Düysenbi, 14 Qazan 2019
Jañalıqtar 3546 16 pikir 25 Säuir, 2017 sağat 19:32

Mwhtar Äbilyazov öziniñ qızmetkerlerin qalay «paydalandı»

Almatı qalasınıñ qılmıstıq ister jönindegi mamandandırılğan audanaralıq sotında qaşqın bankir Mwhtar Äbilyazov pen onıñ sıbaylastarına qatıstı qılmıstıq isti qarau odan äri jalğasuda. Sottıñ bügingi otırısında prokurorlar BTA banktiñ qızmetkerleriniñ atına tirkelgen offşorlıq kompaniyalardı nesieleuge qatıstı qılmıstıq äreketter swlbasın jariya etti.

BTA banktegi zañsız ayla-şarğılar, negizinen alğanda, tikeley banktiñ direktorlar keñesiniñ törağası Mwhtar Äbilyazovtıñ öz qolımen jasalğan scenariy boyınşa jüzege asırılğan. Atap aytqanda, 2007 jılı bank basşılığınıñ tikeley nwsqauımen «Liter M» jauapkerşiligi şekteuli seriktestigi qwrıladı. Bwl kompaniya akciyalarınıñ bir payızdıq ülesi №6 korporativtik biznes basqarmasınıñ zañgeri Maksim Hablovtıñ atına tirkeledi. Atap aytarlığı, kuägerlerdiñ sotta jariya etkenindey, birneşe milliondağan nesieler eşqanday kedergisiz berilip otırğan rezident bolıp tabılmaytın kompaniyalardı tirkeumen osı basqarma aynalısqan. Sayıp kelgende, Maksim Hablov jañadan qwrılğan kompaniyanıñ direktorı bolıp körsetilgen.

Al, «Liter M» jauapkerşiligi şekteuli seriktestiginiñ qalğan 99 payızdıq akciyasınıñ ülesi Seyşel' araldarında tirkelgen «Steiman Corp» kompaniyasına tiesili bolğan. Ayta keterligi, offşorlıq kompaniyanıñ müddesin Qazaqstanda senimhatpen qorğau №6 korporativtik biznes basqarmasınıñ qızmetkeri Eleonora Sergoğa jükteledi. Alayda, BTA banktiñ nesie beru böliminiñ qızmetkerleriniñ eşqaysısı mwnday «bir kündik» offşorlıq kompaniyalardıñ qojayındarın ömirde körmegen.

«2007 jıldıñ şilde ayında Maksim Hablov BTA bankke 20,5 million AQŞ dolları köleminde nesie beruge ötiniş jazadı. Nesie aludağı negizgi maqsat retinde aynalımdağı qarajattıñ qorın tolıqtıru dep körsetedi»,- dep äñgimeledi sot otırısında BTA banktiñ ökili Talğat Amantay. Bwl jolı da ädettegidey eşqanday qajetti taldaular jasalmastan, ötiniş qanağattandırıladı. Tikeley Mwhtar Äbilyazovtiñ baqılauındağı nesie komiteti twraqtı nesielik qwjattardıñ jäne tiisti müliktik kepildiñ joqtığına qaramastan, mwnday nesielik ötinişterdi maqwldap otırğan. Bwl jolı solay bolğan. Bastısı, «aynalımdağı qarajattı tolıqtıruğa» dep berilgen nesielerdiñ eşqaysısı bankke qaytarılmağan.

«Arada eki ay uaqıt ötkende «Liter M» JŞS-niñ qarjılandıru şegi 22,5 million AQŞ dollarına deyin köbeytilgen. Bwğan kepil retinde «Montajinjiniring» jauapkerşiligi şekteuli seriktestiginiñ jarğılıq qorınıñ 75 payızdıq ülesi qoyıluı kerek bolğan»,- dep jalğastırdı sözin Talğat Amantay. Tüptep kelgende, «Montajinjiniring» jauapkerşiligi şekteuli seriktestiginiñ jarğılıq qorınıñ 75 payızdıq ülesin M. Äbilyazovtıñ baqılauındağı «Liter  I» jauapkerşiligi şekteuli seriktestigi özine menşikteydi. Soñğı kompaniya M. Äbilyazovtıñ küzetşisiniñ atına tirkeledi. Bwl jerde «Montajinjiniringtiñ» Almatı qalasındağı Abay jäne Furmanov köşeleriniñ qiılısındağı qwnı qımbat jıljımaytın mülik kepilge qoyıluı tiis bolğan.

Alayda, sayıp kelgende ne «Liter M» JŞS-iniñ, ne «Liter  I» JŞS-iniñ tarapınan BTA bankke eşqanday kepildik qoyılmağan. Bankten berilgen nesie qaytarılmağan, tipti onı eşkim de qaytaruğa niet tanıtpağan.

«Stroygrupp LTD» jauapkerşiligi şekteuli seriktestigine de osınday kestemen nesie berilgen. Ayta ketelik, bwl kompaniyanıñ akciyasınıñ 80 payızdıq ülesi Mwhtar Äbilyazovtiñ sıbaylastarınıñ biri banktiñ bwrınğı basqaruşı direktorı, sottaluşı Qayrat Sadıqovtıñ atına tirkelipti. Sot otırısında sotqa tüsinik bergen Sadıqov atalğan kompaniyanıñ nominaldı qojayını bolğanın, biraq eşqanday mäselelerdi şeşumen aynalıspağanın ayttı. BTA banktiñ nesie komiteti ötinişti özi tirkep,   «Stroygrupp LTD» JŞS-ne 45 million AQŞ dolları kölemindegi kepilsiz nesieni audaradı. Tüptep kelgende, bwl nesie de bankke qaytarılmağan.

Abai.kz

16 pikir