇلعايدى، بارلىق جۇمىس ىستەيتىندەردىڭ ۇشتەن ءبىرى وسى سالادا قامتىلعان. بۇل وتە ماڭىزدى، ويتكەنى ەكونوميكاعا نەگىزگى تابىستى ءىرى كاسىپورىندار اكەلەدى، بىراق ولار بارلىعىن جۇمىس ورنىمەن قامتاماسىز ەتە المايدى. سوندىقتان بۇل تۇستا ناق وسى شاعىن بيزنەس باعا جەتپەس ءرول اتقارادى، –  دەپ اتاپ ءوتتى مەملەكەت باسشىسى.

نۇرسۇلتان نازارباەۆ شاعىن كاسىپكەرلىكتىڭ دامۋى ورتا تاپتى قالىپتاستىرا وتىرىپ، ەكونوميكالىق قانا ەمەس، الەۋمەتتىك جۇيەنىڭ دە تۇراقتىلىعىن قامتاماسىز ەتەتىنىن ايتتى.

قازاقستان پرەزيدەنتى وڭىردە الەۋمەتتىك سالا جاقسى دامىپ كەلە جاتقاندىعىنا نازار اۋداردى.

– شىعىس قازاقستان وبلىسى تۇرعىندارىنىڭ ءومىر جاسىنىڭ ورتاشا ۇزاقتىعى جەتپىس جاسقا دەيىن ۇزاردى، تۋ كورسەتكىشى 41 پايىزعا ءوستى. بۇل – تۇرمىس دەڭگەيى كوتەرىلگەندىگىنىڭ، دەنساۋلىق ساقتاۋ سالاسى حالىق ءۇشىن ءتيىستى  دەڭگەيدە جۇمىس ىستەپ جاتقاندىعىنىڭ ايعاعى، – دەدى قازاقستان پرەزيدەنتى. 

مەملەكەت باسشىسى شىعىس قازاقستان ءۇشىن ايرىقشا وزەكتى ەكولوگيالىق احۋالدى جاقسارتۋ جۇمىستارىن دا اتاپ ءوتتى.  

سونداي-اق قازاقستان پرەزيدەنتى باسا دەن قويۋدى قاجەت ەتەتىن بىرقاتار باعىتتارعا دا توقتالدى.

اتاپ ايتقاندا، مەملەكەت باسشىسى وبلىستا ءتۇستى مەتالداردىڭ نەگىزگى قورى شوعىرلانعانىنا جانە ونى يگەرۋ مەن ەكونوميكالىق اينالىمعا تارتۋ جونىندەگى جۇمىستاردى كۇشەيتۋ قاجەتتىگىنە نازار اۋداردى.

قازاقستان  پرەزيدەنتى ونەركاسىپتىك بەسجىلدىق اياسىندا ىسكە قوسىلعان نىسانداردى تولىق پايدالانۋ قاجەتتىگىن دە اتاپ كورسەتتى.

– اكىمدىكتەردىڭ بارلىعى جوبالاردى ءوز اۋماعىنا تارتقىسى كەلەدى، بىراق جاڭا وندىرىستىك نىسانداردىڭ قاجەتتى بولۋىن جانە ولار نارىقتا سۇرانىسقا يە ءونىم شىعارۋعا ءتيىس ەكەندىگىن ەسكەرگەن ءجون. بيىل ىسكە قوسىلعان بارلىق نىسانداردىڭ جۇمىسىن قامتاماسىز ەتۋ كەرەك، – دەدى نۇرسۇلتان نازارباەۆ.

مەملەكەت باسشىسى اگرارلىق سەكتوردى قولداۋ ءۇشىن كوپتەگەن ەلدەردىڭ اۋىل شارۋاشىلىعى تاۋارىن وندىرۋشىلەرىنىڭ قولى جەتە بەرمەيتىن ءتۇرلى مۇمكىندىكتەر ۇسىنىلىپ جاتقانىنا نازار اۋداردى. ولاردى ءوز دەڭگەيىندە پايدالانباۋعا بولمايدى.

قازاقستان پرەزيدەنتى اپاتتى جاعدايداعى مەكتەپتەر ماسەلەسىن شەشۋدى جانە دەنساۋلىق نىساندارىنىڭ قۇرىلىسى كەستەسىن مۇلتىكسىز ساقتاۋدى تاپسىردى.

نۇرسۇلتان نازارباەۆ سىرتقى نارىقتارداعى تۇراقسىزدىق جاعدايىندا ەكونوميكانى ءارتاراپتاندىرۋ، ىشكى رەزەرۆتەردى پايدالانا وتىرىپ، دامۋدىڭ جاڭا مۇمكىندىكتەرىن ىزدەۋ ماسەلەلەرىنە ەرەكشە تياناقتىلىقپەن قاراۋ كەرەكتىگىن ايتتى.

بۇل ورايدا كادرلىق جانە عىلىمي الەۋەتتى دامىتۋ شەشۋشى ماڭىزعا يە بولماق.

– وڭىردە جاقسى عىلىمي-اعارتۋشىلىق بازا بار، بىراق ونىڭ ناقتى سەكتورمەن ءوزارا ءىس-قيمىلىن كۇشەيتۋ كەرەك. عىلىم ەڭبەك ونىمدىلىگىن ارتتىرۋعا قىزمەت ەتۋگە ءتيىس، يننوۆاتسيانىڭ ءمانى دە وسىندا جاتىر. جاڭا تەحنولوگيالار الەمدە قارقىندى تۇردە ەنگىزىلۋدە، ءبىز دە قالىسپاۋعا ءتيىسپىز، – دەدى مەملەكەت باسشىسى.

نۇرسۇلتان نازارباەۆ قازاقستاندا بارلىق نەگىزگى الەۋمەتتىك-ەكونوميكالىق سالالاردا – بيزنەس جۇرگىزۋدە، اۋىل شارۋاشىلىعى ءوندىرىسىن ۇيىمداستىرۋدا، تۇرعىن ءۇي قۇرىلىسىندا، وقۋدا، مەديتسينادا، مادەنيەتتە تەڭدەسسىز شارتتار ۇسىنىلىپ وتىرعاندىعىن اتاپ ءوتتى. تەك تۇرعىندار تاراپىنان باستاماشىلىق قاجەت، ول ءۇشىن ءتيىمدى ءتۇسىندىرۋ جۇمىستارىن جۇرگىزگەن ءجون.

قازاقستان پرەزيدەنتى وبلىستىڭ جالپى العاندا تابىستى دامىپ كەلە جاتقانىن، بىراق قارقىندى ءالى دە ۇدەتە ءتۇسۋ قاجەتتىگىن ايتتى.

– قاجەتتى باعدارلامانىڭ بارلىعى قابىلداندى جانە قاراجاتپەن قامتاماسىز ەتىلدى.  ولار ساپالى ورىندالۋعا ءتيىس – دەدى مەملەكەت باسشىسى.  

سوڭىندا نۇرسۇلتان نازارباەۆ مەملەكەتتىك قىزمەتشىلەردى كاسىبي مەرەكەلەرىمەن قۇتتىقتاپ، بارشاسىنا تابىس تىلەدى.

كەزدەسۋ بارىسىندا وبلىس اكىمى ب.ساپارباەۆ ءوڭىردىڭ الەۋمەتتىك-ەكونوميكالىق دامۋى جونىندە بايانداما جاسادى.

سونداي-اق مەملەكەت باسشىسى «جاسىل ەكونوميكا» جانە بالامالى ەنەرگەتيكا سالاسىنداعى جوبالاردىڭ Oskemen EXPO 2014 كورمەسىن ارالاپ كوردى.

http://www.akorda.kz/